საქართველოს მთავრობის განკარგულებით, “რიყის დოქების” ადგილას, შესაძლოა, სასტუმრო გაიხსნას. განკარგულებაში, რომელიც მიმდინარე წლის 6 მაისით თარიღდება წერია, რომ აღნიშნული უძრავი ქონების განვითარება მოიცავს სასტუმროს შექმნას, რაც თავის მხრივ შეიძლება მოიცავდეს სამშენებლო/სადემონტაჟო სამუშაოების განხორციელებასაც.

აღნიშნულის შესახებ ინფორმაცია თავდაპირველად, არასამთავრობო ორგანიზაცია „სამოქალაქო მონაწილეობის ცენტრის“ ხელმძღვანელმა ირაკლი აბესაძემ გაავრცელა, რის შემდეგაც bm.ge დეტალებით დაინტერესდა.

კერძოდ, განკარგულებაში წერია, რომ სახელმწიფო ქონების ეროვნულ სააგენტოსა და "შპს რიყე დომს" შორის 2022 წლის 10 მაისს დადებულ ნასყიდობის ხელშეკრულებაში ცვლილება შევიდა, რომლის მიხედვითაც საპრივატიზაციო პირობები გარკვეული რედაქციით ჩამოყალიბდა.

კერძოდ, "შპს რიყე დომმა" პირადად ან მესამე პირის მეშვეობით, 2030 წლამდე უნდა უზრუნველყოს უძრავი ქონების [“რიყის დოქების”] განვითარება.

აღნიშნული საპრივატიზაციო პირობები "შპს რიყე დომმა" 44 000 000 ლარის ინვესტიციით უნდა განახორციელოს.

"უძრავი ქონების განვითარება მოიცავს (მაგრამ შესაძლოა არ შემოიფარგლებოდეს) სასტუმროს შექმნას, (რაც შესაძლოა მოიცავდეს, სამშენებლო/სადემონტაჟო სამუშაოების განხორციელებას, კანონმდებლობით დადგენილი წესით) შესაბამისი შენობა ნაგებობ(ებ)ბის კანონმდებლობით დადგენილი წესით ექსპლუატაციაში მიღებას (ასეთის საჭიროების შემთხვევაში) ასევე სასტუმროს ფუნქციონირების დაწყებას", - წერია მთავრობის განკარგულებაში.

ინფორმაციისთვის:

2022 წელს ბიზნესმენ დავით ხიდაშელთან დაკავშირებულმა კომპანია GLOBAL VICTORY TRUST-მა "რიყის დოქები" 10 მილიონ ლარად შეიძინა. ქონება აუქციონზე საინვესტიციო ვალდებულებით გაიყიდა. კერძოდ, მესაკუთრეს 36 თვის ვადაში არანაკლებ 20 მლნ ლარის ინვესტიცია უნდა განეხორციელებინა და ტერიტორიაზე ღვინის, ციფრული ხელოვნების და ტექნოლოგიების მუზეუმი, ასევე საგამოფენო და საკონფერენციო სივრცეები მოეწყო.

აღსანიშნავია, რომ 12 მილიონი ლარის ინვესტიციის შეუსრულებლობის გამო, სახელმწიფომ დავით ხიდაშელს უკვე ჩამოართვა კურორტი ახტალა. ხიდაშელმა ახტალა 2018 წლის ივნისში, საჯარო აუქციონის შედეგად 3.76 მილიონ ლარად შეიძინა. აუქციონის პირობების მიხედვით, მას ტერიტორიაზე 120 ნომრიანი სასტუმრო-კომპლექსი უნდა აეშენებინა და პროექტში, არანაკლებ, 12 000 000 ლარის ინვესტიცია განეხორციელებინა.

მიმდინარე წლის 20 მარტს ცნობილი გახდა, რომ ბიზნესმენ დავით ხიდაშელის კომპანიას ასევე ჩამოერთვა კურორტი "ლიბანი" 499,500 ლარის პირგასამტეხლო დაეკისრა. კურორტი ლიბანი დავით ხიდაშელმა 2021 წლის მარტში შეიძინა და მასში 8 მილიონი ლარის ინვესტიციით 70 ნომრიანი სასტუმრო უნდა მოეწყო, თუმცა საინვესტიციო პირობები არ შესრულებულა.

ამასთან, 2023 წელს გარემოს ეროვნულმა სააგენტომ რაჭაში სამონადირეო მეურნეობის ლიცენზია ძალადაკარგულად გამოაცხადა. ხიდაშელთან დაკავშირებულმა კომპანია HG Capra Caucasica-მ რაჭაში სამონადირეო მეურნეობის განვითარების ლიცენზია 2022 წლის 23 მარტს, აუქციონში გამარჯვების საფუძველზე მიიღო, ლიცენზიით ნაკისრი ვალდებულებები არ შეასრულა.

დავით ხიდაშელმა "რიყის დოქები" მიმდინარე წელს გაყიდა. სამეწარმეო რეესტრის მიხედვით, ახალი მფლობელი 2025 წლის 25 აპრილს რეგისტრირებული კომპანიაა "რიყე დომ"-ი იყო.

კომპანიის წილის 100%-ს შპს ნ.გ.ბ. ფლობს, რომელიც თავის მხრივ თორნიკე კოპალიანს ეკუთვნის. დირექტორი კი მიხეილ ტყეშელაშვილია. ტყეშელაშვილი თავად ფლობს და თავადაა დირექტორი შპს ბუფალოში. ასევე, დირექტორია შემდეგ კომპანიებში: შპს ფონიჭალა ვუდსში, შპს ზაჰესი ლენდსში, შპს ორთაჭალ ოილში, შპს პორტრეტ თბილისში, შპს დი ვიჟენ გრუპში და შპს მაქრო ფროფერთიში.

რაც შეეხება მფლობელ თორნიკე კოპალიანს, სამეწარმეო რეესტრის მიხედვით ფლობს, შპს ბამბუ გარდენსის წილის 10%-ს და თავადაა დირექტორი, შპს 3ფ-ს 100%-ს, შპს თპ კომპანის 100%-ს, მეღვინეობა ხვამლის 100%-ს. მისი თანასაკუთრებაა კოოპერატივი უდაბნო-ლახირიც.

წყარო:https://bm.ge/