პარლამენტის თავდაცვისა და უშიშროების კომიტეტის და ნდობის ჯგუფის წევრები, ვაზიანში განთავსებულ საბრძოლო მომზადების ცენტრს (CTC), მე-5 საარტილერიო და მე-4 მექანიზირებულ ბრიგადებს სტუმრობდნენ.
ბრიგადებსა და საბრძოლო მომზადების ცენტრში დეპუტატებისთვის სპეციალური ბრიფინგი გაიმართა.
მათ მიიღეს დეტალური ინფორმაცია დანაყოფების სტრუქტურისა და ამოცანების შესახებ, დაათვალიერეს ინფრასტრუქტურა, მიმდინარე ინფრასტრუქტურული პროექტები, ბრიგადების შტაბები, ძირითადი ტექნიკა და შეიარაღება, ეკიპირება, მათ შორის უნიფორმები და ფეხსაცმელი.
კანონმდებლები იმყოფებოდნენ ყაზარმებში, გაეცნენ სამხედრო მოსამსახურეების საცხოვრებელ, ასევე კვებით პირობებს და მათთან ერთად ისადილეს.
მე-4 მექანიზებულ ბრიგადაში, დეპუტატებმა გვირგვინით შეამკეს საქართველოს ერთიანობისთვის დაღუპულ გმირთა მემორიალი.
