,
რამდენად დაცულია ჩვენი საპენსიო დანაზოგები ეკონომიკური კრიზისის გაღრმავების შემთხვევაში - აღნიშნული კითხვა BMG-მ საპენსიო სააგენტოს დირექტორის მოვალეობის შემსრულებელს, გიორგი ჭიჭინაძეს დაუსვა.
მისი მტკიცებით, საპენსიო დანაზოგებთან დაკავშირებით, მოსახლეობას შეუძლია მშვიდად იყოს. ჭიჭინაძე ამის დასტურად 2020 წელს, კოვიდ პანდემიას და კრიზისს იშველიებს, როცა თანხასთან დაკავშირებით შიში არსებობდა.
"ამ მიმართულებით კანონში რადიკალურად არაფერი შეცვლილა ისეთი, რომ საპენსიო სააგენტოს დაცულობას რამე საფრთხეს უქმნიდეს. საზოგადოებამ იცის, რომ 2020 წელს დავიწყეთ ინვესტირებები, ამ დროს იყო კრიზისიც და კოვიდ პანდემიაც. ყველა მხარე ითხოვდა ამ თანხებზე ინფორმაციას და მაშინაც იყო ბევრი კითხვის ნიშანი, რომელიც საზოგადოებას ჰქონდა. მაშინ, დარწმუნდა საზოგადოება რომ საფრთხე არ არსებობდა. ზუსტად ასეა ახლაც. რადიკალურად მას შემდეგ არაფერი შეცვლილა. კანონში მხოლოდ მმართველობის ნაწილი შეიცვალა. ყველა სხვა საკითხი უცვლელია.
ამონაგები ძალიან შთამბეჭდავია. მზარდია და მართალია ეს არა აუდირებული ინფორმაციაა, მაგრამ , 2023 რომ 2024-ს შევადაროთ, ბოლო 1 წლის განმავლობაში 1.7 მლრდ-ით გაიზარდა ფონდი და აქედან, მხოლოდ 500-600 მლნ არის ამონაგების ზრდა. შესაბამისად, ძალიან პოზიტიური ტენდენციაა როგორც ადგილობრივ, ისევე გარე ბაზარზეც", - განაცხადა გიორგი ჭიჭინაძემ bm.ge-სთან.
შეგახსენებთ, საქართველოს საპენსიო ფონდის ზომა უკვე 6 მლრდ ლარია. 2025 წლიდან მოქალაქეების საპენსიო დანაზოგების ეფექტიანად ინვესტირებაზე პასუხისმგებელი იქნება საპენსიო ფონდის მმართველობითი საბჭო, რომლის წევრები კონკურსის გზით შეირჩევიან, მაგრამ დანიშნავს საქართველოს პრემიერ-მინისტრი. აღნიშნული ცვლილება „დაგროვებითი პენსიის შესახებ“ კანონში 2024 წლის ზაფხულში განხორციელდა. შედეგად, საქართველოს საპენსიო ფონდში ნაცვლად არსებული საინვესტიციო და სამეთვალყურეო საბჭოებისა, იქმნება საპენსიო ფონდის უმაღლესი ხელმძღვანელი ორგანო - მმართველობითი საბჭო.
ცნობისთვის, დღეს პარლამენტის საფინანსო საბიუჯეტო კომიტეტის სხდომაზე საპენსიო სააგენტოს 6 თვის ანგარიში მოისმინეს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
