რუსეთის ფედერაცია საქართველოსთვის საწვავის იმპორტის #1 ბაზარი გახდა. 2021 წელს ამ პოზიციას თურქმენეთი იკავებდა, თუმცა წელს საწვავის ფასის რეკორდული ზრდის გამო, ქართველი ნავთობიმპორტიორები უფრო იაფიან ბაზრებზე გადაეწყვნენ და რუსეთიდან იმპორტი გაზარდეს.

2022 წლის პირველ 5 თვეში საქართველომ $461 მილიონის ღირებულების 494,538 ათასი ტონა საწვავი შეიძინა. თანხობრივად იმპორტის ღირებულება 80%-ით, იმპორტირებული ნავთობის მოცულობა კი 7%-ით არის მომატებული. უშუალოდ რუსეთიდან იმპორტის მოცულობა 45%-ით გაიზარდა.

ქვეყნების მიხედვით, ნავთობპროდუქტების იმპორტის მოცულობა ასე ნაწილდება (2022 იანვარ-მაისი):

1. რუსეთი - 138,663 ათასი ტონა, იმპორტის 28%;
2. რუმინეთი - 103,889 ათასი ტონა, იმპორტის 21%;
3. თურქმენეთი - 85,389 ათასი ტონა, იმპორტის 16.5%;
4. ბულგარეთი - 76,409 ათასი ტონა, იმპორტის 15.5%;
5. აზერბაიჯანი - 56,507 ათასი ტონა, იმპორტის 9.7%.

შედარებისთვის მთლიანად 2021 წელს ბაზარი ასე იყო გადანაწილებული:

1. თურქმენეთი - 304,193 ათასი ტონა, იმპორტის 24%;
2. აზერბაიჯანი - 228,491 ათასი ტონა, იმპორტის 18%;
3. რუსეთი - 224,706 ათასი ტონა, იმპორტის 18%;
4. რუმინეთი - 206,091 ათასი ტონა, იმპორტის 16%;
5. ბულგარეთი - 167,815 ათასი ტონა, იმპორტის 13%.

მაისში აპრილთან შედარებით რუსული ნავთობის იმპორტი 70%-ით გაიზარდა და მან $50 მილიონს მიაღწია. ეს ამ პერიოდში იმპორტის მოცულობის 46% იყო.

მაისში საქართველოს კონკურენციის სააგენტომ გამოაქვეყნა ანგარიში, რომელშიც საუბარი იყო, რომ რუსული საწვავი ევროპულზე იაფი იყო. სავარაუდოდ, სწორედ დაბალი ფასის გამო, ბიზნესმა რუსეთიდან იმპორტი გაზარდა.

ამჟამად, ერთი ტონა ბენზინის (platts) ფასი 1,360 დოლარია. ამ ფასთან შედარებით რუსული საწვავი რამდენიმე პროცენტით უფრო იაფია. 

BMG-იმ საქსტატისგან გამოითხოვა იმ კომპანიების ჩამონათვალი, რომლებმაც წელს ქვეყანაში ყველაზე მეტი რუსული საწვავი შემოიტანეს, ეს სია შეგიძლიათ იხილოთ ბმულზე.

წყარო:https://bm.ge/ka/