მიმდინარე წლის 8 თვის მონაცემებით, საქართველოს 14 მილიარდიან სავაჭრო ბრუნვაში ექსპორტს 29.1%-იანი წილი უკავია. საქსტატის მიერ დღეს გამოქვეყნებულ საგარეო ვაჭრობის მაჩვენებლებით, ქვეყანამ ექსპორტზე 4 მილიარდ 079 მილიონი დოლარის ღირებულების საქონელი გიტანა, რაც გასული წლის ამავე პერიოდის მაჩვენებელს 14.4%-ით აღემატება.

2023 წლის იანვარ-აგვისტოში ათი უმსხვილესი საექსპორტო პარტნიორი ქვეყნის წილმა საქართველოს მთლიან ექსპორტში 81% შეადგინა. რეიტინგის პირველ სამ ადგილს კი საქართველოს მეზობლები ინაწილებენ.

TOP-10 საექსპორტო ქვეყნის რეიტინგი:

• აზერბაიჯანი - 567.8 მლნ დოლარი, ზრდა - 34.7%;
• სომხეთი - 552.2 მლნ დოლარი, ზრდა - 82.8%;
• რუსეთი - 461.3 მლნ დოლარი, ზრდა - 15.3%;
• ყაზახეთი - 428.2 მლნ დოლარი, ზრდა - 236%;
• ყირგიზეთი - 413.8 მლნ დოლარი, ზრდა - 949%;
• თურქეთი - 299.3 მლნ დოლარი, კლება - 7.5%;
• ჩინეთი - 253.4 მლნ დოლარი, კლება - 49.6%;
• ბულგარეთი - 186 მლნ დოლარი, კლება - 35.1%;
• ესპანეთი - 72.3 მლნ დოლარი, ზრდა - 149.6%;
• უზბეკეთი - 69.4 მლნ დოლარი, ზრდა - 15.4%.

უნდა აღინიშნოს, რომ პირველ ხუთ საექსპორტო ქვეყანაში - აზერბაიჯანში, სომხეთში, რუსეთში, ყაზახეთსა და ყირგიზეთში ექსპორტი ძირითადად ამ ეტაპისთვის ქვეყნის მთავარი საექსპორტო საქონლის ავტომობილების რეექსპორტის საფუძველზეა გაზრდილი.

რაც შეეხება ჩინეთში ექსპორტის კლების ტენდენციას, ეს ძირითადად სპილენძისა და ძვირფასი ლითონების მადნების და სხვა დასახელების საქონლის შემცირებული გაყიდვებით არის განპირობებული.

რაც შეეხება საექსპორტო საქონელს იანვარ-აგვისტოში სასაქონლო ჯგუფებიდან საექსპორტო ათეულში პირველი ადგილი მსუბუქმა ავტომობილებმა 1 მილიარდ 368 მილიონი დოლარით დაიკავა, რაც მთელი ექსპორტის 33.5%-ს შეადგენს. მეორე ადგილს იკავებს სპილენძის მადნები და კონცენტრატები 411 მილიონი დოლარით, ხოლო მესამე ადგილზეა ყურძნის ნატურალური ღვინოები 169.3 მლნ დოლარით.