ფოთის გენერალურ გეგმაზე მუშაობა აქტიურად მიმდინარეობს. როგორც ერთ-ერთი შემსრულებელი კომპანიის „სითი ინსტიტუტის“ დამფუძნებელმა მამუკა სალუქვაძემ „საქმიანი დილის“ ეთერში განაცხადა, დეტალური განაშენიანების დაგეგმვა 700 ჰექტარზე მიმდინარეობს, რაც მისი შეფასებით, ქვეყნის პრაქტიკაში უპრეცედენტოა.

ამ ეტაპზე უკვე დასრულებულია პროექტის კონცეფციის ნაწილი, რომელიც მოიცავს ქალაქის განვითარების ძირითად ხედვას, ფუნქციურ დატვირთვებსა და სივრცით სტრუქტურას.

პარალელურად, სამუშაოები მიმდინარეობს სხვადასხვა მიმართულებით მათ შორის, სატრანსპორტო და ურბანული კავშირების გაძლიერების დაგეგმვა, სანაპირო ზოლის განვითარების კონცეფცია, ასევე სპორტული, ტურისტული და საცხოვრებელი ინფრასტრუქტურის განაწილება.

გენერალური გეგმის საბოლოო ვერსია მზად ზაფხულში უნდა იყოს.

„ფოთთან დაკავშირებული ეს პროექტი ჩემთვის ძალიან საინტერესოა. ვფიქრობ, ის მნიშვნელოვანი იქნება როგორც დეველოპერებისთვის, ისე ადგილობრივი მოსახლეობისთვის და ზოგადად ყველასთვის, ვისაც ჩვენი ქალაქების განვითარება აინტერესებს.

ჩვენ ფოთში საკმაოდ ამბიციურ სიახლეებს ვგეგმავთ. განსხვავებით სხვა ქალაქებისგან, სადაც ძირითადად გენერალური გეგმები ან სივრცითი დაგეგმარების დოკუმენტები გვიმუშავია, აქ საქმე ბევრად უფრო მასშტაბურია, დაახლოებით 700 ჰექტრის დეტალურ დაგეგმარებაზე ვმუშაობთ. ეს ნიშნავს, რომ არ შემოვიფარგლებით მხოლოდ ფუნქციური ზონების განსაზღვრით არამედ რეალურად ვქმნით განაშენიანების დეტალურ გეგმას, რაც საქართველოში ასეთი მასშტაბით ჯერ არ განხორციელებულა.

პროექტი მოიცავს მრავალფეროვან მიმართულებებს: დაგეგმილია დიდი სპორტული ჰაბი მალთაყვის ტერიტორიაზე, საცხოვრებელი და ტურისტული კომპლექსები, სასტუმროები, აპარტოტელები და მნიშვნელოვანი ინფრასტრუქტურა. სანაპირო ზოლის განვითარება ერთ-ერთი მთავარი პრიორიტეტია.

ჩვენთვის მნიშვნელოვანი გაკვეთილი იყო პანდემიის პერიოდი. მაშინ დავინახეთ, რამდენად დაუცველია ქალაქი, რომელიც მხოლოდ ერთ ფუნქციაზეა დამოკიდებული. სწორედ ამიტომ, ფოთის განვითარებაში განსაკუთრებულ ყურადღებას ვუთმობთ დივერსიფიკაციას. პორტი, რა თქმა უნდა, რჩება ქალაქის მნიშვნელოვან ბირთვად, მაგრამ პარალელურად ვავითარებთ ტურიზმს, განათლებას, კულტურას და სპორტს. ვქმნით მრავალფუნქციურ, მდგრად ქალაქს. ასევე დიდი ყურადღება დავუთმეთ ურბანულ კავშირებს. ვმუშაობთ იმაზე, რომ უკეთ დავაკავშიროთ სხვადასხვა უბნები, მათ შორის კუნძულის უბანი, მალთაყვა და სხვა ტერიტორიები. ცენტრალურ ნაწილში, განსაკუთრებით სანაპიროზე, ვთავაზობთ ისეთ ინიციატივებს, როგორიცაა თევზსაჭერი და საზღვაო პორტების აღდგენა, ანუ იმ ფუნქციების დაბრუნება, რაც ფოთს ისტორიულად ჰქონდა.

ძალიან მაღალია ბიზნესის ინტერესი ამ პროექტის მიმართ. სწორედ ამიტომ, მნიშვნელოვანია თავიდან ავიცილეთ ქაოსური განვითარება განსაკუთრებით მალთაყვაში, სადაც ბევრი სახელმწიფო მიწაა. აქ დროებით შევაჩერეთ გარკვეული პროცესები, რათა ყველაფერი ერთიანი ხედვით განვითარდეს. პროექტი საკმაოდ სწრაფი ტემპებით მიმდინარეობს. აქტიურად ვმუშაობთ ყველა ჩართულ მხარესთან. ამ ეტაპზე უკვე კონცეფცია ჩაბარებულია და ვმუშაობთ საბოლოო დეტალებზე. ვფიქრობ, ზაფხულის პერიოდში პროექტს სრულად დავასრულებთ და ფოთის გენერალური გეგმაც ოფიციალურად იქნება წარმოდგენილი,“ - განაცხადა მამუკა სალუქვაძემ.

ფოთის განაშენიანების გენერალურ გეგმას ამხანაგობა „სითი სტუდია 9“ 3.2 მლნ ლარად ამზადებს. შესაბამის ხელშეკრულებას ხელი 2025 წლის დასაწყისში მოეწერა.

ხელშეკრულების შესაბამისად, კონკურსში გამარჯვებული კომპანია ერთი წლის განმავლობაში უზრუნველყოფს საპროექტო მომსახურებას, რაც გულისხმობს ფოთის გენერალური და განაშენიანების გეგმის, ასევე მალთაყვის უბნის განაშენიანების რეგულირების გეგმის რევიზიას და განახლებას.

თუმცა ჯამში, დოკუმენტაციის მომზადებისა და წარდგენის ვადა, ხელშეკრულების გაფორმებიდან 540 კალენდარულ დღეს შეადგენს.