,
სომხეთის მთავრობა ქვეყნის მასშტაბით, მზის ორი ახალი ელექტროსადგურის აშენებას აანონსებს. გეგმის განხორციელების შემდგომ, სომხეთის მიერ მოპოვებული განახლებადი ენერგიის მარაგი მნიშვნელოვნად გაიზრდება.
მიმდინარე თვეში სომხეთის მთავრობამ არაბთა გაერთიანებულ საამიროებთან მიაღწია შეთანხმებას, რომლის მიხედვითაც ქვეყანაში 2025 წლის ბოლომდე განახლებადი რესურსების კომპანია Masdar-ის მიერ პირველი ელექტროსადგური აშენდება.
Ayg11-ი, 200 მეგავატი სიმძლავრის, შესაბამისად, სომხეთისთვის ყველაზე დიდი მზის ენერგიის ელექტროსადგური იქნება. სომხეთის მთავრობის ცნობით, ელექტროსადგურების მშენებლობის ინიციატორი თავად Masdar-ი იყო. მასვე ჰქონდა უფლება მთავრობის მიერ გამოცხადებული ტენდერის პროცესში შემოთავაზებული ტარიფები გაეკონტროლებინა. საბოლოოდ Masdar-ი და სომხეთის მთავრობა 200-მეგავატიანი ელექტროსადგურის მშენებლობაზე შეჯერდნენ, კილოვატსაათის ფასი კი 0,0290 აშშ დოლარამდე შემცირდა.
ახალი ელექტროსადგური სომხეთის ცენტრალურ ნაწილში, არაგაწოტნის პროვინციის ტერიტორიაზე, 500 ჰექტარზე აშენდება. ელექტროსადგურის 15% სომხეთის ეროვნული ინტერესების ფონდის, ხოლო 85% Masdar-ის მფლობელობაში იქნება. Masdar-ი პროექტში 174 მილიონი აშშ დოლარის ინვესტიციის ჩადებას გეგმავს, რაც რეგიონის მასშტაბით „მწვანე რესურსში“ ჩადებული ყველაზე დიდი უცხოური ინვესტიცია იქნება.
აღსანიშნავია, რომ მზის ენერგიის წარმოება 2017 წელს 0,4 მილიონ კილოვატსაათს შეადგენდა, ხოლო 2020 წლისთვის 56,5 მილიონ კილოვატსაათამდე გაიზარდა. 2021 წლის მარტში, ესპანურ ფირმასთან თანამშრომლობით კიდევ ერთი მზის ელექტროსადგურის მშენებლობა იგეგმება, რომელიც Ayg11-ის მერე სიდიდით სომხეთში მეორე ელექტროსადგური იქნება.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
