,
საქართველოში რძის წარმოება მცირდება, ფასები კი მკვეთრად მატულობს, რაც პროდუქტზე გაზრდილ მოთხოვნას უკავშირდება. რძის მწარმოებელთა ასოციაციის ინფორმაციით, საქართველო ნედლი რძის ფასით ევროპაში არსებულ ფასს რამდენიმე ათეული ცენტით აღემატება.
ასოციაციის ხელმძღვანელი კახა კონიაშვილი Business Insider Georgia-სთან რძისა და რძის პროდუქტების გაძვირების რამდენიმე ფაქტორს ასახელებს.
„რძის ფასმა პიკს მიაღწია. ფერმებში 1 ლიტრი რძე 2,50 ლარამდე გაძვირდა, საქართველოში ამ პროდუქტებზე ასეთი ფასი პირველად ფიქსირდება. ევროპულ ფასს უკვე საგრძნობლად გადავაჭარბეთ. ჩვენთან რძის ფასი, სულ მცირე, 20-25 ცენტით მეტია.
ამას, პირველ რიგში, მოთხოვნის ზრდა განაპირობებს, რასაც ასევე თავისი მიზეზი აქვს. გარკვეულ გავლენას ახდენს მიგრაციული პროცესები. უნდა ითქვას, რომ საქართველოში რძისა და რძის პროდუქტებს მოხმარება მაღალია. ინფლაციამაც იმოქმედა და პროდუქტებზე ფასი მკვეთრად გაიზარდა. ამასთან, ფასებზე ნეგატიურად იმოქმედა რუსეთ-უკრაინის ომმა, ლოგისტიკის გაძვირებამ.
მსოფლიო ბაზარზე მოიმატა ნედლეულის ღირებულებამ, მათ შორის, საკვების ბაზის, ცხიმების ფასმა. გარკვეული გავლენა რძის ფხვნილის იმპორტის შემცირებასაც აქვს", - ამბობს კახა კონიაშვილი და დასძენს, რომ გაიაფების ტენდენცია მიმდინარე წლის ზაფხულიდან არის მოსალოდნელი, როცა საქონლის საკვები ბაზა უფრო ხელმისაწვდომი გახდება.
„დეფიციტური და სეზონური ქვეყანა ვართ, ისედაც ძვირდებოდა რძისა და რძის ნაწარმი ზამთრობით. ახლაც ეს ტენდენციაა. ველოდებით, რომ ზაფხულიდან, როცა სეზონურობა გადაივლის და საკვების ბაზა გაიაფდება, ამას რძის გადამამუშავებელი ინდუსტრიაც ადეკვატურად უპასუხებს", - დასძენს კახა კონიაშვილი Business Insider Georgia -სთან. შეგახსენებთ, რომ გასულ წელს საქართველოში რძის წარმოება შემცირდა.
„საქსტატის“ მონაცემებით, 2021 წლის ბოლოს საქართველოში 587.9 მლნ ლიტრი რძე აწარმოეს, ხოლო 2022 წელს ეს მაჩვენებელი 574.7 მლნ ლიტრი იყო. ოფიციალური სტატისტიკით, 2022 წლის დეკემბრის მდგომარეობით რძე და ყველი წლიურად 17,5%-ით არის გაძვირებული.
