,
ილიას უნივერსიტეტის პროფესორისა და სეისმოლოგის ზურაბ ჯავახიშვილის შეფასებით, „საქართველო საშუალო სეისმური საფრთხის ქვეყანაა, ამიტომ ძლიერი მიწისძვრები, იშვიათად, მაგრამ მოსალოდნელია და ამისთვის მზად უნდა ვიყოთ". ამის შესახებ მან „საქმიან დილაში“ განაცხადა.
„საქართველო რუკაზე საშუალო სეისმურობის ზონაშია მოქცეული. მართალია, მიწისძვრის დროის პროგნოზირება არ არის შესაძლებელი, თუმცა არის მეთოდები, რომლითაც შეგვიძლია გავიგოთ, სად რა სიმძლავრის მიწისძვრა შეიძლება მოხდეს, გარკვეული ალბათობით“, - განაცხადა მან და იქვე დასძინა, რომ საქართველოში მიწისძვრების მონიტორინგს დედამიწის შემსწავლელ მეცნიერებათა ინსტიტუტი და სეისმური მონიტორინგის ეროვნული ცენტრი ახორციელებენ.
„90-იან წლებში სეისმური ქსელი განადგურდა, ციფრული აპარატურა ისედაც ძველი იყო, თუმცა 2002 წელს, თბილისის მიწისძვრის შემდეგ, მთავრობიდან და სხვადასხვა ორგანიზაციიდან ქსელის განახლების ინტერესი გაჩნდა და დღეისთვის ჩვენი სეისმური ქსელი უახლესი აპარატურითაა აღჭურვილი - გვაქვს ციფრული სეისმოგრაფები, რაც გვაძლევს საშუალებას, მიწისძვრების მონიტორინგი ონლაინ რეჟიმში განვახორციელოთ და თან ეს ინფორმაცია ოპერატიულად მიიღონ შესაბამისმა უწყებებმა“, - განაცხადა ზურაბ ჯავახიშვილმა.
Bm.ge-ს კითხვაზე - რომელ უწყებებს მიეწოდება ინფორმაცია ონლაინრეჟიმში და რამდენად ოპერატიულად და ეფექტიანად რეაგირებენ ისინი, სეისმოლოგმა აღნიშნა, რომ მიწისძვრების მონიტორინგის შესახებ ინფორმაციას საგანგებო სიტუაციების სამსახური და შსს იღებს.
„ვინაიდან დიდი ხანია, საქართველოში ძლიერი მიწისძვრა არ დაფიქსირებულა, აღნიშნული უწყებების რეაგირება საჭირო არ ყოფილა, ამიტომ გამიჭირდება თქვენს კითხვაზე პასუხის გაცემა“, - თქვა მან.
გადაცემა „საქმიან დილასთან“ ინტერვიუში სეისმოლოგმა ხაზი გაუსვა იმასაც, რომ მიწისძვრისგან დაცვის უალტერნატივო გზა სახლების სეისმომედეგი მშენებლობაა.
მისივე თქმით, არსებული ნორმების მიხედვით, შენობებმა 8-მაგნიტუდიან მიწისძვრას უნდა გაუძლოს.
"კარგად უნდა შეფასდეს როგორი სიძლიერის ეფექტია მოსალოდნელი ამა თუ იმ ადგილას და ამის მიხედვით დაპროექტდეს შენობები. არსებობს სამშენებლო ზედამხედველობის უწყება, რომელიც აკონტროლებს შენობებს, არის თუ არა ის ნორმებთან შესაბამისობაში“, - ამბობს სეისმოლოგი.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
