ვაშლიჯვარში, არზაყან ემხვარის N9-ში არსებული მრავალბიანიანი კორპუსიდან საბურთალოს რაიონის გამგეობამ მყისიერად განახორციელა ევაკუცია და მოსახლეობის უსაფრთხოების მიზნით, დროებით საცხოვრებელში მათი გადაიყვანა უზრუნველყო.
აღნიშნული კორპუსის უსაფრთხოება დედაქალაქის მერიას არ დაუდასტურებია და ის ამ დრომდე ექსპლუატაციაში არ არის ჩაბარებული.
საბურთალოს რაიონის გამგეობამ პირველივე დღეს დაჩქარებული წესით შეუკვეთა ექსპერტიზა. ლევან სამხარაულის სახელობის სასამართლო ექსპერტიზის ეროვნული ბიუროს დასკვნამ დაადასტურა ეჭვი კორპუსის ავარიულობასთან დაკავშირებით. დასკვნაში ხაზგასმულია, რომ შენობაში მოსახლეობის ცხოვრება იკრძალება.
თბილისის მუნიციპალური ინსპექციის მიერ გაიცა რამდენიმე რეკომენდაცია სამშენებლო კომპანიის მიმართ. იმ დრომდე, ვიდრე ყველა რეკომედაცია არ შესრულდება, მოსახლეობა იქნება ქირით გაყვანილი.
აღნიშნული შენობის გარე პერიმეტრი ლენტებით შემოისაზღვრა. კორპუსის უსაფრთხოების მიზნით, მოხდა ყველა კომუნიკაციის გათიშვა.
საბურთალოს რაიონის გამგებელ გიზო ვასაძეს აქვს ინტენსიური კომუნიკაცია მოსახლეობასთან და ყოველდღიურად აწვდის მათ ინფორმაციას არსებული სიტუაციის შესახებ.
