,
ჯანდაცვის სამინისტრო რესპუბლიკური საავადმყოფოს თანამშრომლების დასაქმებას მთელი ქვეყნის მასშტაბით მოქმედ კლინიკებში გეგმავს. ამის შესახებ უწყების ხელმძღვანელმა ზურაბ აზარაშვილმა მთავრობის სხდომის დასრულების შემდეგ გამართულ პრესკონფერენციაზე ჟურნალისტებს განუცხადა.
მან აღნიშნა, რომ ექიმები და ექთნები საქმიანობის უწყვეტობის მიზნით სახელმწიფო და კერძო კლინიკებში გადანაწილდებიან და დასძინა, რომ პერსონალის მხრივ დიდი გამოწვევა ზუგდიდის მუნიციპალიტეტის სოფელი რუხის მულტიფუნქციურ საავადმყოფოში აქვთ.
„დიდი იმედი მაქვს, რომ იმისთვის, რათა დასაქმებულმა პერსონალმა მუშაობის უწყვეტობა შეინარჩუნოს, გვექნება შესაძლებლობა მათი დიდი ნაწილი სახელმწიფო და კერძო კლინიკებში როგორც თბილისში, ასევე რეგიონებში გადანაწილდეს.
ასევე ძალიან დიდი გამოწვევა გვაქვს რუხის კლინიკასთან დაკავშირებით, რომელიც მულტიპროფილური უნდა იყოს და აქედან გამომდინარე იქაც გარკვეული ნაწილი დასაქმდება. ბოლო ორი კვირაა იქ ჩვენი თანამშრომლები არიან სხვადასხვა მიმართულებების გასახსნელად, ახლა ხდება მოკვლევა და შემდეგ მოხდება თანამშრომლებით დაკომპლექტება“, - თქვა აზარაშვილმა.
მინისტრის ინფორმაციით, რესპუბლიკური საავადმყოფო 900-მდე ადამიანს ასაქმებს. კლინიკის ყოველთვიური სახელფასო ბიუჯეტი კი 1.5-1.7 მლნ ლარია. ზურაბ აზარაშვილის თქმით, კლინიკის ყოველთვიური სახელფასო ხარჯი 1.5 მლნ ლარის მოცულობით, უწყების ბიუჯეტიდან იფარება, რადგან საავადმყოფოს ყველა საჭირო ხარჯის დაფარვისთვის შესაბამისი შემოსავლები არ აქვს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
