უცნობი ავტორის (უსაფრთხოების გამო) წერილი კონსტანტინოპოლში მყოფ ქართულ პოლიტიკურ კომისიას, ქვეყანაში არსებული მდგომარეობის შესახებ, 13 აგვისტო 1921 წ.
"მოდიან არა მარტო ისინი, ვინც საქართველოს საზღვრებს გაშორდა, რადგან ვერ შეურიგდა ჩვენი ქვეყნის დამოუკიდებლობას, არამედ მოდიან ისეთი პირებიც, რომლებსაც არასოდეს არ უნახავს საქართველო დღემდის. ეს სტიქიური პროცესი საქართველოში არაქართველთა ჩამოსახლებისა რუსეთში დამდგარი შიმშილობის გამო სულ უფრო და უფრო საშიშარ სახეს იღებს. ტფილისის მცხოვრებთა რიცხვი დღითი დღე იზრდება ათი და ასი ათასობითაც კი. როგორც სარწმუნო წყაროებიდან გადმომცეს, ამჟამათ ტფილისში 890.000 მეტი მცხოვრებია და თუ ეს პროცესი არ შეჩერდა (რა შეაჩერებს), ძალიან მალე მილიონს წააცილებს. ქუჩაში რომ მიდიხართ ათ გამვლელში ერთ ქართველს ძლივს დაინახავთ. ქალაქში გროვ-გროვათ დაძრწიან ფეხშიშველი, ტანისამოს შემოფლეთილი წითელარმიელები, პირდაუბანელი და აუწერელათ ბინძურები. მაგრამ რუსეთიდან მოდენილი ინტელიგენცია კიდევ უფრო უნუგეშო სურათს წარმოადგენს: განსაკუთრებით იმის გამო, რომ ეს უცნაური ხალხი თავს იტყუებს, ამ გაველურებულ, გაშიშვლებულ, დამშეულ ხალხს ჰგონია რომ მართლა მოაქვს ჩვენი ქვეყნისთვის რაღაც, მართლა ანთავისუფლებს მას, ჰქმნის რაღაცას. ერთი სიტყვით, ჩვენს თვალწინ ითქვიფება ქართველობა, დამშეული რუსეთიდან წამოსულ მღვრიე ტალღებში ინთქება და ილესება".
