,
თუ აბუ-დაბის რეისი არ აღდგა, ფასები დრამატულად შემცირდება, ვიდრე ხარჯების გასტუმრებას შევძლებთ, – ამის შესახებ ტურისტული კომპანია Travel To Georgia-ს დამფუძნებელმა, ლაშა ბერეკაშვილმა BM.GE-სთან ინტერვიუში განაცხადა.
მისი თქმით, კომპანიის ზაფხულის დატვირთვის დაახლოებით 30% ყურის ქვეყნებიდან ჩამოსულ ტურისტებზე მოდიოდა, რომლებიც ძირითადად აბუ-დაბის რეისით ჩამოდიოდნენ. ზამთრის სეზონზე კი ყურის ქვეყნებიდან ჩამოსული ვიზიტორები განსაკუთრებით მნიშვნელოვანია, რადგან მათზე მოდიოდა დატვირთვის დაახლოებით 70%.
„თუ არ გაიყიდება საკმარისი ოთახები და არ დაიჯავშნება ტურები, ფასების დაწევის მეტი რესურსი აღარ გვაქვს. ასეთ შემთხვევაში, ფასები იმდენად შემცირდება, სანამ ხარჯების გასტუმრებას შევძლებთ. როცა ამასაც ვეღარ მოვახერხებთ – ობიექტები გაკოტრდება და უბრალოდ დაიხურება“, – აღნიშნა ბერეკაშვილმა.
მისივე თქმით, გავრცელებული აზრი, რომ ტურისტების კლება მომსახურების ხარისხის გაუარესებამ გამოიწვია, არ შეესაბამება რეალობას. „თუ შევადარებთ booking.com-ის, Tripadvisor-ისა და Airbnb-ის რეიტინგებს, ვნახავთ, რომ ობიექტების შეფასებები იგივე დარჩა, რაც მაშინ, როცა დატვირთვა მაღალი იყო. ეს ნიშნავს, რომ პრობლემა ხარისხში კი არა, ტურისტული ნაკადების შემცირებაშია“, – ამბობს ბერეკაშვილი.
ბერეკაშვილის ინფორმაციით, ფასების კორექტირება უკვე დაწყებულია. სასტუმროებში ნომრების ღირებულება 160 ლარიდან 130 ლარამდე შემცირდა, ხოლო ტურების ფასი 400–450 დოლარიდან 300 დოლარამდე ჩამოვიდა.
წყარო:https://bm.ge/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
