Twitter-მა აშშ-ის პრეზიდენტის ვაჟს, დონალდ ტრამპ-უმცროსს სოციალური ქსელის ანგარიშზე წვდომა 12 საათით შეუზღუდა კორონავირუსის დეზინფორმაციის შესახებ წესების დარღვევის გამო.
ამ პერიოდის განმავლობაში დონალდ ტრამპის ვაჟი ვერ შეძლებს „ტვიტების“ გამოქვეყნებასა და გაზიარებას.
აღსანიშნავია, რომ დონალდ ტრამპის ვაჟმა Twitter-ის გვერდზე ვიდეო გააზიარა, რომელშიც ექიმი კორონავირუსისგან განკურნების შესახებ მცდარ განცხადებებს აკეთებდა და ამბობდა, რომ ვირუსის გავრცელების შესაკავებლად პირბადის ტარება საჭირო არ არის.
მოგვიანებით სოციალური ქსელის პლატფორმიდან Twitter-ის ადმინისტრაციამ აღნიშნული ვიდეო წაშალა.
როგორც Twitter-ში განმარტავენ, უმცროსი ტრამპის ვიდეოს გაზიარებით Covid-19-ის შესახებ არასწორი ინფორმაციის გავრცელების საწინააღმდეგო რეგულაციები დაირღვა. აკრძალვის პერიოდში დონალდ ტრამპ უმცროსი კვლავ შეძლებს Twitter-ის მონახულებას და პირადი შეტყობინებების გაგზავნას, თუმცა მთელი რიგი ფუნქციების, მათ შორის პოსტების გამოქვეყნება მას 12 საათის განმავლობაში ექნება შეზღუდული.
„ჩვენ ვახორციელებთ იმ ქმედებებს, რაც ჩვენი რეგულაციებით არის გაწერილი“, - განუცხადეს BBC-ს Twitter-ში.
როგორც დონალდ ტრამპ უმცროსის პრესსამსახურში აცხადებენ, Twitter-ის გადაწყვეტილება „ყოველგვარ საზღვარს გასცდა“ და ეს კიდევ ერთი დასტურია იმისა, რომ მსხვილი ტექნოლოგიური კომპანიები მიზნად ისახავენ „ონლაინ სივრცეში გამოხატვის თავისუფლება მოკლან“, ისევე, როგორც „რესპუბლიკელების“ ხმის ჩახშობით, არჩევნებში ერევიან“.
როგორც BBC წერს, მიუხედავად იმისა, რომ სამედიცინო კვლევები საწინააღმდეგოს მეტყველებენ, საზოგადოების ნაწილი, მათ შორის პრეზიდენტი დონალდ ტრამპი ფიქრობს, რომ ამ წამალს კორონავირუსის მიმართ პრევენციული თვისება აქვს. წამყვანმა სოციალურმა მედიაკომპანიებმა სხვადასხვა ზომები მიიღეს, რათა საკუთარ პლატფორმებზე კორონავირუსის შესახებ არასწორი ინფორმაციის გავრცელება აღკვეთონ.