საქართველო რკინიგზამ ₾270-მილიონიან ტენდერში დისკვალიფიკაცია მიანიჭა კომპანიას, რომელიც ლოკომოტივების რემონტს უკრაინასა და ლატვიაში სთავაზობდა. შედეგად, დარჩა ერთადერთი მონაწილე – შპს "გორგია", რომელიც რემონტს რუსეთში ჩაატარებს.

ტენდერი 2024 წლის დეკემბერში გამოცხადდა. მასში ორი კომპანია მონაწილეობდა: შპს "გორგია", რომელიც ჩელიაბინსკის და ტამბოვის ქარხნების მომსახურებას სთავაზობდა რკინიგზას და "სკინესტ რეილ ჯორჯია", რომელიც რკინიგზას ლვოვის და დაუგავპილსის ქარხნების მომსახურებას სთავაზობდა. "სკინესტის" შეთავაზება 266.8 მილიონი ლარი იყო, მაგრამ საქართველოს რკინიგზის სატენდერო სხდომის ოქმის თანახმად, მას დოკუმენტაციის ხარვეზების გამო დისკვალიფიკაცია მიენიჭა.

ტენდერის პირობებით, 47 მოძველებულ ლოკომოტივს კაპიტალური რემონტი უნდა ჩაუტარდეს.

მიმდინარე ტენდერში დარჩენილი ერთადერთი კომპანია შპს "გორგია" საქართველოს რკინიგზის მიმწოდებელი გახდა სხვა ტენდერების მეშვეობითაც. შპს გეორგიამ 2024 წლის მარტში გაიმარჯვა საქართველოს რკინიგზის 54-მილიონიან შესყიდვაში სადაც ერთადერთი პრენტედენტი იყო. ტენდერი 8 თბომავლის და 8 ელმავლის შეკეთებას შეეხებოდა. გაფორმებული ხელშეკრულების თანახმად, სამუშაოები ჩელიაბინსკისა და მოსკოვის ქარხნების მიერ სრულდება.

შპს "გეორგიამ" 2023 წლის დეკემბერში ასევე გაიმარჯვა 13 ახალი ლოკომოტივის შესყიდვის $80.5-მილიონიან ტენდერში, რომლითაც კომპანია ვალდებული იყო საქართველოს რკინიგზისთვის მიეწოდებინა რუსული კომპანია Уральские локомотивы-ის მიერ წარმოებული ახალი ლოკომოტივები, თუმცა 2024 წლის აგვისტოში საქართველოს რკინიგზამ ამ შესყიდვის გაწყვეტის გადაწყვეტილება მიიღო.

ბიზნესრეესტრის თანახმად, შპს "გეორგია" 1995 წელს არის რეგისტრირებული და მისი 100%-იანი წილის მფლობელი ბიზნესმენი გელა ძიძიკაშვილია.

რაც შეეხება კომპანია "სკინესტ რეილ ჯორჯიას", ის ესტონელი ბიზნესმენის, ოლეგ ოსინოვსკის მიერ არის დაფუძნებული. კომპანია საქართველოში 2011 წლიდან საქმიანობს და ის ესტონური "სკინესტ რეილის" საკუთრებაშია.

კომპანიამ 2023 წელს გაიმარჯვა რელსების შესყიდვის 17-მილიონიან ტენდერში, ხოლო 2020 წელს კი საქართველოს რკინიგზისთვის ტრანსფორმატორების მიწოდების 10-მილიონიან ტენდერში.