,
ჩვენ არ ვაღიარებთ არც ახლა და არც მომავალში რუსეთის მიერ ყირიმისა და სევასტოპოლის უკანონო ანექსიას, - ამის შესახებ ევროპული საბჭოს პრეზიდენტმა შარლ მიშელმა „ყირიმის პლატფორმის“ სამიტზე განაცხადა.
მისივე თქმით, ყირიმის უკანონო ანექსიის ლეგიტიმაცია არასდროს მოხდება.
„ყირიმი უკრაინაა და მოხარული ვარ, რომ ვესწრები „ყირიმის პლატფორმის“ პირველ სამიტს. მე აქ ვარ იმისთვის, რომ დავადასტურო ევროკავშირის ურყევი პოზიცია: ჩვენ არ ვაღიარებთ არც ახლა და არც მომავალში რუსეთის მიერ ყირიმისა და სევასტოპოლის უკანონო ანექსიას. ჩვენ ყოველთვის წინააღმდეგი ვიქნებით საერთაშორისო კანონმდებლობის დარღვევის. რუსეთის ასეთ უკანონო ქმედებებს მძიმე ფასი აქვს. ევროკავშირის მიერ დაწესებული შემზღუდველი ზომები, რასაც ჩვენ რეგულარულად ვაწესებთ 2014 წლის შემდეგ, ამის ნათელი დემონსტრირებაა და ჩვენი მიზანია დაგარწმუნოთ, რომ უკანონო ანექსიის ლეგიტიმაცია არავითარ შემთხვევაში არ მოხდება“,- აღნიშნა მიშელმა.
მისივე თქმით, უკანონო ანექსია და ყირიმსა და მის გარშემო არსებული სიტუაცია საერთაშორისო დღის წესრიგის მთავარ საკითხად უნდა დარჩეს.
„ამიტომ, ყირიმის საერთაშორისო პლატფორმას ჩვენი მნიშვნელოვანი პოლიტიკური მხარდაჭერა აქვს. უკანონო ანექსია ეწინააღმდეგება საერთაშორისო დღის წესრიგის ფასეულობებს, რომლის შენარჩუნებითაც ჩვენ ყველანი დაინტერესებულები ვართ, ამიტომ მოვუწოდებთ, რაც შეიძლება ფართო საერთაშორისო მხარდაჭერისკენ ყირიმის ანექსიის საკითხთან დაკავშირებით არაღიარების ზომების გატარებით და საერთაშორისო პლატფორმაზე დაცვით.
სამწუხაროდ, რუსეთი აგრძელებს ისეთ ქმედებებს, რომელიც კიდევ უფრო აძლიერებს ანექსიის უარყოფით შედეგებს. ნახევარკუნძულის მილიტარიზაციის გაგრძელება, უარყოფით ზეგავლენას ახდენს შავი ზღვის რეგიონში უსაფრთხოებასთან დაკავშირებულ მდგომარეობაზე. ეს უნდა შეიცვალოს.
ევროკავშირი გააგრძელებს უკრაინელი ხალხის მხარდაჭერას. გვსურს დავადასატუროთ, რომ უკრაინა არასდროს იქნება მარტო და ყირიმი უკრაინაა,“- აღნიშნა მიშელმა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
