,
ბრიტანული სამაუწყებლო კომპანიის BBC-ის რუსული სამსახურის (BBC russian) მიერ გამოქვეყნდა სტატია „პუტინი როგორც შურისგების ოსტატი“: GIA-ს დირექტორი უილიამ ბერნსი თვლის, რომ ვლადიმერ პუტინი ევგენი პრიგოჟინს სამაგიეროს გადახდას უმზადებს“.
გთავაზობთ პუბლიკაციას მცირე შემოკლებით:
აშშ-ის ცენტრალური სადაზვერვო სააგენტოს (CIA - ცსს) დირექტორი უილიამ ბერნსი თვლის, რომ ევგენი პრიგოჟინთან დაკავშირებული ისტორია, რომელსაც ამბოხების შემდეგ ბელარუსში წასვლის ნება მისცეს, ჯერ კიდევ არ არის დასრულებული: „ვლადიმერ პუტინს ჯერ კიდევ ვერ გადაუწყვეტია, თუ როგორ მოექცეს „ვაგნერის“ დამაარსებელს“, - განაცხადა აშშ-ის დაზვერვის ხელმძღვანელმა უსაფრთხოების საკითხებისადმი მიძღვნილი საერთაშორისო ფორუმის (Aspen Security Forum) დაწყების წინ. „ის, რასაც ჩვენ თვალს ვადევნებთ, ძალიან რთულ თამაშს წარმოადგენს“, - აღნიშნა უილიამ ბერნსმა.
სანამ კერძო სამხედრო კომპანიის „ვაგნერის“ მეთაური ერთი ადგილიდან მეორეზე გადადის - მან მოსკოვშიც კი მოასწრო ყოფნა და ვლადიმერ პუტინს შეხვდა, ამის მიუხედავად რუსეთის პრეზიდენტი მოთმინებით ელოდება შესაფერის მომენტს და ეძებს საუკეთესო მეთოდს მასზე შურისძიებისათვის, - თვლის ცსს-ის ხელმძღვანელი.
როგორც უილიამ ბერნსი ამბობს, „ვაგნერ-ჯგუფის“ ამბოხმა ევგენი პრიგოჟინის ხელმძღვანელობით, რომელმაც ერთი დღე-ღმის განმავლობაში რამდენიმე მნიშვნელოვანი სამხედრო ობიექტი დაიკავა და თითქმის მოსკოვამდე მივიდა, რუსეთის ხელისუფლების სისტემაში რამდენიმე სერიოზული ნაკლი გამოავლინა და პუტინი ამას ასე იოლად ვერ შეეგუება, უპასუხოდ არ დატოვებს.
მაგრამ იმის გამო, რომ დაქირავებული „ვაგნერელები“ კრემლისათვის ჯერ კიდევ ასრულებენ მნიშვნელოვან როლს ლიბიაში, სირიაში და აფრიკის რიგ ქვეყნებში, ვლადიმერ პუტინი თავის სამომავლო გადაწყვეტილებებში შეეცდება ვაგნერის ქვედანაყოფებს ლიდერი ჩამოაცილოს.
„შურისძიების ოსტატი“
„ვლადიმერ პუტინი ერთ-ერთი იმათგანია, ვინც თვლის, რომ „შურისძიება ისეთი კერძია, რომელიც ცივად უნდა მიირთვა“. ჩემი გამოცდილებით, პუტინი შურისძიების ვირტუოზული ოსტატია, ამიტომაც არ გამიკვირდება, თუ ევგენი პრიგოჟინი ამ ეტაპზე პრეზიდენტს გადაურჩება, მაგრამ მომავალი მისთვის უარესი იქნება“, - თქვა უილიამ ბერნსმა.
ამას წინათ პრეზიდენტმა ჯო ბაიდენმა ივარაუდა, რომ „ვაგნერის“ ხელმძღვანელი შეიძლება მოწამლონ: „ამიტომაც მე მის ადგილზე ძალიან ფრთხილად ვიქნებოდი იმ კერძების მიმართ, რასაც მივირთმევ“, - იუმორით აღნიშნა თეთრი სახლის ბინადარმა ერთი კვირის წინ.
ცსს-ის დირექტორი პრეზიდენტს ეთანხმება: „დიახ მეც ვფიქრობ, რომ ევგენი პრიგოჟინს ამჟამად საჭმელების დეგუსტატორი ძალიან ჭირდება“.
უილიამ ბერნსმა დაადასტურა, რომ ცენტრალურმა სადაზვერვო სააგენტომ წინასწარ იცოდა ევგენი პროგოჟინის მიერ ამბოხების მომზადების თაობაზე. მისი თქმით, ეს ყველაფერი ასევე იცოდა გენერალმა სერგეი სუროვიკინმაც, რომელსაც ზუსტად ამ მიზეზის გამო „თავისუფლად გადაადგილება აკრძალული აქვს“
როგორც ცნობილია, ამბოხების შემდეგ უკრაინაში რუსეთის ჯარების სარდლის მოადგილე სერგეი სუროვიკინი ნამდვილად „გაქრა რადარებიდან“: ზუსტად არავინ იცის, თუ სად იმყოფება გენერალი, თუმცა, ყველაზე გავრცელებული ვერსიის თანახმად, იგი დაპატიმრებულია.
„მეფე შიშველია!“
უილიამ ბერნსის თქმით, „ვაგნერელთა“ ამბოხება რუსეთის ხელისუფლების წინააღმდეგ ყველაზე პირდაპირ გამოხდომას წარმოადგენს, რომელიც ვლადიმერ პუტინს თავის 23-წლიანი მმართველობის დროს უნახავს.
ფიზიკური საფრთხისა და მუქარის გარდა, რომლის დემონსტრირება ევგენი პრიგოჟინის დაქირავებულებმა მოახდინეს, „ვაგნერის“ ხელმძღვანელმა გაბედა და ომის გამართლების კრემლისებური ნარატივის წინააღმდეგაც წავიდა: მან განაცხადა, რომ ეს ნარატივი სიცრუეს და სიყალბეს წარმოადგენს.
და ყველაზე მნიშვნელოვანი ამ ისტორიაში, უილიამ ბერნსის თქმით, ის არის, რომ ვლადიმერ პუტინს მოუწია გარიგება დაედო ისეთ ადამიანთან, რომელიც ჯერ კიდევ მცირე ხნის წინათ კრემლის ადმინისტრაციისათვის სურსათ-სანოვაგის მთავარი მომმარაგებელი იყო.
ევგენი პრიგოჟინს ხშირად უწოდებენ „პუტინის მზარეულს“ - იმიტომ , რომ „ვაგნერის“ შექმნამდე იგი უზრუნველყოფდა რუსეთის ხელისუფლების ინსტიტუტებისა და არმიის კვებას.
36-საათიანი ამბოხება ვლადიმერ პუტინის თავმოყვარეობისათვის ძლიერ დარტყმას წარმოადგენს - პრეზიდენტი ხომ დიდი ხნის განმავლობაში ქმნიდა თავის იმიჯს, რომ იგი რუსეთში წესრიგის მთავარი დამცველია. ახლა ბევრს გაუჩნდა სამართლიანი კითხვა: იქნებ „მეფე შიშველია?“, ან უკიდურეს შემთხვევაში, თუ შიშველი არ არის, ასე დაყოვნებით რატომ იცვამს? (ანუ რატომ არ იღებს ზომებს?).
რუსულ ელიტას უამისოდაც უკვე შეაქვს ეჭვი იმაში, რომ ვალდიმერ პუტინი ადექვატურად მსჯელობს მას შემდეგ, რაც რუსული ჯარი უკრაინაში შეიჭრა. მსგავსი ეპიზოდები მხოლოდ ეჭვებს აღრმავებს მისი, როგორც რუსეთის ლიდერისადმი.
უილიამ ბერნსის აზრით, თუ უკრაინა ბრძოლის ველზე წარმატებას მიაღწევს, სულ უფრო მეტი რუსი მოუსმენს ევგენი პრიგოჟინს, რომელიც ომის მიმდინარეობას და რუსეთის არმიის მდგომარეობას აკრიტიკებს.
„ოპტიმისტური პერსპექტივა“
უილიამ ბერნსი თვლის, რომ უკრაინის არმიის კონტრშეტევასთან დაკავშირებული სირთულეები გასაგებია - რუსები ხომ თვეების განმავლობაში ემზადებოდნენ თავდაცვითი ხაზების გასამაგრებლად... მაგრამ ცსს-ის ხელმძღვანელი დარწმუნებულია, რომ უკრაინას წინ წარმატებები ელოდება: „რა თქმა უნდა, უკრაინის არმიის წინსვლა იოლი და მსუბუქი არ იქნება, მაგრამ მე ოპტიმისტი ვარ“, - განაცხადა CIA-ს ხელმძღვანელმა ფრონტზე შექმნილი სიტუაციის კომენტირებისას. მან კიევი გააფრთხილა კიდეც - არის იმის ნიშნები, რომ რუსეთს შეუძლია სიცრუისა და დეზინფორმაციის ტაქტიკით ისარგებლოს - „შავ ზღვაში უცხოურ გემებს შეუტევს და ამაში უკრაინას დაადანაშაულებს“.
წყარო: https://www.bbc.com/russian/articles/cyx9j2yez29o
