,
საქართველოს ეროვნული ბანკის ფინანსური სტაბილურობის დეპარტამენტის ხელმძღვანელის დავით უტიაშვილის განცხადებით, დეველოპერული სექტორის წარმომადგენლებთან კომუნიკაცია მუდმივ რეჟიმში მიმდინარეობს, თუმცა ამ ეტაპზე იპოთეკური სესხების გამარტივების მხრივ ხელშესახები ცვლილება არ იგეგმება.
„სექტორთან შეხვედრები რეგულარულად იმართება. ჩვენ მუდმივად ვცდილობთ მოვისმინოთ მათი პრობლემები და გავიგოთ, ხომ არ არსებობს რაიმე რეგულაცია, რომელიც ზღუდავთ. ცხადია, ასეთი დისკუსიები მუდმივად მიმდინარეობს — ცალკეული ინიციატივები შეიძლება განხილულ იქნეს, თუმცა ამ ეტაპზე რაიმე ისეთი მსხვილი ცვლილება, რომელიც ბაზრის მატერიალურ გარემოს შეცვლიდა, ჯერ არ ჩანს.
სესხების ზრდა წლიურად 20-25%-ს აღწევს, რაც საკმაოდ მაღალი მაჩვენებელია და სექტორების უმეტესობის ზრდის ტემპს აღემატება. ამიტომ ამჟამად ვერ ვხედავთ ისეთ პრობლემებს, რომლებიც ეროვნულ ბანკს განსაკუთრებულ ჩარევას მოითხოვდა.
რა თქმა უნდა, მცირე საკითხები ან შეზღუდვები, რომლებიც შეიძლება გამოვლინდეს ამ დისკუსიების ფარგლებში, ეროვნული ბანკი მზად არის მოისმინოს და ხელი შეუწყოს სექტორის განვითარებას.
დეველოპერული სექტორი ჩვენი ეკონომიკის ერთ-ერთი მნიშვნელოვანი კონტრიბუტორი და მსხვილი დამსაქმებელია, ამიტომ არავის ინტერესშია, რომ მათ ბარიერები შეექმნათ. თუმცა ბარიერების მოხსნის მიღმა, მატერიალური ცვლილებების განხორციელება ეროვნული ბანკის კომპეტენციაში არ შედის.“ - განაცხადა გადაცემა „უძრავი ქონების პროსპექტში“ სტუმრობისას უტიაშვილმა.
ეროვნულ ბანკთან კომუნიკაციაზე bmg-თან გასულ კვირას „თეთრი კვადრატის“ მმართველმა პარტნიორმა ირაკლი ბურდილაძემ ისაუბრა. მისი თქმით, “პოზიტიური მსჯელობა მიმდინარეობს ეროვნულ ბანკთან, რომ ხელი შეეწყოს იპოთეკურ დაკრედიტებას.”
წყარო:https://bm.ge/
ქვეყნის მასშტაბით, სეზონური გრიპის საწინააღმდეგო ვაქცინაცია დაიწყო - აცრა, ყველა მოქალაქისთვის, უფასოდ იქნება ხელმისაწვდომი.
ჯანდაცვის სამინისტროს ცნობით, იმუნიზაციის სახელმწიფო პროგრამის ფარგლებში, საქართველომ, 200 000 დოზა ფრანგული წარმოების, ოთხკომპონენტიანი, (SANOFI WINTHROP INDUSTRIE-ის VaxigripTetra™) სეზონური გრიპის საწინააღმდეგო ვაქცინა შეიძინა, რომელიც ერთ-ერთია ჯანმოს მიერ რეკომენდებულ ვაქცინებს შორის.
„ვაქცინა მორგებულია იმ შტამებზე, რომელთა ცირკულაცია მოსალოდნელია გრიპის სეზონზე.
განსაკუთრებით მნიშვნელოვანია ვაქცინაცია მაღალი რისკის / ქრონიკული დაავადების მქონე პირებისთვის, რადგან ზოგიერთი ადამიანისთვის გრიპი შესაძლოა სახიფათო დაავადებად იქცეს.
აცრა ვაქცინაციის სერვისის მიმწოდებელ სამედიცინო დაწესებულებებსა და პოლიკლინიკებში 6 თვის ასაკიდანაა შესაძლებელი და ბენეფიციარებისთვის სრულად უფასოა”,- აღნიშნულია ინფორმაციაში.
დაწესებულებები იხილეთ ბმულზე: https://ncdc.ge/#/pages/file/87a090e3-e8de-4d08-adaf-aaf0cb8b7128
