,
“ტვიტერის”დამფუძნებელს, ჯეკ დორსი მიიჩნევს, რომ სოციალური ქსელის ადმინისტრაციის მიერ აშშ-ის პრეზიდენტის ანგარიშის დაბლოკვა სწორი გადაწყვეტილება იყო, თუმცა, მეორე მხრივ, ის საშიშ პრეცედენტს ქმნის.
დორსის განცხადებით, “ტვიტერის” ადმინისტრაცია უჩვეულო გარემოებების წინაშე აღმოჩნდა, რამაც აიძულა, მთლიანად ორიენტირებულიყო საზოგადოების უსაფრთხოებაზე.
“მე არ ვზეიმობ და არ ვგრძნობ სიამაყეს დონალდ ტრამპის ანგარიშის დაბლოკვის გამო; არც იმის გამო, რამაც აქამდე მოგვიყვანა… მკაფიო გაფრთხილების შემდეგ, ჩვენ ვიმოქმედეთ და გადაწყვეტილება მივიღეთ ჩვენს ხელთ არსებული ინფორმაციის მიხედვით, რომელიც ეფუძნებოდა საფრთხეებსა და ფიზიკურ უსაფრთხოებას როგორც “ტვიტერზე”, ისე მის გარეთ”, – წერს ის “ტვიტერზე”.
ჯეკ დორსი ხაზს უსვამს, რომ საკმაოდ რეალურია “ტვიტერზე” გახმიანებული გზავნილების გამო საფრთხეების წარმოქმნის შესაძლობლობა სოციალური ქსელის გარეთ და სწორედ აღნიშნულის აღკვეთას ემსახურება მიკრობლოგის განაწესი.
მეორე მხრივ, “ტვიტერის” დამფუძნებელი საუბრობს გადაწყვეტილების უარყოფით მხარეებზე.
“მსგავსი ქმედებები[მომხმარებლების დაბლოკვა და სხვა] საზოგადოებრივი დისკურსის ფრაგმენტაციას [იწვევს]. ისინი ჩვენ გვყოფენ; ზღუდავენ თავისუფლების, ახსნისა და სწავლის შესაძლებლობას, ქმნიან პრეცედენტს, რომელიც, ჩემი აზრით, ძალიან დიდ საფრთხეს ატარებს: ძალაუფლებას, რომელიც კორპორაციას ან კერძო პირს აქვს გლობალური საჯარო დისკუსიის ნაწილზე”, – დასძენს დორსი.
მისი განცხადებით, მსგავსი გადაწყვეტილებების მიღებისას არსებობს ნათელი და აშკარა გამონაკლისები, თუმცა, მეორე მხრივ, ფიქრობს, რომ ანგარიშის დაბლოკვა, ეს არის “ტვიტერის” მარცხი ჯანსაღი დისკუსიის ხელშეწყობის კუთხით.
“ტვიტერის” ადმინისტრაციამ დონალდ ტრამპის ანგარიში გასულ კვირას სამუდამოდ დაბლოკა. გადაწყვეტილება კომპანიამ მას შემდეგ მიიღო, რაც ტრამპის მომხრეები კაპიტოლიუმის შენობაში შეიჭრნენ იმ სხდომის ჩასაშლელად, რომელზეც საპრეზიდენტო არჩევნებში ჯო ბაიდენის გამარჯვება ოფიციალურად უნდა დაემოწმებინათ.
ამ დღეს მომხდარ დაპირისპირებებს 5 ადამიანი ემსხვერპლა. მოვლენების პარალელურად, ტრამპი “ტვიტერზე” აქტიურად ავრცელებდა განცხადებებს. ის, ერთი მხრივ, მოუწოდებდა მომხრეებს, სახლებში წასულიყვნენ, მეორე მხრივ კი, „დიდ პატრიოტებს“ უწოდებდა მათ.
13 იანვარს აშშ-ის კონგრესის წარმომადგენელთა პალატამ დონალდ ტრამპს, პრეზიდენტობის ვადის დასრულებამდე ერთი კვირით ადრე, “აჯანყების წახალისებისთვის” იმპიჩმენტი გამოუცხადა. პროცედურას მხარი, დემოკრატებთან ერთად, 10-მა რესპუბლიკელმაც დაუჭირა.
ახლა პროცესში უნდა გაგრძელდეს სენატში, რომელიც წყვეტს, დარჩება თუ არა პრეზიდენტი თანამდებობაზე. ტრამპის იმპიჩმენტისთვის სენატორთა 2/3-ის, ანუ 66 სენატორის თანხმობაა საჭირო.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
