ფღეს თბილისის მუნიციპალიტეტის მთავრობის სხდომა გაიმართა, რომელსაც ქალაქის მერი კახა კალაძე უძღვებოდა.

ცხადია, არსებობს გამოწვევები, პრობლემები, ალბათ, შეცდომებიც გვქონდა, შეუცდომელი არავინ არ არის და არ მინდა ვინმემ იფიქროს, რომ ჩვენ განსაკუთრებული ადამიანები ვართ და შეცდომებს არ ვუშვებთ, ეს ასე არ არის - ვინც მუშაობს, ვინც აკეთებს ცხადია, შეცდომებიც არის, მაგრამ მაქსიმალურად ვცდილობთ ყველაფერი ისე გავაკეთოთ, რომ ნაკლები შეცდომები იყოს, - ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა.

მისი თქმით, ყველას გვმართებს მოთმინება და იმ სირთულეების ერთად გადალახვა, რაც დედაქალაქში არსებობს.

„ჩვენ გვაქვს აბსოლუტური მზაობა იმისა, რომ 24-საათიან რეჟიმში გავაგრძელოთ მუშაობა და შრომა, რადგან ეს ყველაფერი პირველ რიგში სჭირდება ამ ქალაქში მცხოვრებლებს. დარწმუნებული ვარ, რომ ყველას ვისაც ჩვენი ქვეყანა, სამშობლო, ჩვენი ულამაზესი დედაქალაქი უყვარს, ახარებს ქალაქის გალამაზება, ყველას ახარებს ის განვითარება და აღმშენებლობა, რაც ბოლო წლების განმავლობაში ხდება დედაქალაქში. ცხადია, ამ ყველაფერს ახლავს გამოწვევები, დისკომფორტი, მაგრამ ჩვენ შევთანხმდით, რომ ყველას გვმართებს მოთმინება, ერთად გადალახვა ამ სირთულეების და დარწმუნებული ვარ, ჩვენ საბოლოოდ იმ შედეგს მივიღებთ, რასაც ველოდებით და რაც გვინდა. გვინდა - უკეთესი ქალაქი, მოწესრიგებული ინფრასტრუქტურა და საზოგადოებრივი ტრანსპორტი, გამწვანებული, გალამაზებული რეკრეაციული სივრცეები, რომ ჩვენმა შვილებმა, მომავალმა თაობებმა იცხოვრონ ეკოლოგიურად სუფთა, მოწესრიგებულ დედაქალაქში. პირადად მე, ჩემს თანაგუნდელებთან ერთად მზად ვარ გავაგრძელო მუშაობა და გემსახუროთ თქვენ. ცხადია, არსებობს გამოწვევები, პრობლემები, ალბათ, შეცდომებიც გვქონდა, შეუცდომელი არავინ არ არის და არ მინდა ვინმემ იფიქროს, რომ ჩვენ განსაკუთრებული ადამიანები ვართ და შეცდომებს არ ვუშვებთ, ეს ასე არ არის, ვინც მუშაობს, ვინც აკეთებს ცხადია, შეცდომებიც არის, მაგრამ მაქსიმალურად ვცდილობთ ყველაფერი ისე გავაკეთოთ, რომ ნაკლები შეცდომები იყოს და განხორციელებული პროექტით იამაყოს ამ ქალაქში მცხოვრებმა ადამიანებმა", - განაცხადა კალაძემ.

კახა კალაძის განცხადებით, მომავალი წლის თბილისის ბიუჯეტი უპრეცედენტო მოცულობის - 1 მილიარდ 632 მილიონი ლარის ოდენობის იქნება.

როგორც მან თბილისის მუნიციპალიტეტის მთავრობის სხდომაზე აღნიშნა, გასული წლის ბიუჯეტთან შედარებით, მნიშვნელოვანი პროექტების განსახორციელებლად, 326 მლნ ლარით მეტი დაიხარჯება.

„საკრებულოს წინაშე წარვდექით, სადაც საზოგადოებას კიდევ ერთხელ ჩავაბარეთ ანგარიში, თუ რა გავაკეთეთ 2022 წელს. ასევე, ვისაუბრეთ იმაზე, რასაც 2023 წელს გავაკეთებთ. კიდევ ერთხელ მინდა მადლობა გადავუხადო საკრებულოს წევრებს მხარდაჭერისთვის. მომავალი წლის ბიუჯეტი უპრეცედენტოდ მაღალი იქნება - მილიარდ 632 მილიონი ლარის ოდენობით. ამხელა ბიუჯეტი თბილისის მუნიციპალიტეტს არასდროს ჰქონია. 2017 წელს, როდესაც ჩემი მერობის პირველი ვადა დაიწყო, დედაქალაქის ბიუჯეტი 800 მლნ-ზე ცოტა მეტი იყო. 2022 წლის ბიუჯეტთან შედარებით კი, მომავალი წლის 326 მლნ ლარით მეტია. გარდა ამისა, მომდევნო წელს, მუნიციპალიტეტი საერთაშორისო დონორი ორგანიზაციებისგან მოზიდული სახსრებით, ჯამურად, 166 მლნ ლარის ღირებულების პროექტებს განახორციელებს“, - აღნიშნა კახა კალაძემ.

მისი თქმით, მომავალ წელს ყველაზე მეტი თანხა - 515 მილიონი ლარი ინფრასტრუქტურულ პროექტებზე დაიხარჯება.

„მნიშვნელოვანია, რომ აღნიშნული ბიუჯეტის ფარგლებში, ინფრასტრუქტურის მიმართულებით 515 მლნ ლარი გამოიყოფა, გარემოს დაცვის მიმართულებით - 200 მლნ ლარი, ჯანდაცვისა და სოციალური უზრუნველყოფის მიმართულებით - 500 მლნ ლარი, „ბინათმესაკუთრეთა ამხანაგობების განვითარების პროგრამისთვის“ - 39 მლნ ლარი; ავარიული სახლების ჩანაცვლებისა და გამაგრების პროგრამა კვლავ გრძელდება. ასევე, მომავალ წელს დაგეგმილი გვაქვს ახალი ავტობაზის მშენებლობა და 2023-24 წლებში 18-მეტრიანი ავტობუსების შემოყვანა“, - განაცხადა დედაქალაქის მერმა.

ამასთან, თბილისის მერის თქმით, მომავალ წელს წერეთლის გამზირის, რამდენიმე ქუჩისა და ხიდის რეაბილიტაცია განხორციელდება.

„გარდა ამისა, განხორციელდება წერეთლის გამზირის რეაბილიტაცია, რომლისთვისაც 25 მლნ ლარია გამოყოფილი, ასევე, დიდუბის ხიდის, უნივერსიტეტის ქუჩის, მშვიდობის ხიდის, სულხან-საბას და ინგოროყვას ქუჩების რეაბილიტაცია. რეაბილიტირდება წინამძღვრიშვილის N1-ში მდებარე საცხოვრებელი სახლი. სრულად განახლდება ვაზისუბანში და დიღმის მასივში არსებული პარკები, ასევე, ციციშვილის პარკი. მუხიანის პარკის, პირველი რესპუბლიკის პარკის, ე.წ. სამხედრო ქალაქის მიმდებარედ დიდი პარკი გაშენდება. განხორციელდება ნარჩენების მართვის მიმართულებით სხვადასხვა ღონისძიება, მათ შორის, მეოთხე უჯრედის მშენებლობის სამუშაოები, რომელიც რამდენიმე წელს გაგრძელდება. ასევე, „თბილსერვის ჯგუფისთვის“ შესაბამის ტექნიკას შევიძენთ. კახეთის გზატკეცილზე განხორციელდება მიწისქვეშა გადასასვლელების რეაბილიტაცია. რასაკვირველია, ყველაფერს ვერ ჩამოვთვლი, მაგრამ უნდა აღინიშნოს, რომ ყველანაირი მზაობა გვაქვს, ქალაქისთვის და აქ მცხოვრები ადამიანებისთვის მნიშვნელოვანი პროექტები განვახორციელოთ. მუშაობას 24-საათიან რეჟიმში გავაგრძელებთ“, - განაცხადა დედაქალაქის მერმა

კახა კალაძის თქმით, 1-ელ და 7 იანვარს საზოგადოებრივი ტრანსპორტი ღამის 3:00 საათამდე იმუშავებს და გახანგრძლივებულ საათებში მგზავრობა უფასო იქნება.

„მინდა მოსახლეობას შობა-ახალი წლის დღესასწაულებთან დაკავშირებით ინფორმაცია მივაწოდო. საზოგადოებრივი ტრანსპორტი: მეტრო, ავტობუსი, მიკროავტობუსი და რიყე-ნარიყალას დამაკავშირებელი საბაგირო ხაზი, როგორც ახალი წლის, ასევე შობის ღამეს, 1-ელ და 7 იანვარს, მგზავრებს ღამის 3:00 საათამდე მოემსახურება. რა თქმა უნდა, მგზავრობა გახანგრძლივებულ საათებში უფასო იქნება, რაც მისასალმებელია. მინდა მადლობა გადავუხადო თბილისის სატრანსპორტო კომპანიის ყველა თანამშრომელს, ვინც ამ მნიშვნელოვან საათებში იმუშავეს და მოემსახურება ჩვენი ქალაქის მაცხოვრებლებს“, - განაცხადა კახა კალაძემ.

მერის განცხადებით გაგრძელდება თანამშრომლებისთვის ხელფასების 10%-ით მატება, რისთვისაც მუნიციპალიტეტი დამატებით თანხებს გამოყოფს. ხელფასების მატება მუნიციპალიტეტის მერიისა და მის დაქვემდებარებაში არსებული უწყებების თანამშრომლებს შეეხება.

„საქართველოს ცენტრალური ხელისუფლების მიერ გაცხადებული პოლიტიკის ფარგლებში, თანამშრომლებისთვის ხელფასების 10 პროცენტით მატება გრძელდება. ამ ყველაფრის მიზანია, რომ საჯარო სექტორში დასაქმებულებს ჰქონდეთ მეტი სტიმული და ინტერესი, დარჩნენ აღნიშნულ სექტორში, ემსახურონ ქვეყანას და მის თითოეულ მოქალაქეს, გაზარდონ მათი საქმიანობის ეფექტიანობა და რაც მთავარია, პასუხისმგებლობა - მეტი სიფრთხილე, ყურადღება თითოეულ საკითხზე მუშაობისას, თითოეული მოქალაქის მიმართვის განხილვისას, თითოეული გადაწყვეტილების მიღებისას. არ უნდა დავივიწყოთ, რომ ეს გადაწყვეტილებები ძირითადად, ეხება და ცვლის არა ერთი ან ორი, არამედ ათასობით მოქალაქის ყოფას“, - განაცხადა კახა კალაძემ.