,
ბრიტანული სამაუწყებლო კომპანიის „ბიბისის“ რუსული სამსახურის (BBC russian) ვებ-გვერდზე გამოქვეყნებულია ვრცელი სტატია სათაურით „ორი კურდღლის მოკვლის მცდელობა: რატომ აუქმებს რუსეთი სავიზო რეჟიმს საქართველოსთან და რატომ აბრუნებს პირდაპირ ავიამიმოსვლას?“ (ავტორები - ნინა ახმეტელი, მარია კისელიოვა).
პუბლიკაციაში გადმოცემულია რუსეთის პრეზიდენტის ვლადიმერ პუტინის მიერ ხელმოწერილი ბრძანებულებების შინაარსი, რომლებიც საქართველოს ეხება - სავიზო რეჟიმის გაუქმებას და ავიამიმოსვლის აღდგენას.
ჟესტი „ქართული ოცნებისაკენ“
„საქართველოსთან ავიამიმოსვლის აღდგენის შესაძლებლობაზე ჯერ კიდევ იანვარში განაცხადა საგარეო საქმეთა მინისტრმა სერგეი ლავროვმა. იგივე საკითხზე ინსჯელეს მოსკოვში გამართულ ქართულ-რუსულ ფორუმზეც, რომელშიც ქართული და რუსული საზოპგადოებების წარმომადგენლები მონაწილეობდნენ“, - ამბობს პოლიტოლოგი კონსტანტინ კალაჩევი, - ამიტომაც ვლადიმერ პუტინის ბრძანებულებებს მოულოდნელს ვერ ვუწოდებთ“.
კრემლი დაინტერესებული არ არის იმაში, რომ მომვალ არჩევნებში ქართულმა ოპოზიციამ გაიმარჯვოს. მოსკოვისათვის ამჟამინდელი მმართველი პარტია „ქართული ოცნება“ [მეტ-ნკლებად კომფორტულ და სასურველ] პარტნიორს წარმოადგენს. შესაბამისად, იბადება კითხვა: რა უნდა გაეკეთებინა რუსეთს ისეთი საქართველოსთვის, რომ ქართული საზოგადოების მნიშვნელოვან ნაწილს კრემლის ნაბიჯი [დადებითად] შეეფასებინა?, - ამბობს „ბიბისი“-სთან საუბარში ექსპერტი.
როგორც პუბლიკაციაშია აღნიშნული, საქართველოს პრეზიდენტმა თავისი რუსი კოლეგის ბრძანებულებები ნეგატიურად შეაფასა და მათ „მორიგი რუსული პროვოკაცია“ უწოდა, თუმცა იქვე ციტირებულია პოლიტოლოგ ალექსანდრე კინევის ნათქვამი - „საქართველოს პრეზიდენტს არანაირი აღმასრულებელი უფლებამოსილება არ აქვს“.
პოლიტოლოგი თვლის, რომ ვლადიმერ პუტინის ბრძანებულებები რუსეთიდან წასულ მოქალაქეებს (ე.წ. რელოკანტებსაც) ეხება - „მათ სამშობლოში დაბრუნება პირდაპირი ავიარეისით შეუძლიათ... ანუ ამ შემთხვევაში კრემლი ორ კურდღელის მოკვლას ცდილობს - ერთი მხრივ, ეს არის კარგი ჟესტი ‘ქართული ოცნებისაკენ“ და მეორე მხრივ - მიწვევა რუსების მიმარტ სამშობლოში დასაბრუნებლად“.
„არაფერი დადებითი“
საქართველოს მთავრობა რუსეთთან სავიზო რეჟიმის გაუქმებას და ავიამიმოსვლის აღდგენას მიესალმა. ხელისუფლების მთავარი არგუმენტია ის, რომ ამით ცხოვრება უიოლდება საქართველოს იმ მილიონობით მოქალაქეს, რომლებიც რუსეთში ცხოვრობენ..
მაგრამ მოსკოვის ნაბიჯმა ქართული ოპოზიციის დიდ ნაწილში ნეგატიური ტალღა გამოიწვია და მათ საბაბი მისცა კიდევ ერთხელ დაედანაშაულებინათ „ქართული ოცნება“ პრორუსულობასა და ანტიდასავლურობაში.
სტატიაში ციტირებულია ნაცმოძრაობის წევრის ანა წითლიძის და პარტია დროას“ ლიდერის ელენე ხოშტარიას განცხადებები, რომლებშიც რუსეთის პრეზიდენტის გადაწყვეტილებები და მათ მიმართ „ქართული ოცნების“ პოზიტიური დამოკიდებულება უარყოფითად არის შეფასებული. „მე მინდა რუსული ავიაკომპანიების წარმომადგენლებს ვუთხრა, რომ თბილისში ვერცერთი კომპანია თავის ოფისს ვერ გახსნის... თქვენ ქართველი ხალხი ფიზიკურ წინააღმდეგობას გაგიწევთ“, - განაცხადა ე.ხოშტარიამ მოსკოვის გასაგონად.
პოლიტოლოგი გიორგი ბადრიძე საქართველოს საერთაშორისო სტრატეგიული კვლევების ცენტრიდან თვლის, რომ რომ რუსეთის ხელისუფლების ნაბიჯები სრულიად ლოგიკურია - იმიტომ, რომ საქართველოს ხელისუფლება მოქმედებს დასავლეთის წინააღმდეგ და რუსეთის სასარგებლოდ. კრემლისა და ბიძინა ივანიშვილის ინტერესები ერთმანეთს ემთხვევა“.
პოლიტოლოგ გია ნოდიას აზრით, რუსეთის გადაწყვეტილება საქართველოს ხელისუფლებისათვის სამარცხვინოა: „იმ მორალური იზოლაციის გათვალისწინებით, როგორშიც დღეს რუსეთი იმყოფება, მოსკოვისაგან რაღაც პრივილეგიების მიღება სამარცხვინოა. მე ვფიქრობ, რომ კრემლის „საჩუქარი“ საქართველოში პრორუსული განწყობის გაძლიერებას არ გამოიწვევს“.
წყარო: https://www.bbc.com/russian/news-65544307
ამერიკული გაზეთი „ჰილი“ (The Hill) აქვეყნებს სტატიას სათაურით „მკვდრეთით აღმსდგარი: დონალდ ტრამპი როგორც ამერიკული პოლიტიკის „ლაზარე“ (ავტორი - დერეკ ჰანტერი).
„სიტყვას „ისტორიული“ პოლიტიკაში ხშირად იყენებენ ხოლმე და მას ფეხბურთის ბურთივით ათამაშებენ, ზოგჯერ კი მიზანში ვერ ურტყამენ. დონალდ ტრამპთან მიმართებით კი ამ სიტყვის გამოყენება სამართლიანია. მისი მიღწევა მართლაც ისტორიულია. მან უდიდესი რევანში აიღო პოლიტიკაში.
დონალდ ტრამპი არამხოლოდ პოლიტიკური გვამი იყო, არამედ საერთოდ, „პერსონა ნონ-გრატა“ როგორც ვაშინგტონში, ასევე მშობლიურ ნიუ-იორკშიც. და როგორც ხდება ხოლმე პოლიტიკაში, მას საპყრობლეში გაგზავნითაც ემუქრებოდნენ... და ახლა იგი თეთრ სახლში ძლევამოსილად ბრუნდება - ისეთ თამაშში გამარჯვების შემდეგ, რომელიც მანამდე არავის უთამაშია.
აშშ-ის ისტორიაში დონალდ ტრამპამდე მისნაირად მხოლოდ 22-ე და 24-ე პრეზიდენტი გროვერ კლივლენდი იქნა არჩეული ორი ვადით („შუალედური შესვენებით“ 1885-1889 და 1893-1897 წლებში). მსგავსი შემთხვევა ჰქონდა რიჩარდ ნიქსონს, რომელმაც 1960 წელს საპრეზიდენტო არჩევნებიც წააგო, გუბერნატორის არჩევნებიც (1962 წელს) და განაცხადა - „მორჩა, მეგობრებო, რიჩარდ ნიქსონს ვეღარსად ვეღარ ნახავთ - იმიტომ, რომ ეს ჩემი ბოლო პრეს-კონფერენციაა“. ჩვენ მისი ნახვა მაინც მოგვიწია 1968 წელს, თეთრ სახლის ოვალურ კაბინეტში. თუ რითი დაასრულა მან თავისი პრეზიდენტობა, გვახსოვს („უოტერგეიტით“), მაგრამ ფაქტია, რომ მისი დაბრუნება იმ დროისათვის ძალზე შთამბეჭდავი იყო.
დონალდ ტრამპმა კი რიჩარდ ნიქსონსაც გადააჭარბა. იგი ფაქტიურად „დამარხული“ იყო საკუთარი რესპუბლიკური პარტიის წევრების მხრიდანაც კი, სხვები კი მოთმინებით ელოდნენ, რომ იგი უბრალოდ გუდა-ნაბადს აიკრავდა და პოლიტიკიდან წავიდოდა. მაგრამ ასე არ მოხდა.
ამერიკელებმა თავისი პოზიცია გამოხატეს: მათ ცვლილებები სურდათ და კიდეც განახორციელეს. დონალდ ტრამპი ვერაფერმა ვერ შეაჩერა - ვერც ბრალდებებმა, ვერც თავდასხმებმა... ყველა მემარცხენე გაზეთი და ტელევიზია აკრიტიკებდა, ემუქრებოდა, აშინებდა, მაგრამ ისინი ყველა „ქაღალდის ვეფხვები“ აღმოჩნდნენ, დონალდ ტრამპმა ყველა „დაიკიდა“. რას იზამენ ახლა ტელეარხების MSNBC-სა და CNN-ის ხელმძღვანელები და მაყურებლები? ვინ აღმოჩნდა მარგინალი - ისინი თუ დონალდ ტრამპი? აღიარებენ თუ არა იმას, რომ არასწორად იქცეოდნენ - როცა ყველას, ვინც დონალდ ტრამპის გვერდით იდგა, გიჟებად და სულელებად თვლიდნენ?
მოკლედ, დონალდ ტრამპი „კონსტანტის“ (მუდმივის) განსახიერებაა: იგი იყო, არის და იქნება.
წყარო: https://thehill.com/opinion/campaign/4975713-donald-trump-greatest-comeback-since-lazarus/
