ამერიკის შეერთებულ შტატებში ისტორიაში ერთ-ერთი უმსხვილესი ინფრასტრუქტურული პროექტი იწყება.

მსოფლიოს წამყვანი ტექნოლოგიური კომპანიების, OpenAI-ის, Oracle-ის და SoftBank-ის მესვეურები დონალდ ტრამპის ვაშინგტონის რეზიდენციაში შეიკრიბნენ, სადაც პრეზიდენტმა Stargate-ის სახელით ცნობილი მეგაპროექტი წარადგინა, რომლის საინვესტიციო ღირებულება ნახევარი ტრილიონი დოლარი იქნება.

პროექტი, რომელშიც ზემოხსენებული კომპანიები თანაბარი პარტნიორები იქნებიან, ანუ 33%-იან წილს დასჯერდებიან, OpenAI-ისთვის ამერიკის შეერთებული შტატებში ახალი AI-ინფრასტრუქტურის მშენებლობას ითვალისწინებს.

როგორც ირკვევა, სემ ოლტმენის, ლარი ელისონის და მასაიოში სონის გარდა, ტეხასის შტატში მიმდინარე მშენებლობაში ჩართული იქნება, როგორც Microsoft-ი, ასევე Arm-ი და NVIDIA — თითოეული მათგანი კი, დატაცენტრების კომპლექსს საკუთარ ნოუჰაუს შესძენს. Oracle-ის დამფუძნებლის და პლანეტის ერთ-ერთი უმდიდრესი ადამიანის, ლარი ელისონის თქმით, ათი დატაცენტრის მშენებლობა უკვე დაიწყო, მაგრამ კომპანიები აქ არ ჩერდებიან და მომდევნო წლებში, დატაცენტრებს ქვეყნის სხვა შტატებშიც ააშენებენ, რითაც, წესით და რიგით, ამერიკის შეერთებულ შტატებში 100,000-ზე მეტი სამუშაო ადგილი უნდა შეიქმნას.

დღეს, ამ თემაზე თავად პრეზიდენტმაც ისაუბრა. დონალდ ტრამპის შეფასებით, ამ ინვესტიციის მთავარი მიზანი კრიტიკულ ტექნოლოგიად მიჩნეული ხელოვნური ინტელექტის ამერიკის ხელში განვითარებაა, რადგან ამ მხრივ, ბოლო წლებში, ჩინეთიც დომინირებს. პრეზიდენტის თქმით, AI-ის განვითარება მისთვის იმდენად პრიორიტეტულია, რომ მომდევნო ოთხი წლის განმავლობაში ძალას არ დაიშურებს, რომ ქვეყანაში რაც შეიძლება მეტი დატაცენტრი აშენდეს. ამ თემაზე, სხვათა შორის, OpenAI-ის დამფუძნებელმა სემ ოლტმენმაც ისაუბრა, რომელმაც თქვა, რომ პროექტი მხოლოდ იმიტომ შედგა, რომ არჩევნებში დონალდ ტრამპმა გაიმარჯვა.

მნიშვნელოვანია ითქვას, რომ დატაცენტრების სექტორის განვითარება პირდაპირ კავშირშია სამყაროს ტექნოლოგიურ განვითარებასთან, რადგან ფაქტობრივად ნებისმიერი მოწყობილობა, რომელსაც დღეს ვიყენებთ, ქლაუდთან არის დაკავშირებული, ხოლო მონაცემებს, რომლებიც ციფრულად ქლაუდში ინახება, ფიზიკურად — დატაცენტრებში ვხვედებით. ამასთან, სწორედ დატაცენტრებში ხდება ხელოვნური ინტელექტის დასწავლა, ანუ რაც უფრო მეტი მძლავრი დატაცენტრი ექნება ამა თუ იმ კომპანიას, მით უფრო მძლავრი მოდელის შექმნას შეძლებს ის, რაც, ცხადია, როგორც წესი, დადებითად აისახება, როგორც შემოსავალზე, ასევე მოგებაზე.