,
გავლენიანი სარეიტინგო სააგენტო Fitch-ის პროგნოზით, 2021 წელს საქართველოს ეკონომიკა 4.3%-ით გაიზრდება, 2022 წელს კი - 5.8%-ით. Fitch-მა საქართველოს სუვერენული საკრედიტო რეიტინგი და რეიტინგის პერსპექტივა უცვლელად BB დონეზე ნეგატიური პერსპექტივით დატოვა. Fitch-ი პროგნოზით, საქართველოს ეკონომიკის გაჯანსაღების ტემპი „BB“ კატეგორიის ქვეყნების მედიანურ მაჩვენებელთან შედარებით მაღალი იქნება ანუ 4,0% - 2021 წელს და 3,7% - 2022 წელს. ცნობილი სარეიტინგო სააგენტო მთავარ რისკებს შორის კორონავირუსის პანდემიით გამოწვეულ გაურკვევლობას და ვაქცინაციის ეფექტიანობას ასახელებს.
ეკონომიკის და მდგრადი განვითარების სამინისტრო სარეიტინგო კომპანია Fitch-ის მიერ საქართველოს სუვერენული საკრედიტო რეიტინგის BB დონეზე უცვლელად დატოვებას დადებითად აფასებს. მათი განცხადებით, 2020 წლის ოქტომბერ-ნოემბერში Fitch-მა შეამცირა სომხეთის საკრედიტო რეიტინგი “BB-“- დან 'B+'-მდე, ხოლო სლოვაკეთის, ბელარუსის და ლატვიის შემთხვევაში შეამცირა რეიტინგის პერსპექტივა.
„მიმდინარე პანდემიისა და გლობალური გაურკვევლობის ფონზე, სარეიტინგო კომპანიის მიერ რეიტინგის და პერსპექტივის უცვლელად დატოვება ნათლად მიანიშნებს ნდობას საქართველოს ეკონომიკური პოლიტიკისა და მაკროეკონომიკური გარემოს მიმართ.
სარეიტინგო კომპანიის შეფასებით, საქართველოს სუვერენული რეიტინგი მხარდაჭერილია “BB” კატეგორიის ქვეყნების მედიანურ მაჩვენებელთან შედარებით მაღალი მართველობის ხარისხით და ბიზნეს გარემოთი. სახელმწიფოში გატარებული თანმიმდევრული და სანდო პოლიტიკა, უზრუნველყოფს ქვეყანის შედარებით მდგრადობას შოკების მიმართ. სახელმწიფოში გატარებული თანმიმდევრული და სანდო პოლიტიკა უზრუნველყოფს ქვეყანის შედარებით მდგრადობას შოკების მიმართ.
სარეიტინგო კომპანიის პროგნოზით, საქართველოს ეკონომიკა 2021 წელს 4.3 პროცენტით, ხოლო 2022 წელს 5.8 პროცენტით გაიზრდება. „Fitch“ - ის ანგარიშის მიხედვით, საქართველოს ეკონომიკის გაჯანსაღების ტემპი „BB“ კატეგორიის ქვეყნების მედიანურ მაჩვენებელთან შედარებით მაღალი იქნება“, - აცხადებენ სამინისტროში.
საქართველოს ეროვნული ბანკის პრეზიდენტი კობა გვენეტაძე აღნიშავს, რომ საქართველოს ეროვნული ბანკის მიერ განხორციელებულმა სანდო პოლიტიკამ მნიშვნელოვანი როლი ითამაშა მაკროეკონომიკური და ფინანსური სტაბილურობის შენარჩუნებასა და საგადასახდელო ბალანსის რისკების შემცირებაში როგორც წინა ეკონომიკური შოკების დროს, ასევე მიმდინარე გლობალური პანდემიის პირობებში.
„მაკროპრუდენციული ღონისძიებებისა და სავალუტო ბაზრის ინტერვენციების კომბინაციამ ხელი შეუწყო ფინანსურ სტაბილურობასა და გაცვლითი კურსის მერყეობის შერბილებას. საქართველოს ეკონომიკა არის მაღალი დოლარიზაციის მქონე, მცირე ზომის და საკმაოდ ღია (სავაჭრო გახსნილობაა მშპ-ს 60.9%, რომელიც გაცილებით მაღალია, ვიდრე 46.5%-იანი ‘BB’ ჯგუფის მედიანური მაჩვენებელი). თუმცა სანდო პოლიტიკის ჩარჩომ 2012 წლიდან საქართველოს სამომხმარებლო ფასების ინდექსისა და რეალური ეფექტური გაცვლითი კურსის მერყეობის ინდიკატორები ‘BB’ ჯგუფის მედიანურ მერყეობაზე ქვემოთ შეუნარჩუნა“, - აღნიშნა კობა გვენეტაძემ.
მთავრობის ოპტიმისტს არ იზიარებს ეკონომისტი გიგა ბედინეიშვილის. მისი შეფასებით, ძალიან ცუდია რომ 2012 წლის შემდეგ საქართველოს სუვერენულ რეიტინგში არსებითად არაფერი გაუმჯობესებულა და ამის არც მოლოდინი არსებობს.
„Fitch-ის ეს შეფასება კარგი არ არის, რაც ახლა შეგვინარჩუნეს და გვაქვს ანუ BB რეიტინგს ძალიან ცუდ ანუ „ნაგვის რეიტინგს“ უწოდებენ. არ მესმის, რატომ უნდა ვიყოთ კმაყოფილი ამით. ეს რეიტინგი ბოლო 8-10 წელია არ გაუმჯობესებულა. ის, რომ რეიტინგებით რეგიონში ვიღაცეებს ვჯობივართ, მთავრობისგან მისაღები არგუმენტი არ არის სიხარულისთვის, რადგან გააჩნია ვის ვჯობივართ. ჩვენი მიზანი უნდა იყოს ის, რომ წინ წავიდეთ და გარღვევა შევძლოთ. 8 წელი რომ ერთ ადგილს ვტკეპნით, ეს ჩემთვის მოსაწონი ნამდვილად არ არის.
რაც შეეხება საქართველოს მთავრობის მთლიან ვალს, რომელიც 2020 წელს მშპ-თან შეფარდებით 60.4%-მდე გაიზარდა და Fitch-ის პროგნოზით, 2021 წლის განმავლობაშიც აღნიშნულ დიაპაზონში შენარჩუნდება, ვალის ეს დონე დიდ რისკს წარმოადგენს და ძალიან ცუდია. რადგან ჩვენმა შვილებმა უნდა იხადონ ვალი, რომელიც ამ მთავრობამ აიღო და თავის მომხრეებს დაურიგა.
ქვეყნის ეკონომიკის 4.3%-ით გაზრდის პროგნოზი კი ნიშნავს, რომ ვიქნებით 2019 წელში რომ ვიყავით იმ ადგილას, რაც არ არის სასიხარულო. ამ ხელისუფლების პირობებში რეიტინგის გაუმჯობესების საფუძველს ვერ ვხედავ; მეცხრე წელია ხელისუფლებაში არიან და არაფერი გაუკეთებიათ“, - განაცხადა გიგა ბედინეიშვილმა.
ეკონომისტი სოსო ბერიკაშვილი მიიჩნევს, რომ ეკონომიკის 4.3%-იანი ზრდის ვარაუდი სარეიტინგო კომპანიის მხრიდან ოპტიმისტური შეფასებაა, რადგან ჩაკეტილი ქვეყნის პირობებში, ეს რთული მისაღწევი იქნება.
„Fitch-მა საქართველოს რეიტინგი უცვლელად BB-ზე დატოვა ნეგატიური აუთლუქით. კარგი ისაა, რომ არ გაგვიუარესდა, ცუდი ისაა, რომ მაინცდამაინც კარგი რეიტინგი არ გვქონდა. ეკონომიკის ზრდას ვარაუდობენ 4.3%-ით, ეს მეტია ვიდრე სხვა ჩვენნაირ ქვეყნებში. ვფიქრობ, ამ ნაწილში ოპტიმისტურად გვაფასებენ. 4%-ზე მაღალი ეკონომიკური ზრდა ჩაკეტილი იანვარ-თებერვლის ფონზე ცოტა რთულად წარმოსადგენია“, — აღნიშნავს სოსო ბერიკაშვილი.
აღსანიშნავია, რომ საქართველოს მთავრობის ოფიციალური პროგნოზითაც, წელს ქვეყნის ეკონომიკა 4.3%-ით გაიზრდება. 2020 წლის განმავლობაში კი, ეკონომიკა მთავრობის მიერ პროგნოზირებულ 5%-ზე მეტად შემცირდა და კლებამ ჯამურად 6.1% შეადგინა.
წყარო: https://commersant.ge/
