,
კიევის ეკონომიკის სკოლის მიერ გამოქვეყნებული კვლევის თანახმად, რუსეთის უკრაინაში შეჭრის შემდეგ ქვეყანამ 600 მილიარდი აშშ დოლარი დაკარგა. აქედან 92 მილიარდი აშშ დოლარის ზარალი მხოლოდ ინფრასტრუქტურას მიადგა. კვლევა ეხმიანება ვოლოდიმირ ზელენსკის განცხადებას, რომლის მიხედვითაც უკრაინას რუსეთის ქვეყანაში შეჭრა უკვე ნახევარი ტრილიონი დოლარი დაუჯდა.
მკვლევარების დათვლებით, ომის დაწყებიდან დღემდე საერთო ზარალი 564-დან 600 მილიარდ აშშ დოლარამდე მერყეობს. აღნიშნული რიცხვის მისაღებად კვლევაში რამდენიმე მაჩვენებელი გაერთიანდა. საერთო ზარალის შეფასება პირდაპირი ინფრასტრუქტურული დანახარჯების შედგენის, მოქალაქეების, სამთავრობო უწყებებისა და ადგილობრივი თვითმართველობების მიერ მოწოდებული ინფორმაციის გამოყენებით მოხდა. გარდა ამისა, მკვლევარებმა დაიანგარიშეს არაპირდაპირი ხარჯებიც, მათ შორის მშპ-ს შემცირება, სოციალური მხარდაჭერის ხარჯები თუ შეჩერებული ინვესტიციებისაგან მიყენებული ზარალი.
ანგარიშის მიხედვით, რუსეთის უკრაინაში შეჭრიდან დღემდე 195 ქარხანა და საწარმო, 230 სამედიცინო დაწესებულება და 940 საგანმანათლებლო სივრცე დაზიანდა, განადგურდა ან ოკუპირებულია.
ყველაზე დიდი მატერიალური ზარალი საცხოვრებელი სახლებისა და გზების ინფრასტრუქტურას მიადგა. ამ მხრივ დანაკარგებმა 60 მილიარდი აშშ დოლარი შეადგინა. კვლევის მიხედვით, რუსეთის უკრაინაში შეჭრის შემდეგ 23 800 კილომეტრი სიგრძის გზები დაზიანდა ან განადგურდა. უკრაინული ბიზნესებისათვის მიყენებული ზარალი კი 10 მილიარდ აშშ დოლარს შეადგენს.
თუმცა, მიუხედავად მატერიალური დანაკარგებისა, აუცილებლად უნდა გვესმოდეს ისიც, რომ ყველაზე დიდი დანაკარგი იმ ადამიანების სიცოცხლეა, რომლებიც რუსულ აგრესიას ემსხვერპლა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
