2025 წლის დასაწყისში თბილისში ბინების გაყიდვები და ქირის ფასი შემცირდა, ბინების ღირებულება მცირედით გაიზარდა. ამის შესახებ „თიბისი კაპიტალის“ საცხოვრებელი უძრავი ქონების ბაზრის იანვრის მიმოხილვაშია აღნიშნული.

ამასთან, იანვარში გაყიდული ბინების ღირებულება 5%-ით შემცირდა და $225 მილიონს გაუტოლდა.

„2025 წლის იანვარში, თბილისის უძრავი ქონების ბაზარზე აქტივობა შენელდა და გაყიდული ბინების რაოდენობამ 2 796 შეადგინა, რაც გასული წლის იმავე პერიოდის მაჩვენებელთან შედარებით 6%-ით ნაკლებია.

ამავე პერიოდში, გასაყიდი ფასი გასული თვის მაჩვენებელზე შენარჩუნდა და $1223 შეადგინა, რაც 2024 წლის იანვრის ღირებულებას მცირედით - 1%-თ აღემატება.

2025 წლის იანვარში, გასაქირავებელი ფასი წლიურად 12%-ით შემცირდა და $10.7 შეადგინა. საცხოვრებელი უძრავი ქონების ამონაგები 9.2%-მდე შემცირდა (-1.3 პპ, წ/წ)“, - აღნიშნულია მიმოხილვაში.

მიმოხილვის მიხედვით, იანვარში, 725 ახალი ბინა გაიყიდა, შედეგად წლიურმა ზრდის ტემპმა 13%-ს მიაღწია. რაც შეეხება ძველ ბინებს, განხორციელებული ტრანზაქციების რაოდენობა 11%-ით შემცირდა და 2 071 ბინას გაუტოლდა. შედეგად, ახალი ბინების წილი ჯამურ გაყიდვებში 26%-მდე გაიზარდა.

ახალი ბინების საშუალო გასაყიდი ფასი წლიურად 2%-ით გაიზარდა, ხოლო ძველი ბინების - 1.2%-ით. ჯამურად გაყიდული ბინების უდიდესი წილი - 43%, 50-დან 75 მ²-მდე ფართობის მქონე ბინებმა დაიკავა.

125 მ²-ზე მეტი ფართის მქონე ბინების წილი 2024 წლის დეკემბრიდან მოყოლებული უცვლელად 5%-ზე შენარჩუნდა.

„2025 წლის იანვარში, გასული წლის იმავე პერიოდთან შედარებით, გაიზარდა ჯამურ გაყიდვებში იმ ბინების წილი, რომელთა ფასი მ²-ზე აღემატება $900-ს. მაღალი საფასო სეგმენტის (>2500 $/მ²) საფასო სეგმენტის ბინების წილმა მთლიან ტრანზაქციებში 22% შეადგინა (+4პპ, წ/წ)“, - აღნიშნავენ მიმოხილვის ავტორები.