2024 წლის 24 დეკემბერს ხმელთაშუა ზღვის დასავლეთ ნაწილში, ესპანეთის ქალაქ აგილასსა და ალჟირის ქალაქ ორანს შორის, ჩაიძირა რუსეთის თავდაცვის სამინისტროს კუთვნილი სატვირთო გემი Ursa Major-ი. გემზე აფეთქება მოხდა, რის შედეგადაც ეკიპაჟის 16 წევრიდან 14 გადაარჩინეს და კარტახენას პორტში გადაიყვანეს, ხოლო ორი მეზღვაური დაკარგულად ითვლება.

ოფიციალური დოკუმენტების მიხედვით, Ursa Major-ი 11 დეკემბერს სანქტ-პეტერბურგიდან ვლადივოსტოკისკენ მიემართებოდა, თუმცა რეალურად აღმოჩნდა ხმელთაშუა ზღვაში, სადაც 23 დეკემბერს ჩაიძირა. გემის ჩაძირვის მიზეზი ჯერჯერობით უცნობია.

სამხედრო ანალიტიკოსების შეფასებით, Ursa Major-ი და მისი მსგავსი გემები გამოიყენებოდა სირიაში, ტარტუსში მდებარე რუსული სამხედრო-საზღვაო ბაზის მომარაგებისთვის. ამ გემების დანიშნულების ადგილი, სავარაუდოდ, სირია იყო, მიზანი კი ტარტუსში მდებარე რუსული სამხედრო-საზღვაო ბაზის ევაკუაცია.

Ursa Major-ის ჩაძირვა რუსეთისთვის სერიოზულ დანაკარგს წარმოადგენს, რადგან გემი მნიშვნელოვან როლს ასრულებდა სირიაში რუსული სამხედრო ოპერაციების ლოგისტიკურ მხარდაჭერაში. გემის დაკარგვა ართულებს სირიაში დარჩენილი რუსული სამხედრო ძალების ევაკუაციას და ამცირებს რუსეთის შესაძლებლობას, სწრაფად და ეფექტურად მოახდინოს სამხედრო ტექნიკისა და პერსონალის ტრანსპორტირება რეგიონში. გემზე ჩაძირვის მომენტში დამონტაჟებული იყო, ორი ერთეული 380 ტონიანი სპეციალური საპორტო ამწე და ატომური ყინულმჭრელის 45 ტონიანი ლუკები.