,
ბრიტანული სამაუწყებლო კომპანია „ბი-ბი-სი“ (BBC News) აქვეყნებს თავისი ჩინური სამსახურის რედაქტორის ჰოვარდ ჩანის სტატიას სათაურით „როგორ უყურებს ჩინური ელიტა ვლადიმერ პუტინს და მის ომს უკრაინაში“.
გთავაზობთ ვრცელი პუბლიკაციის შემოკლებულ შინაარსს:
ბოლო დროს გაჩნდა იმის ნიშნები, რომ პეკინს ერთი შეხედვით შეუმჩნევლად და ფაქიზად შეაქვს კორექტივები თავი საგარეო და საშინაო პოლიტიკაში, მათ შორის რუსეთთან დამოკიდებულებაშიც.
ქვეყნის შიგნით ჩინეთის სახალხო რესპუბლიკის თავმჯდომარემ სი ძინპინმა მოულოდნელად შეაჩერა „ნულოვანი კოვიდის“ კურსის განხორციელება და შეარბილა რიტორიკა „საერთო აყვავების“ შესახებ. იმავდროულად იგი ცდილობს ბიზნესისადმი ნდობის აღდგენასაც.
საერთაშორისო არენაზეც, მიუხედავად იმისა, რომ ჩინური სახელმწიფო მასმედია უკრაინის ომს ისევ პრორუსული და ანტიდასავლური პოზიციიდან აგრძელებს, საერთაშორისო პოლიტიკის ზოგიერთი ექსპერტის აზრით, პეკინი მოსკოვს ისე მტკიცედ აღარ უჭერს მხარს, როგორც ადრე უჭერდა.
ჩინეთის ოფიციალური მასმედიის მიხედვით, ამას წინათ დანიშნულმა საგარეო საქმეთა ახალმა მინისტრმა ცინ განმა 9 იანვარს ტელეფონით ისაუბრა თავის რუს კოლეგასთან სერგეი ლავროვთან. მან ჩინეთ-რუსეთის ერთმანეთთან დამოკიდებულება შეაფასა როგორც „მიუმხრობლობის პრინციპებზე“ აგებული ურთიერთობად, არაკონფრონტაციულად და არმიმართულად მესამე მხარის წინააღმდეგ“. თუ ამ მომენტებს ვლადიმერ პუტინისა და სი ძინპინის მიერ გასული წლის თებერვალში ხელმოწერილ დეკლარაციას შევადარებთ, რომელშიც „პეკინსა და მოსკოვს შორის უსაზღვრო მეგობრობის“ პრინციპი იყო გამოხატული, საკმაოდ მნიშვნელოვან განსხვავებას შევამჩნევთ.
ბევრმა ასევე შენიშნა, რომ ჩინეთის საგარეო საქმეთა სამინისტროს პრეს-მდივანი ჯაო ლიციანი, რომელსაც მეტსახელად „მეომარ მგელს“ ეძახდნენ თავისი მკვეთრი ანტიდასავლური პოზიციის გამო, თანამდებობიდან გაათავისუფლეს.
ჩინელი პროსამთავრობო პოლიტოლოგები პრივატული საუბრების დროს ამბობენ, რომ იმედგაცრუებულები არიან და სრულიად არ ელოდნენ იმას, რომ ვლადიმერ პუტინი ასეთ აშკარა წარუმატებლობას განიცდიდა უკრაინასთან ომში. თუ გადავხედავთ ამასწინანდელ უახლოეს ისტორიას და გავიხსენებთ, თუ როგორი დამოკიდებულება ჰქონდა პეკინს სხვა რეგიონული კონფლიქტების მიმართ, ახლაც უნდა ველოდოთ, რომ ჩინეთი პრაგმატულად იმოქმედებს და მოემზადება, რომ შეარბილოს ის სავარაუდო შედეგები, რაც შეიძლება ომში რუსეთის შესაძლო დამარცხებას მოჰყვეს. პეკინს შეუძლია შუამავლობაც კი სცადოს - გარკვეულწილად საკუთარი ინტერესებიდან გამომდინარე.
მაგრამ იმავდროულად ნაკლებადსავარაუდოა, რომ ჩინეთი ღიად იტყვის უარს წლების განმავლობაში გატარებულ პოლიტიკაზე, ანუ დასავლეთის მხარეზე გადავა და ვლადიმერ პუტინს დაგმობს.
წყარო: https://www.bbc.com/russian/live/news-64082274
მოამზადა სიმონ კილაძემ
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
