ბრიტანული სამაუწყებლო კომპანიის „ბიბისის“ (BBC) ვებ-გვერდზე გამოქვეყნებულია სარედაქციო ანალიტიკური მიმოხილვა სათაურით „სავაჭრო ომებში გამარჯვებულები არ იქნებიან“: როგორ რეაგირებენ დონალდ ტრამპის ახალ ტარიფებზე მსოფლიოში“.

„დონალდ ტრამპის გადაწყვეტილებამ ე.წ. „გაზრდილი ტარიფების“ შემოღების შესახებ მთელ მსოფლიოში მწვავე კრიტიკა გამოიწვია. ვაშინგტონის მიერ გამოცხადებულმა სავაჭრო ომის ნეგატიურ შედეგებისა და საპასუხო ზომების მიღების თაობაზე ლაპარაკობენ როგორც ევროპაში, ისე აზიაში. აშშ-ის ზოგიერთი ახლო მოკავშირისათვის ახალი ბაჟების დაწესება მოულოდნელი აღმოჩნდა“, - ასეთია პუბლიკაციის დედააზრი.

გთავაზობთ სტატიას მცირე შემოკლებით:

დონალდ ტრამპის ბრძანებულების თანახმად, ახალი ტარიფები გამოყენებული იქნება ყველა სახელმწიფოს მიმართ. აშშ-ის საბაზო ანუ მინიმალური საბაჟო გადასახადი იმპორტირებულ საქონელზე ამჟამად 10%-ს შეადგენს. ცალკეული სახელმწიფოების მიმართ დადგენილია ბევრად უფრო მაღალი ტარიფები: ჩინეთისათვის - 34%, ევროკავშირისათვის - 20%, იაპონიისათვის - 24%, ინდოეთისათვის კი - 26%.

საფრანგეთი: „დაზარალებულებს დავეხმარებით“

საფრანგეთის პრეზიდენტმა ემანუელ მაკრონმა თავისი ამერიკელი კოლეგისა და ნატოელი მოკავშირის ნაბიჯს „დაუნდობელი და დაუსაბუთებელი“ უწოდა და განაცხადა, რომ აშშ-ის გადაწყვეტილება სერიოზული სახით აისახება ევროპის ეკონომიკაზე. მან ელისეის სასახლეში ფრანგული ეკონომიკის იმ სექტორის წარმომადგენლები მიიღო, რომლებიც სხვებზე მეტად დაზარალდნენ აშშ-ის მიერ შემოღებული ახალი ტარიფების გამო, კერძოდ, მეღვინეობის ინდუსტრიის ბიზნესმენები და მათ სახელმწიფო სუბსიდიებით დახმარება აღუთქვა. სხვათა შორის, ბევრი მათგანი უკვე ადრეც იყო გაზრდილი ტარიფების მსხვერპლი, მაგალითად, ჩინეთისაგან. „ევროკავშირი აშშ-ში 500 მილიარდის პროდუქციის ექსპორტს ახდენს და მათგან დაახლოებით 70%-ზე ახალი ტარიფები იმოქმედებს, თუმც ეს ციფრო ჯერ კიდევ დაზასუტებელია“, - თქვა ემანუელ მაკრონმა.

საფრანგეთის მეთაურის განცხადებით, დღეს ევროკავშირის ქვეყნებისათვის ძალიან მნიშვნელოვანია ერთ გუნდად გამოსვლა ამერიკული ტარიფებისაგან თავის დასაცავად. ემანუელ მაკრონმა ხაზი გაუსვა, რომ ევროკავშირის ძალა ევროპულ ბაზარშია, რომელიც 450 მილიონ მომხმარებელს ითვლის და ეს ბევრად უფრო დიდია, ვიდრე ამერიკული ბაზარი.

პრეზიდენტმა ასევე მოუწოდა ფრანგ ბიზნესმენებს შეაჩერონ ფრანგული ინვესტიციების ჩადება აშშ-ის ეკონომიკაში მანამ, სანამ არ იქნება შემუშავებული მომდევნო გადაწყვეტილებები ახალ პირობებში.

ევროკავშირი: „ვაფრთხილებთ დონალდ ტრამპს...“

როგორც ევროპის კომისიის თავმჯდომარემ ურსულა ფონ დერ ლაიენმა განაცხადა, აშშ-ის პრეზიდენტის გადაწყვეტილება „მსოფლიო ეკონომიკისადმი მიყენებულ სერიოზულ დარტყმას წარმოადგენს. მისი შედეგი საშინელება იქნება მილიონობით ადამიანისათვის მთელ მსოფლიოში, - აღნიშნა მან „ევროკავშირი - ცენტრალური აზიის“ სამიტზე გამოსვლისას, უზბეკეთის ქალაქ სამარყანდში.

ევროკომისიის ხელმძღვანელმა დონალდ ტრამპი გააფრთხილა, რომ ევროპა საპასუხო ზომებს მიიღებს, თუ ვაშინგტონი ბრიუსელთან მოლაპარაკებას არ მოისურვებს.

„ჩვენ უკვე ვამთავრებთ მუშაობას კონტრზომების პირველ პაკეტზე, რომელიც ევროპულ ფოლადზე აშშ-ის მიერ დაწესებულ ახალ ტარიფებს ეხება. ახლა კი ვემზადებით შემდგომი კონტრზომების მისაღებად - ჩვენი ინტერესებისა და ჩვენი ბიზნესის დასაცავად - იმ შემთხვევისათვის, თუ მოლაპარაკება ჩაიშლება ან საერთოდ არ გაიმართება“, - თქვა ურსულა ფონ დერ ლაიენმა.

ირლანდიის ვიცე-პრემიერმა საიმონ ჰარისმა განაცხადა, რომ „ევროკავშირმა სიმშვიდე უნდა შეინარჩუნოს და პასუხი აწონილ-დაწონილად უნდა გასცეს“, თან დაამატა, რომ „ირლანდია მზადაა გადაწყვეტილების ძიებისათვის აშშ-სთან მოლაპარაკების საფუძველზე“.

იტალიის პრემიერ-მინისტრმა ჯორჯა მელონიმ - იგი ერთადერთი ევროპელი ლიდერია, რომელიც იანვარში დონალდ ტრამპის ინაუგურაციას დაესწრო ვაშინგტონში - განაცხადა, რომ თეთრი სახლის გადაწყვეტილება ტარიფების ზრდის თაობაზე „არასწორი ნაბიჯია“ და  იტალიელებს აღუთქვა, რომ ყველაფერს გააკეთებს, რათა ამერიკასთან შეთანხმებას მიაღწიოს და სავაჭრო ომი თავიდან აიცილოს“.

„ჩვენ არ გვსურს სავაჭრო ბარიერების ზრდა. ჩვენ არ გვსურს სავაჭრო ომი, რომელიც ჩვენს ხალხს გააღარიბებს, მსოფლიოში კი სამომავლოდ სახიფათო დაძაბულობას შექმნის“, - განაცხადა შვედეთის პრემიერ-მინისტრმა ულფ ქრისტერსონმა.

პეკინი: „სავაჭრო-სატარიფო ომებში გამარჯვებულები არ არსებობენ“

ჩინეთის ვაჭრობის სამინისტრომ გამოქვეყნა განცხადება, რომელშიც დაგმობილია აშშ-ის პრეზიდენტის მიერ მიღებული გადაწყვეტილება და გამოხატულია მუქარა, რომ პეკინი აუცილებლად მიიღებს საპასუხო მკაცრ ზომებს თავისი უფლებებისა და ინტერესების დასაცავად.

„სავაჭრო და სატარიფო ომებში გამარჯვებულები არ არსებობენ, პროტექციონიზმი კი გამოსავალი არ არის“, - ხაზგასმულია დოკუმენტში, - ამერიკამ უნდა გამოასწოროს თავისი სეცდომა და სავაჭრო დავები ყველა ქვეყანასთან, მათ შორის ჩინეთთანაც, კონსულტაციების გზით უნდა გადაწყვიტოს - თანასწორობის, ურთერთპატივისცემისა და ურთიერთსარგებელის საფუძველზე“.

იაპონია: „რა დავაშავეთ?“

იაპონიის პრემიერ-მინისტრის სიგერუ ისიბას განცხადებით, ტოკიო უკიდურესად იმედგაცრუებულია იმით, რომ ამერიკამ იაპონია „დასასჯელთა სიაში მოაქცია“. „ტარიფების ზრდა ნეგატიურ გავლენას მოახდენს ორმხრივ ეკონომიკურ კავშირებზე, მსოფლიო ეკონომიკაზე და მრავალმხრივ სავაჭრო სისტემაზე“.

სიგერუ ისიბამ იაპონელ ბიზნესმენებს აღუთქვა, რომ იპოვის დროსა და შესაძლებლობას, რათა პირადად სთხოვოს დონალდ ტრამპს მიღებული გადაწყვეტილების გადახედვა.

სამხრეთ კორეა: „შესაძლოა გლობალური სავაჭრო ომის დაიწყოს...“

„რამდენადაც სიტუაცია ძალიან სერიოზული ხდება - არის ნიშნები იმისა, რომ შეიძლება გლობალური სავაჭრო ომი დაიწყოს, სამხრეთ კორეის რესპუბლიკის მთავრობა მის ხელთ არსებულ ყველა შესაძლებლობას გამოიყენებს სავაჭრო კრიზისის ნეგატიური შედეგების გადასალახავად“, - განაცხადა სამხრეთ კორეის პრეზიდენტის მოვალეობის შემსრულებელმა ხან დოკ სუმ.

მთავრობამ განკარგულება გასცა ექსტრენული ზომების მისაღებად დაზარალებული კომპანიების დახმარების მიზნით, რომელშიც კორეული საავტომობილო ფირმებიც შედიან, - აღნიშნულია ქვეყნის მრეწველობის სამინისტროს მიერ გამოქვეყნებულ ცნობაში.

ავსტრალია: „დონალდ, შენ მეგობრები გყავს?“

„მეგობრები ასე არ იქცევიან“, - ასეთნაირად შეაფასა დონალდ ტრამპის გადაწყვეტილება საბაჟო ტარიფების გაზრდის თაობაზე ენტონი ალბანეზემ, ავსტრალიის პრემიერ-მინისტრმა.

„თეთრი სახლის ადმინისტრაციის მიერ დადგენილი და ტრამპის მიერ გაჟღერებული ტარიფები არანაირი ლოგიკით არ აიხსნება და აბსოლუტურად ეწინააღმდეგება პარტნიორობის საფუძვლებს ჩვენს ქვეყნებს შორის“, - ღრმა სინანულით აღნიშნა პრემიერ-მინისტრმა და მოსახლეობას აღუთქვა, რომ მთავრობა ქვეყნის ეკონომიკის დასაცავად ქმედით ზომებს მიიღებს.

კანადა: „აშშ ჩვენი მეზობელია, მაგრამ...’

კანადის პრემიერ-მინისტრის მარკ კარნის თქმით, „მართალია, აშშ ჩვენი მეზობელია, მაგრამ იძულებულნი ვართ არაკეთილმოსურნე მეზობელს მისივე მეთოდებით ვუპასუხოთ“. 

მთავრობის მეთაურმა აღნიშნა, რომ ოტავა იმოქმედებს მიზანმიმართულად და თავისი ეკონომიკური ძალის გამოყენებით“.

ისრაელი: „ამას ნამდვილად არ ველოდით“

ისრაელმა, რომელმაც ამას წინათ ყველა თავისი საბაჟო გადასახადი გააუქმა ამერიკული პროდუქციის იმპორტზე, „შოკშია ჩავარდნილი“ „დასჯილთა სიაში“ მოხვედრითა და მის წინააღმდეგ 17%-იანი ტარიფის დაწესებით, - წერს ისრაელის მასმედია.

„ჩვენ დარწმუნებულნი ვიყავით, რომ ამერიკა ლმობიერებას გამოიჩენდა ისრაელის მიმართ, რომელმაც საერთოდ გააუქმა ტარიფები ამერიკულ იმპორტზე, მაგრამ შევცდით“, - ციტირებს ისრაელის პრესა ერთ-ერთი სამტავრობო მაღალჩინოსნის ნათქვამს.

„კრემლი დასჯილთა სიაში არ ჩანს“

სადაა რუსეთი? არც დონალდ ტრამპის სიაში და არც თეთრი სახლის მიერ გამოქვეყნებული დამატებით მასალებში  იმპორტულ პროდუქციაზე ტარიფების ზრდასთან დაკავშირებით რუსეთი არ ფიგურირებს.

როგორც თეთრი სახლის პრეს-მდივანმა ქეროლაინ ლევითმა განაცხადა ერთ-ერთი გამოცემის - Axios-ის ჟურნალისტის კითხვაზე, რუსეთი სიაში იმიტომ არ არის, რომ ამერიკას შემოღებული აქვს მკაცრი ანტირუსული სანქციები, რაც რუსეთთან ვაჭრობას გამორიცხავს.

პრეს-მდივნის თქმით, სიაში არ იქნა შეტანილი კუბა, ბელარუსი და ჩრდილოეთ კორეა, რომელთა მიმართაც ასევე ძალიან ხისტი სანქციებია დაწესებული და სავაჭრო ემბარგო  მოქმედებს.

წყარო: https://www.bbc.com/russian/articles/cm2ez0v9d7lo