,
15 ნოემბრიდან საქართველოში კომპანია Google-ის საგადახდო აპლიკაცია - Google საფულე (Google Wallet) ამოქმედდა. მათ, ვისაც Android-ის ტელეფონი აქვს, შესაძლებლობა აქვთ ისარგებლონ ამ საგადახდო სისტემით და გადახდები ტელეფონის პოსტერმინალზე ერთი დადებით განახორციელონ.
რა უპირატესობა აქვს Google Pay-ის პლასტიკურ ბარათთან შედარებით? - ამ საკითხზე გადაცემა BMGDRIVE-ში სტუმრობისას „თიბისი“ გადახდების ლიგის ლიდერმა, მაკო გოგიამ ისაუბრა. მისი თქმით, Google Pay-ის მთავარი უპირატესობა მისი უსაფრთხოებაა.
„ეს არის მსოფლიოში ერთ-ერთი უსაფრთხო გადახდის მეთოდი, ვინაიდან, ამ სისტემის უკან საკმაოდ ახალი ტექნოლოგიური გადაწყვეტილება დგას. ტელეფონში ბარათის დამატებისას, ვირტუალური ბარათის უნიკალური ნომერი გენერირდება და არ ხდება თქვენი რეალური ფიზიკური ბარათის მონაცემების შენახვა. გარდა ამისა, თავად ამ მოწყობილობაში ჩადებული არის უსაფრთხოების დამატებითი პარამეტრები, რაც გულისხმობს იმას, რომ ყოველი გადახდისას უნიკალური გასაღები გენერირდება, რომლითაც ხდება თქვენი გადახდის ხელმოწერა და დადასტურება“, - აცხადებს მაკო გოგია.
როგორც ის განმარტავს, Google Pay-ს კიდევ ერთი უპირატესობა ის არის, რომ ის სწრაფი გადახდის საშუალებაა და მომხმარებლის დროს მნიშვნელოვნად ზოგავს.
„გადახდა ხდება სწრაფად, ტელეფონი სულ თან გაქვს და არ გჭირდება დამატებით ბარათის მოძიება. გარდა ამისა, გარკვეული თანხის ქვემოთ არ არის აუცილებელი აპლიკაციაში შესვლა, საკმარისია მხოლოდ ეკრანის გააქტიურება.
Google Pay მოწყობილობით შეგიძლიათ გადაიხადოთ, ელექტრონულ კომერციაში ივაჭროთ და ასევე ბანკომატიდან თანხა გაანაღდოთ“ , - განაცხადა „თიბისი“ გადახდების ლიგის ლიდერმა, მაკო გოგიამ.
მისი თქმით, იმ შემთხვევაში, თუ მომხმარებელი მობილურს დაკარგავს, მას როგორც Google-ის, ასევე ბანკის დახმარებით შეუძლია მოწყობილობის დაბლოკვა ისე, რომ ფიზიკური ბარათი არ დაიბლოკოს.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
