,
დედაქალაქის მერმა კახა კალაძემ, მერის მოადგილე კახა გულედანთან ერთად, თაბორის მთის ბილიკი დაათვალიერა.
ბილიკი ბააზოვის ქუჩას და თაბორის მთის ფერიცვალების მამათა მონასტერს აკავშირებს.
„აქედან დედაქალაქის ულამაზესი პანორამული ხედები იშლება. აქ იყო ძალიან მძიმე მდგომარეობა, ფეხით გავლა შეუძლებელი იყო, იმდენად რთული ვითარება იყო. დღეს უკვე გაკეთებულია ეს საფეხმავლო ბილიკი, ასევე მოსასვენებელი გადმოსახედი სივრცე. ბილიკი განათებულია და აღჭურვილია უსაფრთხოების კამერებით, ყველანაირად დაცულია. ჩვენ ახლა ერთად დავათვალიერეთ აქაურობა და ულამაზესია ჩვენი დედაქალაქი, თუნდაც აქედან როცა გადაიხედავ. ტურისტულადაც ძალიან საინტერესოა. ამ თვალსაზრისით, კიდევ ბევრი საინტერესო პროექტი განხორციელდება მომდევნო წლების განამვლობაში“, - განაცხადა კახა კალაძემ.
პროექტის ფარგლებში მოეწყო ლითონის კონსტრუქციის კიბე, მოაჯირები და განათების სისტემა, ასევე დამონტაჟდა კამერები. თბილისის პანორამული ხედის უკეთ დასათვალიერებლად და მოსასვენებლად ადგილზე მოეწყო ტერასები საქანელა სკამებით.
თაბორის მთის ფერიცვალების მამათა მონასტრის მიმდებარედ მოეწყო ღობეც. პროექტის ღირებულება ჯამში 1 388 000 ლარია.
ტურისტული ბილიკის დათვალიერების შემდეგ, კახა კალაძემ ახლად რეაბილიტირებული ფირდოუსის ქუჩა დაათვალიერა. აღნიშნულ ქუჩაზე მოეწყო კომუნიკაციები, შეიცვალა გარე განათება და განახლდა ქვაფენილი.
პროექტისთვის კრწანისის რაიონის გამგეობიდან დაახლოებით 380 000 ლარი გამოიყო.
ადგილზე იმყოფებოდნენ კრწანისის რაიონის გამგებელი ბექა მიქაუტაძე, ასევე, საქართველოს პარლამენტისა და თბილისის საკრებულოს წევრები.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
