ამერიკულმა ტექნოლოგიურმა გიგანტმა, Nvidia-მ მორიგი რეკორდი დაამყარა - მისი აქციების შეფასება ერთ თვეში დამატებით 13%-ით გაიზარდა და კომპანიის საბაზრო კაპიტალიზაციამ 3 ტრილიონ 890 მილიარდი დოლარი შეადგინა, ამ მაჩვენებლით ის მსოფლიოში პირველ ადგილს იკავებს, ანუ ჯენსენ ჰუანგის მიერ დაფუძნებული კომპანია ახლა უკვე Microsoft-ს, Apple-სა და Amazon-ს უსწრებს.
5-წლიან პერიოდში Nvidia-ს თითქმის 1,600%-იანი ზრდა აქვს, რაც მსოფლიოში დაფიქსირებული საუკეთესო შედეგია და ამ დრამატული ზრდის განმაპირობებელი მთავარი მიზეზი ბაზარზე ხელოვნური ინტელექტის გამოჩენაა, რომელიც, თავისი არსით, საუკუნის ყველაზე მნიშვნელოვანი ინოვაციაა.
AI-ის განვითარების მიმართულებით Nvidia-ს უდიდესი როლის აქვს, რადგან პლანეტის ყველა მსხვილი AI-მოდელი და Data-ცენტრი ამჟამად Nvidia-ს ფიზიკურ ინფრასტრუქტურას ეფუძნება და შეიძლება ითქვას, რომ კომპანიას AI-პროცესორების წარმოების ბაზარზე ფაქტობრივი მონოპოლია აქვს.
ბოლო პერიოდში Nvidia-ს აღმასვლა ინვესტორების განწყობის გაუმჯობესებასთან და იმ მოლოდინის გაჩენასთანაა დაკავშირებული, რომ ტრამპის მიერ წამოწყებულ სავაჭრო-სატარიფო ომს ისეთი ნეგატიური გავლენა არ ექნება ამერიკულ ტექნოლოგიურ გიგანტებზე, როგორსაც ამას ანალიტიკოსები თავდაპირველად პროგნოზირებდნენ.
ამასთან, გასათვალისწინებელია, რომ Nvidia კრიტიკული ტექნოლოგიის მწარმოებელი მონოპოლისტია, ანუ მისი პროდუქციის ჩანაცვლება კონკურენტებით დღეს თითქმის შეუძლებელია და სატარიფო დანაკლისის ამოვსება კომპანიას ფასების გაზრდით შეუძლია, რომელთან მიმართებით მომხმარებლებს პრეტენზიები ვერ ექნებათ, რადგან, როგორც უკვე აღვნიშნეთ, Nvidia-ს კონკურენტი არ ჰყავს, ანუ მისი პროდუქტი ის ეღირება, რაც ჯენსენ ჰუანგის გუნდს მოესურვება.
ყველანაირი ფინანსური და ეკონომიკური პარამეტრით, Nvidia ზეეფექტიანი კომპანიაა, რომლის შედარება სხვა კომპანიებთან თითქმის შეუძლებელია, ამიტომაც ის რეიტინგში ამჟამად პირველ ადგილს იკავებს და მასზე ინვესტორები დიდ იმედებს ამყარებენ.
უშუალოდ ჰუანგს რაც შეეხება, ის $135 მილიარდის ქონებას ფლობს და პლანეტის უმდიდრესი მეწარმეების რეიტინგში მე-11 ადგილს იკავებს. თუკი მის განცხადებას დავუჯერებთ, ის 24/7-ზე მუშაობს და ცდილობს ისეთი მომავალი შექმნას, სადაც ყველაფრის მამოძრავებელი ძალა AI იქნება, ასეთი მომავალი კი Nvidia-ს კოლოსალურ ფინანსურ სარგებელს მოუტანს.
წყარო:https://bm.ge/
