,
ბრიტანული სამაუწყებლო კომპანიის BBC-ის რუსელენოვანი სამსახურის (BBC russian) ვებ-გვერდზე გამოქვეყნებულია სტატია სათაურით „რატომ შეცვალა ვიქტორ ორბანმა თავისი პოზიცია უკრაინისადმი დახმარების მიმართ“ (ავტორი - ნიკ ტორპი, „ბი-ბი-სის“ ბუდაპეშტელი კორესპონდენტი).
გთავაზობთ პუბლიკაციის მოკლე შინაარსს:
როგორც ცნობილია, გასული თვის ბოლოს უნგრეთმა, ევროსაბჭოს სამიტზე, ევროკავშირის განზრახვა დაბლოკა, რომელიც უკრაინისათვის 50 მილიარდი ევროს გამოყოფას ითვალისწინებდა, მაგრამ პირველ თებერვალს გამართულ სამიტზე დახმარებას მხარი დაუჭირა.
რაშია საქმე?
საქმე იმაშია, რომ ვიქტორ ორბანი, რომელზეც ევროპელი ლიდერების უძლიერესი ზეწოლა განხორციელდა, მიხვდა, რომ ვერ გაიმარჯვებდა იმ ბრძოლაში, რომელიც უკრაინისათვის დახმარების გამოყოფა წარმოადგენდა.
რასაკვირველია, როცა ლიდერი ჯერ მტკიცე უარს აცხადებს, ორიოდე დღის შემდეგ სწრაფად იხევს უკან და თანხმდება, ასეთი მოქმედება მის რეპუტაციას ზიანს აყენებს. ეს ყველაფერი ვიქტორ ორბანმა კარგად იცის და ამიტომ ისე გააკეთა, რომ სამშობლოში თავისი მომხრეების თვალში სახელი არ გასტეხოდა.
უნგრეთის პრემიერმა, სამიტის დაწყებამდე, ბრიუსელის ქუჩებში გაიარა და ფერმერების საპროტესტო აქციაში მონაწილეობა მიიღო ანუ „ხალხთან ახლოს დადგა“. ეს იყო სიგნალი უნგრელი და ევროპის სხვა ქვეყნების ამომრჩევლებისათვის იმისა, რომ ივნისში დაგეგმილი ევროპარლამენტის არჩევნებში როგორი მრწამსის პოლიტიკოსები უნდა იქნენ არჩეულნი. ეს იყო მინიშნება იმისა, რომ ბრიუსელის პოლიტიკა ცვლილებები ჭირდება და ის ბიუროკრატები, რომლებიც უკრაინას განუსაზღვრელი რაოდენობით აძლევენ ფულს და ამ დროს საკუთარი ფერმერების მძიმე მდგომარეობას ყურადღებას არ აქცევენ, არ ცდილობენ მათთვის სუბსიდიების გამოყოფას საწვავისა და სხვა მასალების გაძვირების გამო და ფულს კიევში გზავნიან, ისინი [ბიუროკრატები] პოლიტიკას უნდა ჩამოშორდნენ.
მოკლედ, ვიქტორ ორბანმა ეს ბრძოლა წააგო, მაგრამ მას იმედი აქვს, რომ უფრო მასშტაბურ ბრძოლაში გაიმარჯვებს და ევროკავშირს შიგნიდან შეცვლის - საარჩევნო ურნების მეშვეობით. [თუ ევროპარლამენტში ვიქტორ ორბანის მსგავსი ულტრამემარჯვენეები მოვლენ, მაშინ პარლამენტის დადგენილებები გარკვეულწილად სავალდებულო იქნება შესასრულებლად ევროკომისიისათვის და ევროსაბჭოსათვის].
წყარო: https://www.bbc.com/russian/live/news-67845109
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
