უნგრეთის მთავრობამ გამოსცა განკარგულება, რომლის მიხედვითაც „ჰომოსექსუალიზმის პროპაგანდის შემცველი წიგნები“ დახურულ შეფუთვაში უნდა გაიყიდოს. ამის შესახებ სააგენტო Reuters-ი წერს.

შეზღუდვა ასევე შეეხო წიგნებს, რომლებიც „სქესის შეცვლის პროპაგანდას შეიცავს“. ასეთი წიგნები ცალკე, ეკლესიებისგან და სკოლებისგან 200 მეტრის მოშორებით უნდა გაიყიდოს.

15 ივნისს უნგრეთის პარლამენტმა კანონი მიიღო, რომელიც სკოლებსა და საბავშვო ტელეარხებში LGBT მასალებს კრძალავს. ახალი კანონის მიხედვით, სასკოლო სახელმძღვანელოებსა და საბავშვო ტელეარხებში აიკრძალება ისეთი სიტყვების გამოყენება, როგორიცაა LGBT თემი, სექსუალური უმცირესობა და ა.შ.

7 ივლისს ევროკომისიის პრეზიდენტმა, ურსულა ფონ დერ ლაიენმა უნგრეთის ხელისუფლებას ანტი-ლგბტ კანონის გაუქმებისკენ მოუწოდა და აღნიშნა, რომ უნგრეთი ევროკავშირის კანონმდებლობის სრული ძალის წინაშე აღმოჩნდება, თუ უკან არ დაიხევს.