ბრიტანული სამაუწყებლო კომპანიის „ბი-ბი-სი“-ს (BBC) ვებ-გვერდზე გამოქვეყნებულია სტატია სათაურით „არჩევნები, რომელიც საქართველოს ევროპულ მომავალს გადაწყვეტს“ (ავტორი - პოლ კირბი), რომელშიც განხილულია საქართველოში მიმდინარე წინასაარჩევნო კამპანიის ბოლო ეტაპის მოვლენები - როგორც მმართველი და ოპოზიციური პარტიების მიტინგები, ასევე ქვეყანაში შექმნილი სიტუაცია და მოსალოდნელი პერსპექტივა.

გთავაზობთ პუბლიკაციას მცირე შემოკლებით:

ქართველებს რუსეთთან ომების დიდი გამოცდილება აქვთ. რამდენიმე წლის წინ, სანამ რუსეთი უკრაინაში შეიჭრებოდა, 2008 წლის აგვისტოში, კრემლის არმიამ საქართველოს წინააღმდეგ ომი დაიწყო, რომელიც ხუთ დღეს გაგრძელდა. რუსეთის ჯარებმა დაბომბეს ქვეყნის მნიშვნელოვანი ქალაქი გორი და შემდეგ მისი ოკუპირება მოახდინეს. გორის ჩრდილოეთით, სოფელ შინდისის რკინიგზის სადგურთან, ქართული არმიის ქვედანაყოფებმა გააფთრებული წინააღმდეგობა გაუწიეს რუსულ სამხედრო ნაწილებს. სადგურის შენობა დაინგრა, ხოლო თვითონ რკინიგზაზე მას შემდეგ მოძრაობა შეწყვეტილია.

ამრიგად, როცა ოთხი ქართული ოპოზიციურ-პარტიული დაჯგუფება 26 ოქტომბრის საპარლამენტო არჩევნებს ევროპასა და რუსეთს შორის გადამწყვეტ არჩევანად თვლიან, ეს იმას ნიშნავს, რომ მათ მიზანს პარტია „ქართული ოცნების“ 12-წლიანი მმართველობის დასრულება წარმოადგენს - პარტიისა, რომელსაც საქართველოს რუსეთის ორბიტაზე დაბრუნებაში ადანაშაულებენ. ოპოზიციას სურს ახალი ენერგია შთაბეროს საქართველოს განაცხადს ევროკავშირში შესვლის სურვილის შესახებ, რომელიც ამჟამად ჩიხშია შესული.

„აი, ამ ქუჩებში 2008 წელს რუსი ჯარისკაცები დადიოდნენ“, - ამბობს მინდია გოდერძიშვილი, რომელიც გორში ოპოზიციური ჯგუფის „კოალიცია ცვლილებებისათვის“ წინასაარჩევნო კამპანიას ხელმძღვანელობს, - „აქაურებს რუსებთან ომის საშინელება კარგად ახსოვთ, მთავრობა კი ომისადმი ნეგატიურ დამოკიდებულებას საკუთარი ინტერესებისათვის იყენებს და გორელების ემოციაზე თამაშობს. იმიტომ, რომ „ქართულ ოცნებას“ ხელისუფლების შენარჩუნება სურს“.

თავის მხრივ, „ქართული ოცნება“ და მისი გავლენიანი დამაარსებელი, მილიარდერი ბიძინა ივანიშვილი კატეგორიულად უარყოფენ ოპოზიციის მტკიცებებს, ვითომცა 26 ოქტომბრის საპარლამენტო არჩევნები ევროპასა და რუსეთს შორის არჩევანს წარმოადგენს. „ოცნების“ წევრების თქმით, მათი პარტია მშვიდობის პარტიაა, ოპოზიციას კი, რომელსაც მხარს გამოუცნობი „გლობალური ომის პარტია“ უჭერს, საქართველოს ჩათრევა სურს რუსეთ-უკრაინის ომში.

შინდისის დაბომბილი რკინიგზის სადგურთან ახლოს 17 ქართველი გმირი ჯარისკაცია დაკრძალული, რომლებმაც გორის დაცვას სიცოცხლე შესწირეს. აქ არსებული სადემარკაციო ხაზი მიღმა სამხრეთ ოსეთი მდებარეობს, საქართველოს ერთ-ერთი სეპარატისტული რეგიონი, რომელიც ჯერ კიდევ რუსეთის ოკუპაციის ქვეშ იმყოფება.

„მე არ ვფიქრობ, რომ დღეს ვინმეს საქართველოს უსაფრთხოების დაცვისათვის გარანტიის მოცემა შეუძლია“, - ამბობს BBC-თან ინტერვიუში მაკა ბოჭორიშვილი, საქართველოს პარლამენტის ევროკავშირთან ინტეგრაციის კომიტეტის თავმჯდომარე, „ქართული ოცნების“ ახალ შტაბ-ბინაში, თბილისში, - „სამწუხაროდ, ჩვენ ნატოს წევრი არ ვართ, შესაბამისად, ალიანსის ქოლგა საფრთხისაგან არ გვიფარავს. კარგად ვიცით, თუ რა შედეგს მოგვიტანს რუსეთთან ომი. გვაქვს ამის გამოცდილება 2008 წელს“.

მაკა ბოჭორიშვილის პარტია „ქართული ოცნება“ ისევ აცხადებს, რომ გააგრზელებს ევროკავშირთან ინტეგრაციის კურსს, რომელიც 2030 წლისათვის საქართველოს ევროკავშირში მიღებას უზრუნველყოფს, მაგრამ ეს ვალდებულება დღეს ყალბ დაპირებას ჰგავს, რადგანაც ბრიუსელმა საქართველოს გაწევრიანების პროცესი შეაჩერა. ამის მიზეზი ისაა, რომ საქართველოს ხელისუფლებამ რამდენიმე ანტიდემოკრატიული კანონი მიიღო, მათ შორის „უცხოური გავლენის გამჭვირვალობის“ შესახებ, რომლის მეშვეობით არასამთავრობო ორგანიზაციებისა და მასმედიის უფლებების შეზღუდვა ხდება.

და თუ ამას კიდევ ერთ ამას წინათ მიღებულ კანონს დავამატებთ, რომელიც მიმართულია „ლგბტ-საზოგადოების“ წევრთა წინააღმდეგ, მაშინ გასაკვირი არ უნდა იყო, თუ რატომ აკრიტიკებს ევროკავშირის ელჩი პაველ ჰერჩინსკი საქართველოს მთავრობას: „დაახლოების ნაცვლად საქართველო ევროკავშირს უფრო შორდება“.

პროდასავლელი პრეზიდენტი სალომე ზურაბიშვილმა ღიად მოუწოდა ამომრჩევლებს მხარი დაუჭირონ ოპოზიციურ პარტიებს, რომლებმაც ხელი მოაწერეს მის გეგმას ქვეყნის ტექნოკრატიული მთავრობის შესახებ, რომელიც, ოპოზიციის გამარჯვების შემთხვევაში, ერთი წლის ვადით შეიქმნება.

ამ არცევნებში ყურადღება უმეტესად ბიძინა ივანიშვილისკენაა მიპყრობილი, ქვეყნის ყველაზე მდიდარ ადამიანზე, რომელმაც ქონება 1990-იან წლებში რუსეთში საქმიანობით დააგროვა და რომელიც მმართველი პარტიის ხელმძღვანელ ძალად ითვლება და მის უკან დგას. 

ბიძინა ივანიშვილი აქტიურად მონაწილეობს „ქართული ოცნების“ წინასაარჩევნო კამპანიაში და აცხადებს, რომ გამარჯვების შემდეგ ოპოზიციურ „ერთიან ნაციონალურ მოძრაობას აკრძალავს - იმის გამო, რომ პარტია დანაშაულებრივ საქმიანობას ეწეოდა 2004-2012 წლებში. „ნაციონალური მოძრაობის“ ყოფილი ლიდერი, ექს-პრეზიდენტი მიხეილ სააკაშვილი ამჯამად სასჯელს იხდის, მაგრამ „ქართულ ოცნებას“ სხვა ოპოზიციონერების დევნაც სურს - აკრძალვა შეიძლება მხოლოდ ერთი პარტიას არ შეეხოს და სხვებზეც გავრცელდეს.

თავისი მიზნების განსახორციელებლად „ოცნებას“ სურს, რომ ხმების აბსოლუტური უმრავლესობა მიიღოს, თუმცა ეს ნაკლებად სავარაუდოდ მოჩანს - საქართველოში ჩატარებული სოციოლოგიური გამოკითხვები მაინცდამაინც საიმედო არ არის. ასევე კითხვები არსებობს ფარული კენჭისყრის ნამდვილობასთან მიმართებით, მიუხედავად იმისა, რომ მთავრობამ ხმის მიცმის ელექტრონული სისტემა შემოიღო.

ბიძინა ივანიშვილი გორს წინასაარცევნო კამპანიის დროს ეწვია და ქალაქში გამართულ მიტინგზე განაცხადა, რომ მისი მთავრობა ბოდიშს მოუხდის სამხრეთ ოსეთს 2008 წლის ომის გამო. მან ომის გაჩაღებაში (ანუ ე.წ. სამხრეთ ოსეთზე თავდასხმაში) იმდროინდელი პრეზიდენტი მიხეილ სააკაშვილი დაადანაშაულა და არა რუსეთი, რომლის ავიაციამ 2008 წლის აგვისტოში გორი დაბომბა.

მილიარდერმა უფრო მეტი ძალისხმევა გამოიჩინა თბილისში, 23 ოქტომბერს გამართულ დასკვნით, სემაჯამაებელ მიტინგზე. დამცავი მინის მიღმა მყოფმა ბიძინა ივანიშვილმა თავის მომხრეებს განუცხადა, რომ „ერთიანმა ნაციონალურმა მოძრაობამ“ სახელმწიფო ღალატი ჩაიდინა. ამ ნათქვამის ლოგიკა, როგორც ჩანს, იმაში გამოიხატება, რომ ქართველი ამომრჩევლები მხარს არ დაუჭერენ არც ქვეყნის მოღალატე პარტიას და არც მის მსგავსებს.

შინდისელი ამომრჩევლისათვის - 30 წლის ალექსანდრესათვის იდეა, რომ ომი მიხეილ სააკაშვილმა დაიწყო, აბსურდულია. ბევრმა მისმა მეგობარრმა გორი მიატოვა, რადგან ქალაქში მუშაობის შესაძლებლობები არ არსებობს. ალექსანდრე თვლის, რომ უმჯობესი იქნებოდა მთავრობამ ყურადღება დაუთმოს რკინიგზის ხაზის აღდგენას და ქართველების დაცვას „მცოცავი ოკუპაციისაგან“, რომლის მიზანს რუსების მიერ დამატებითი ქართული მიწების დაკავება წარმოადგენს.

კრემლი არ მალავს, რომ არჩევნებში უპირატესობას „ქართული ოცნების“ გამარჯვებას ანიჭებს. რამდენიმე თვის წინ რუსეთის საგარეო დაზვერვის სამსახურმა აშშ საქართველოში უკრაინული სტილის რევოლუციის მომზადებაში დაადანაშაულა, „ქართული ოცნების“ მეოთხე ვადით არჩევაში ხელის შეშლის მიზნით. რუსულ დაზვერვას რაიმე მტკიცებულებები არ გამოუქვეყნებია. რა თქმა უნდა, ამერიკამ ბრალდებები უარყო.

ახლა რუსეთი თავისებურად სარგებლობს „ქართული ოცნების“ დამაარსებლის ბიძინა ივანიშვილის მიერ გაჟღერებულ ამბავს, რომლის თანახმად, ერთ-ერთ ამერიკელ ოფიციალურ პირს თითქოსდა ყოფილი პრემიერ-მინისტრისათვის ირაკლი ღარიბაშვილისათვის უთხოვია, რომ საქართველო რუსეთის წინააღმდეგ ომში „სამი-ოთხი დღით მაინც ჩართულიყო“.

„ვერავითარ მიზეზს ვერ ვხედავ, რომ ამ ინფორმაციას არ დავუჯერო“, - განაცხადა თავის მხრივ სერგეი ლავროვმა, რუსეთის საგარეო საქმეთა მინისტრმა.

გორი მცხოვრებთა მახსოვრობა მხოლოდ იმას არ ასახავს, რაც ქალაქში 2008 წელს ჩრდილოელი მეზობლის მონაწილეობით მოხდა. გორში დაიბადა ყველასათვის ცნობილი საბჭოთა ლიდერი იოსებ სტალინი და ამიტომ ქალაქში ბევრი უცხოელი ტურისტი ჩადის, რათა მისი ბავშვობისდროინდელი სახლი და მუზეუმი დაათვალიერონ. იქვე დგას იოსებ სტალინის პირადი სარკინიგზო ვაგონიც. ამასთან, მეგზურები, როცა ლაპარაკობენ საბჭოთა ლიდერის დამსახურებაზე, არაფერს არ ამბობენ იმაზე, თუ როგორ გზავნიდა სტალინი ათასობით უდანაშაულო მოქალაქეს „გულაგის“ ბანაკებში სასიკვდილოდ.

ოპოზიციური პარტიების წინასაარჩევნო კამპანიების მონაწილეეები აცხადებენ, ზოგიერთ გორელ ამომრჩეველს საბჭოთა პერიოდზე ჯერ კიდევ აქვს ნოსტალგია, თუმცა ადგილობრივ მცხოვრებთა უმეტესობა წინ იყურება.

გორში და საერთოდ, მთელი საქართველოს მასშტაბით, ფართო კონსენსუსი იმაში გამოიხატება, რომ ამომრჩეველთა აბსოლუტური უმრავლესობა თვლის - ქვეყნის მომავალი ევროკავშირშია და არა მის მიღმა. ამასთან, გაურკვეველია, თუ ვინ მისცემს საქართველოს ამის შანსს.

წყარო: https://www.bbc.com/news/articles/c0lp8wen9zgo