,
სამხრეთ კორეა ახალ კორონავირუსს (COVID-19) საკუთარი ტექნოლოგიური სიძლიერით ებრძვის. ხელოვნურ ინტელექტთან ერთად, ქვეყანა ფლობს მოწინავე ციფრულ პლატფორმას ბევრი მონაცემის მოსაპოვებლად. ზოგადად, კორეა ტექნოლოგიურ ბაზარზე ერთ-ერთი მოწინავეა სამსუნგის ბრენდით, რომელიც ამერიკული ბრენდის, ეფლის, მთავარი კონკურენტია.
დიდი მონაცემების დამუშავებით, ხელოვნური ინტელექტის დახმარებით, წინასწარი გაფრთხილების სისტემითა და ინტენსიური დაკვირვების მეთოდით, სამხრეთ კორეამ მოკლე დროში მოახერხა კორონავირუსის მდგომარეობის კონტროლქვეშ მოქცევა.
მთავრობამ შექმნა დიდი მონაცემების ბაზა, რომელიც მოიცავდა ინფორმაციას მათ ტერიტორიაზე მყოფ ყველა, სამხრეთ კორეისა და უცხო ქვეყნის მოქალაქის შესახებ, რომელშიც აერთიანებდა ყველა სახელმწიფო ორგანოს, კლინიკას, ფინანსურ სერვისს, მობილურ ოპეარტორსა და სხვა მომსახურებას.
სამხრეთ კორეა იყენებს ამ მონაცემთა ბაზიდან მიღებულ ცნობებს და აანალიზებს მათ. მიღებული პასუხები და ინფორმაცია რეალურ დროში ეგზავნებათ პირებს ხელოვნურ ინტელექტზე დაფუძნებული სხვადასხვა აპლიკაციით.
როგორც კი ადამიანს უდასტურდება COVID-19-ის დიაგნოზი, ყველა ახლო მყოფი პირი იღებს ინფორმაციას მათი გადაადგილების ტრაექტორიისა და აქტივობების შესახებ გასული ორი კვირის განმავლობაში, მობილური შეტყობინებების სახით.
სახელმწიფო სამედიცინო სერვისი იღებს ინფორმაციას დაავადებულის კონტაქტების შესახებ, რაც ამარტივებს იმის მიკვლევას, თუ ვის შეხვდა დაინფიცირებული ამ პერიოდის განმავლობაში, რათა მოხდეს მათი დაკვირვება და სამედიცინო გამოკლვევა. ხელოვნური ინტელექტი უზრუნველყოფს ყველა ამ ეტაპის სწრაფ გავლას. კლინიკები, სასწრაფო დახმარების სერვისი, მობილური ლაბორატორიები – ყველაფერი დამოკიდებულია ინფორმაციულ ტექნოლოგიებზე, რომ მოხდეს სწრაფი და ეფექტური რეაგირება.
სამხრეთ კორეა აქტიურად იყენებს კორონავირუსის „დრაივ“ ტესტს. ადამიანი თავისი ავტომობილით შედის კორონავირუსის ტესტირების მობილურ ლაბორატორიაში, მის ნიმუშს მანქანიდან გადაუსვლელად იღებენ და შედეგი რამდენიმე წუთში ხდება ცნობილი. თუ პირს უდასტურდება დიაგნოზი, ის დაუყოვნებლივ იზოლირდება და გადადის სპეციალური მოვლის ზონაში. ასეთი ლაბორატორიები 5G-ით არიან უზრუნველყოფილნი.
გზაზე მოძრავი მძღოლები იღებენ შეტყობინებას უახლოეს მობილურ ლაბორატორიაზე, სადაც შეუძლიათ ტესტის გავლა.
თუ დაინფიცირებული ადამიანი ცხოვრობს ან მუშაობს დიდ შენობაში, იქ ეწყობა დროებითი სამედიცინო ცენტრი ყველა ადგილობრივის შესამოწმებლად.
ხელოვნური ინტელექტი ხელისუფლებას აწვდის ინფორმაციას შესაძლო კლასტერების, ან რისკ ზონების შესახებ, რაც ხელს უწყობს შესაბამის სამედიცინო სერვისს კონკრეტულ არეალში.
ხელოვნური ინტელექტის დახმარებით, სახელმწიფომ შეიმუშავა რეგულაციები და პროცესი, რათა უზრუნველყოს პირბადეებისა და სხვა საპრევენციო მოწყობილობების სწორი და უწყვეტი მიწოდება. ყველა პირს შეუძლია 2 ცალი პირბადის ყიდვა უახლოეს აფთიაქში, ID ბარათის წარდგენის საფუძველზე. მიუხედავად იმისა, რომ ვირუსის აფეთქებიდან გავიდა რამდენიმე კვირა, ყოველდღიური მოხმარების საგნებზე, როგორიცაა ბრინჯი, ზეთი, ბავშვთა კვება და სხვა, ფასების დრამატული ზრდა არ დაფიქსირებულა.
მონაცემთა ბაზის ხელმისაწვდომობამ, სამხრეთ კორეას საშუალება მისცა, საჭიროებისამებრ განესაზღვრა, გადაეწყვიტა ან ინიციატივა აეღო შესაბამის საპასუხო ქცევაზე. ბევრ ქვეყანას არ აქვს მსგავსი ციფრული ბაზების პლატფორმა ან საკმარისი ტექნოლოგიური მზაობა,“ ამბობს ბანგლადეშიდან იძულებით გადაადგილებული და კორეაში მცხოვრები ერთ-ერთი პირი.
ქვეყნის მოსახლეობასთან მიმართვისას, სამხრეთ კორეის პრემიერ მინისტრმა ჩუნგ სი-კიუნმა აღნიშნა, რამდენად მნიშვნელოვანია სიფრთხილე პანიკის გარეშე, თან მაშინ, როცა ყველა შეიძლება, გახდეს ინფექციის მსხვერპლი.
მიუხედავად იმისა, რომ სამხრეთ კორეაში კორონავირუსიანი პაციენტების რაოდენობა მცირდება და ამ ეტაპზე მთავრობა მდგომარეობას აკონტროლებს, დამატებითი სიფრთხილის მიზნით, სამთავრობო დაწესებულებები კვლავ დისტანციურად მუშაობენ – აღნიშნა პრემიერმა.
მასალა მოამზადა ხათუნა სურმავამ
წყარო:https://www.marketer.ge
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
