"ქართული ოცნების" მთავრობის ეკონომიკის ყოფილი მინისტრი, გიორგი ქობულია აცხადებს, რომ თავად რომ მთავრობის გადაწყვეტილების მიმღები პირი იყო, ანაკლიის პროექტს რუსეთის, ჩინეთისა და აშშ-ს თანამონაწილეობით ააშენებდა.

BMGtv-ის გადაცემაში "ანალიტიკა" ქობულიამ თქვა, რომ სხვა დერეფნებთან შედარებით, შუა დერეფანი ნაკლებად კონკურენტუნარიანია და სახელმწიფოს მხრიდან დამატებით გარანტიებს საჭიროებს.

" მე რომ მთავრობაში ვიყო, როგორ გავაკეთებდი ანაკლიის პროექტს, მოვიყვანდი სამ ინვესტორს 25-25% წილის ფლობით, რუსეთს, ჩინეთს და აშშ-ს. ამ სამ ინვესტორს მივცემდი თანაბარ წილებს და 25%-ს ჩავდებდი მე, როგორც სახელმწიფო და გავცემდი გარანტიებს.

მე მგონია, რომ ყველა ჭკუათმყოფელი ადამიანი მოითხოვდა ამ გარანტიებს. საქმე რაშია, როცა დალაგდება ეს რუსეთი უკრაინის კონფლიქტი და როცა აღდგება რუსეთზე გამავალი ხაზები, რა თქმა უნდა ამ პროექტს შეიძლება შეექმნას ეკონომიკური პრობლემები. იმიტომ, რომ ტვირთები არ წამოვა იმდენი და ეს რისკი ცხადია არსებობს", - ამბობს ქობულია.

წამყვანის კითხვაზე, რატომ ვერ სრულდება ანაკლიის პორტის ტენდერი, მიუხედავად იმისა, რომ უპირატესი ინვესტორი გამოვლენილია, ქობულია ამბობს, რომ ამისთვის პირველ რიგში ეკონომიკური მიზეზები არსებობს.

" ანაკლიის პორტის პროექტი არის ძალიან ძვირად ღირებული ინფრასტრუქტურული პროექტი, რომელშიც ინვესტიციის მოზიდვა ზოგადად ძალიან რთულია. იმიტომ, რომ შუა დერეფნის კონკურენტუნარიანობა არ არის ისეთი მაღალი როგორიც ჩვენ გვგონია. []

ყოველთვის იყო ძალიან დიდი კითხვის ნიშნები, აქვს თუ არა საერთოდ აზრი ამ პორტს. ამის გამო, ამ პორტში ყოველთვის ჭირდა ტვირთების მოზიდვა. მეორე ფაქტორი, რაც ართულებს ინვესტიციის მოზიდვას, გეოპოლიტიკური არასტაბილურობაა", - განაცხადა ქობულიამ.

მისივე თქმით, მიუხედავად იმისა, რომ მამუკა ხაზარაძემ და კონსორციუმმა კარგი სამუშაო ჩაატარეს ინვესტორის მოსაძიებლად, საჭირო 70 მილიონი ვერ შეკრიბეს. მიუხედავად იმისა, რომ ქობულიას მტკიცებით, მათ ხელს არავინ უშლიდა.

2024 წლის მაისში მთავრობამ ჩინური სახელმწიფო კორპორაცია CCCC-ი ანაკლიის ინვესტორის შესარჩევ კონკურსში უპირატეს მონაწილედ გამოაცხადა. მაშინ ეკონომიკის მინისტრმა ლევან დავითაშვილმა თქვა, რომ CCCC ოფიციალურად გამარჯვებულად, სავარაუდოდ, რამდენიმე დღის ვადაში დასახელდებოდა, თუმცა ამ განცხადებიდან რამდენიმე თვის შემდეგაც CCCC გამარჯვებულად გამოვლენილი არაა და ის და საქართველოს მთავრობა კვლავ მოლაპარაკებებს მართავენ. პორტის კერძო ინვესტორის შერჩევის კონკურსი შარშან მაისში დასრულდა. კონკურსის ფინალურ ეტაპზე ორი კომპანია იყო გადასული, ესენია ჩინური CCCC და შვეიცარიული (TIL) Terminal Investment Limited Holding S.A, რომელიც მსოფლიოს ერთ-ერთი უმსხვილესი საზღვაო ჯგუფის MSC-ის შემადგენელი კომპანიაა. აღნიშნულ ტენდერში TIL-მა საბოლოო წინადადება არ წარადგინა, შესაბამისად ერთადერთი, რომელმაც სახელმწიფოს პროექტში ინვესტირება შესთავაზა, ჩინური სახელმწიფო კორპორაცია CCCC იყო. პროექტის მიხედვით, CCCC ანაკლიის ღრმაწყლოვანი პორტის ერთობლივი კომპანიის 49%-იანი წილის მფლობელი იქნება, ხოლო საქართველოს მთავრობა პროექტის მაჟორიტარი 51%-იანი აქციონერი იქნება.

წყარო:https://bm.ge/