,
2025 წლის 11 თვეში საქართველოს ექსპორტი წლიურად 10%-ით, 6.6 მილიარდ დოლარამდე გაიზარდა - ამის შესახებ საქსტატის მიერ დღეს გამოქვეყნებული ანგარიშიდან ხდება ცნობილი. დოკუმენტის თანახმად, ექსპორტის ზრდაზე ყველაზე დიდი გავლენა მოახდინა მსუბუქი ავტომობილების რეექსპორტის სექტორმა, რომელიც წელს 18%-ით, 2.6 მილიარდ დოლარამდე გაიზარდა.
მეორე პოზიციას იკავებს ძვირფასი ლითონების მადნები და კონცენტრატები 340 მილიონი დოლარით, რაც წლიურად 60%-ით არის გაზრდილი. აღნიშნული ძირითადად ოქროს საერთაშორისო ფასის ზრდით არის განპირობებული. მესამე პოზიციას კი სპირტიანი სასმელები იკავებს 256 მილიონი დოლარით, რაც წლიურად 5%-ით არის შემცირებული. ასევე შემცირებულია ღვინის ექსპორტი 245 მილიონ დოლარამდე, კლება წინა წელთან 7%-ს შეადგენს.
| # | საქონელი | მლნ დოლარი | ზრდა/კლება წინა წელთან |
| 1 | მსუბუქი ავტომობილები | 2622 | 18% |
| 2 | ძვირფასი ლითონების მადნები და კონცენტრატები | 340 | 60% |
| 3 | სპირტიანი სასმელები | 256 | -5% |
| 4 | ყურძნის ნატურალური ღვინოები | 245 | -7% |
| 5 | ფეროშენადნობები | 207 | -35% |
| 6 | მინერალური და მტკნარი წყლები, შაქრის დანამატების გარეშე | 161 | 5% |
| 7 | მინერალური და გაზიანი წყლები, შაქრის შემცველობით | 155 | 21% |
| 8 | თხილი და სხვა კაკალი | 146 | 62% |
| 9 | აზოტოვანი სასუქები | 118 | 14% |
| 10 | ნავთობი და ნავთობპროდუქტები | 114 | 49% |
| 11 | დანარჩენი საქონელი – სულ | 2255 | 4% |
რაც შეეხება საექსპორტო ქვეყნებს, მათ შორის კვლავ პირველ ადგილზეა ყირგიზეთი 1.4 მილიარდი დოლარით (ზრდა 20%), რაც თითქმის სრულად მსუბუქი ავტომობილების რეექსპორტს უკავშირდება. 850 მილიონი დოლარით მეორე ადგილზეა ყაზახეთი (ზრდა 7%), სადაც საქართველოს მთავარი საექსპორტო საქონელი ასევე მსუბუქი ავტომობილების რეექსპორტია, მესამე მთავარი საექსპორტო ბაზარი კი რუსეთის ფედერაციაა 673 მილიონი დოლარით (ზრდა 6%).
საქართველოს ტოპ-10 საექსპორტო ქვეყანას შორის ევროკავშირის მხოლოდ ერთი წევრი ბულგარეთია, სადაც წელს 233 მილიონი დოლარის ღირებულების საქონელი გავიდა ექსპორტზე (ზრდა 118%). მთლიანად ევროკავშირის წილი ექსპორტში 25.5%-ია, ანუ 1.7 მილიარდი დოლარი, რაც წინა წელთან შედარებით 6%-ით არის გაზრდილი.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
