,
ფრანგულმა ტელეარხმა „ფრანსე-2“-მა (France-2) 9 ივნისს, საღამოს, ეთერში გადასცა ვიდეოსიუჟეტი დასავლელ მოკავშირეთა მიერ უკრაინისთვის მიცემული სამხედრო ტექნიკის არასახარბიელო მდგომარეობის შესახებ, რომელიც ვებ-გვერდზე გამოქვეყნებულია სათაურით „ომი უკრაინაში: მოკავშირეების მიერ კიევისათვის გაგზავნილი ტექნიკა ყოველთვის გამართული არ არის“ (ავტორები - სილვია პერესი, ქეით კორმერი, ვასილ გრიშკო).
გთავაზობთ ვიდეოსიუჟეტის ტექსტურ ვერსიას მცირე შემოკლებით:
უკვე ნახმარი და დაზიანებული, დაობებული და სათადარიგო ნაწილების გარეშე - აი, ასეთ სამხედრო ტექნიკას უგზავნის დასავლეთი უკრაინას არცთუ იშვიათად. თანაც, როგორც უკრაინელები ამბობენ, რემონტითაც არცერთი გამომგზავნი თავს არ იწუხებს. ტელეარხი „ფრანსე-2“ ესაუბრა უკრაინელ მექანიკოსებს, რომლებიც ცდილობენ თავი შეიკავონ, არ გაბრაზდნენ და რიტირიკულ კითხვას სვამენ: „რა ვუყოთ ამდენ გამოგზავნილ ნაგავს?“.
„ჩვენ ვიმყოფებით უკრაინის არმიის ზურგის ერთ-ერთ სამხედრო ბაზაზე - დისლოკაციის ადგილი, ბუნებრივია, საიდუმლოა და არ გავამჟღავნებთ. სწორედ ამ ბაზაში შემოდის იმ სამხედრო ტექნიკის მნიშვნელოვანი ნაწილი, რომლებსაც დასავლელი მოკავშირეები უკრაინელებს უგზავნიან. აი, თქვენ ხედავთ ახლახან მიღებულ ამერიკულ ტექნიკას - ათამდე MaxxPro-ს მარკის ჯავშანტრანპორტერს, რომლებიც აუცილებელია ფრონტის ხაზზე ჯარისკაცთა მისაყვანად და პირიქით. ბაზის ხელმძღვანელობამ, გამონაკლისის სახით, ნება დაგვრთო მათი მდგომარეობა ვიდეკამერით გადაგვეღო.
ვიქტორი, ტექმომსახურების პასუხისმგებელი პირი: „ამერიკული MaxxPro-ები ორი დღის წინ მივიღეთ. ეს სწორედ იმ დახმარების ნაწილია, რომელიც აშშ-ის კონგრესმა დაამტკიცა. ჩვენ ეს ტექნიკა უკრაინა-პოლონეთის საზღვარზე გადმოგვცეს“.
ამ ჯავშანტრანსპორტიორებს ფრონტის ხაზზე უკრაინელი ჯარისკაცები მოუთმენლად ელოდებიან, მაგრამ ტექნიკა, რომლებიც გარკვეული დროის განმავლობაში ევროპაში მდებარე ამერიკის სამხედრო ბაზაზე ღია ცის ქვეშ იდგა, ჯერ-ჯერობით გამოუყენებელია.
ვიქტორი (კაბინაში ზის): აი, შეხედეთ საქარე მინას... დანისლულია და არაფერი ჩანს. ხომ ატყობთ, როგორ არის დაზიანებული? მძღოლი ვერაფერს დაინახავს, განსაკუთრებით ღამით, როცა მათ ხშირად უწევთ სიარული. გარდა ამისა, შევამოწმეთ ყველა ელექტრული სისტემა და დამცველები - არცერთი არ ვარგა, დაობებულია. იმიტომ, რომ დიდხანს იყვნენ სინესტეში და არავის მომსახურება არ გაუწევია. მაგრამ ყველაზე მეტად საქარე მინები გვადარდებს, რაც ნამდვილ გადაუჭრელ პრობლემას წარმოადგენს. ასეთი მარკისა და მოდელის მინები უკრაინაში არ მზადდება. ჩვენ მივმართეთ მწარმოებელ ქარხანას და უკეთეს შემთხვევაში თვენახევარი ლოდინი მოგვიწევს“.
ამერიკიდან მოწოდებას მინიმუმ თვენახევარი ჭირდება, აქაც რემონტი - ერთი კვირა, ამასობაში კი დრო მიდის. კიდევ კარგი, რომ უკრაინელი მექანიკოსები ნამდვილი გამომგონებლებად გადაიქცნენ.
შევდივართ კიდევ ერთ საწყობში, სადაც რამდენიკე ფრანგული ჯავშანტრანსპორტიორი „რენო“ (Renault) დგას. ჩვენებმა უკრაინელებს ძველი ტექნიკა გამოუგზავნეს, ახლები კი თავისთვის დაიტოვეს. სამწუხაროდ, ამ მანქანების სავალი ნაწილის ღერძები ან გაცვეთილია, ან გატეხილი..
ოლეგი, მექანიკური სახელოსნოს უფროსი: „მე არ ვიცი, რა ვუყო ამ ნაგავს. „რენოების“ შეკეთება ჩვენს ძალებს აღემატება“.
სახელოსნოს უფროსი ცდილობს გაღიზიანება და ბრაზი დამალოს. მის თანამშრომლებს უცხოეთიდან მოწოდებული ტექნიკის მომსახურება აუტანელ „თავის ტკივილად“ გადაექცათ.
ოლეგი: „სათადარიგო ნაწილები აბსოლუტურად არ გვაქვს. ამიტომ შემდუღებელი აპარატის მეშვეობით „ყველაფერს ვაკერებთ, რისი დაკერებაც კი შეიძლება. ძველი საბჭოური დეტალების გადაკეთებას და გაჩარხვას როგორღაც ვახერხებთ“.
უამრავი თხოვნის მიუხედავად, მოკავშირეები ბაზას სათადარიგო ნაწილებს არ აწოდებენ.
ჩვენ კიდევ ერთ ბაზაზე ვიმყოფებით, რომლის მომსახურე პერსონალი დასავლეთიდან მეთოდისტებისა და ინსტრუქტორების გამოგზავნას ითხოვს.
ვიაჩესლავი, ბაზის უფროსის მოადგილე: „თუ ჩვენი მოკავშირეები სპეციალისტების გამოგზავნას აპირებენ, მაშინ უმჯობესი იქნება ტექნიკოსები გამოგზავნონ. ჩვენთვის აუცილებელია, რომ ორი უცხოელი სპეციალისტი მაინც გვყვავდეს ადგილზე მუდმივ რეჟიმში, რომ დაგვეხმაროს და დრო ტყუილად არ დავკარგოთ“.
სანამ დასავლელები მოვლენ, ბაზის ხელმძღვანელობა დამხმარეებს ადგილობრივ მოსახლეობაში დაეძებს, გამოცდილი ავტომექანიკოსების სახით. საკმარისია შეხედოთ ამ ნაჩუქარი ჯავშნიანი ტექნიკის „სასაფლაოს“, რომ მდგომარეობის მასშტაბი ობიექტურად შეაფასოთ. უკრაინას სასწრაფოდ ჭირდება გაუმართავი ტექნიკის გამართვა და მათი ექსპლოატაციაში გაშვება.
წყარო: https://www.francetvinfo.fr/monde/europe/manifestations-en-ukraine/guerre-en-ukraine-l-equipement-militaire-envoye-par-les-allies-pas-toujours-en-bon-etat_6592512.html
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
