დეველოპერული კომპანია „არსის“ გენერალური დირექტორი ბესო ორთოიძის ინფორმაციით, უძრავი ქონების გაყიდვების მაჩვენებელი სრულადაა აღდგენილი და მაისში, გასული წლის ამავე თვის მონაცემებს აჭარბებს. ამის შესახებ მან „საქმიან დილაში“ სტუმრობისას ისაუბრა.

„არსის“ ხელმძღვანელი ამბობს, რომ დარგში წლის დასაწყისში არსებული მოლოდინები შეცვლილია, რადგან მოთხოვნა გაუმჯობესებულია და წლის ჭრილშიც, ანალოგიური მოთხოვნის შენარჩუნების შემთხვევაში პოზიტიური მოლოდინები ექნებათ. ის ბუნებრივს უწოდებს ნებართვების გაცემის შემცირებას და ამას გასულ წლებში არსებული მაღალი მაჩვენებლით ხსნის.

„უძრავი ქონების მიმართულებით, არანაირი პრობლემა არ გვაქვს. წლის დასაწყისში იყო რყევები, თუმცა აპრილსა და მაისში ჩვენი კომპანიის შემთხვევაში გაყიდვები გასული წლის მონაცემებს გადააჭარბებს. შესაბამისად, მოთხოვნის ნაწილში არანაირი პრობლემა არ გვაქვს.

რაც შეეხება ნებართვებს, ლოგიკურია, რომ შემცირდება, რადგან 2 წლის განმავლობაში საკმაოდ დიდი რაოდენობის ნებართვა გაიცა და ამ ტემპით ვერ გაგრძელდებოდა, ისიც ლოგიკურია, რომ სანებართვო ფართები მოცულობაში გაზრდილია, რადგან დღეს თუ შევხედავთ, ნებართვები გაცილების მაღალი კოეფიციენტებით გაიცემა, ვიდრე ეს მანამდე იყო. შესაბამისად, ინვესტიციების ნაწილში ადგილობრივი კაპიტალი დომინირებს, თუმცა გრძელვადიან პერსპექტივაში უცხოური ინვესტიციები აუცილებელი იქნება. პრობლემას ამ მიმართულებით ვხედავ, რადგან მიმდინარე რეჟიმში, რა მოლოდინებიც გასული წლის ბოლოს ან მიმდინარე წლის დასაწყისში გვქონდა, რადიკალურადაა შეცვლილი. თუ მანამდე რყევებზე და კრიზისის ნიშნებზე ვსაუბრობდით, ახლა ეს აღარ ხდება და ტრანზაქციების ნაწილი სრულად აღდგენილია და საკმაოდ ნორმალურია. მაისის ჩათვლით, ვფიქრობ, წინა წლის მაჩვენებლებს გადაასწრებს. დეკემბერსა და იანვარში გაყიდვებში საკმაოდ დიდი შემცირება იყო, თებერვალ-მარტში დაახლოებით 10%-იანი შემცირება გვქონდა, აპრილში [წინა წლის აპრილის გაყიდვებს] გავუთანაბრდით, მაისის მონაცემებით, მოლოდინი მაქვს, რომ წინა წლის მონაცემებს გადაააჭარბებს და წინა წლის 5 თვის მაჩვენებელს გადააჭარბებს. ივნისში - საკმაოდ დიდი აქტივობაა და ეს მაძლევს იმის იმედს, რომ მიმდინარე წელს ამ კუთხით რამე მნიშვნელოვანი პრობლემა არ გვექნება“, - განმარტა ბესო ორთოიძემ.

წყარო:https://bm.ge/