,
აშშ-ის სახელმწიფო მდივანი, მარკო რუბიო თურქეთში ჩავიდა, სადაც დღეს რუსეთ-უკრაინის სამშვიდობო მოლაპარაკებები უნდა გაიმართოს. ინფორმაციას CNN-ი ავრცელებს.
ამერიკული ტელეარხის ცნობით, მისი თვითმფრინავი ანტალიაში კატარიდან ჩაფრინდა, სადაც აშშ-ის პრეზიდენტი, დონალდ ტრამპი სახელმწიფო ვიზიტით იმყოფება.
რუბიოს თურქეთში ჩასვლის თავდაპირველი მიზანი ანტალიაში ნატოს საგარეო საქმეთა მინისტრების არაფორმალურ შეხვედრაში მონაწილეობის მიღებაა, მაგრამ გამორიცხული არ არის, რომ ის სტამბოლში გასამართ რუსეთ-უკრაინის სამშვიდობო მოლაპარაკებებს დააკვირდეს.
აშშ-ის სახელმწიფო მდივანმა უკვე გამართა უკრაინის საგარეო საქმეთა მინისტრთან, ანდრეი სიბიგასთან მოლაპარაკებები, რომელიც ასევე თურქეთშია და მოლაპარაკებების დროს უკრაინული დელეგაციის შემადგენლობაში იქნება.
უკრაინის პრეზიდენტი ვოლოდიმირ ზელენსკი ევროპის პოლიტიკური გაერთიანების სამიტზე დასასწრებად სომხეთის დედაქალაქ ერევანში ჩავიდა, - ინფორმაციას უკრაინული მედია პრეზიდენტის პრესსპიკერზე სერგეი ნიკიფოროვზე დაყრდნობით ავრცელებს.
ნიკიფოროვის განცხადებით, იგეგმება უკრაინის პრეზიდენტის შეხვედრა ნორვეგიის, ფინეთის, გაერთიანებული სამეფოს და ჩეხეთის პრემიერ-მინისტრებთან.
პრეზიდენტის პრესსპიკერის თქმით, სამიტი ორდღიანია და შესაბამისად, ორმხრივი და მრავალმხრივი შეხვედრები ღონისძიების მეორე დღესაც გაგრძელდება.
