2023 წლის 20-21 სექტემბრის შეჯამება უკრაინაში:

- რობოტინეს პლაცდარმის ირგვლივ უკრაინელები შეტევას აფართოებენ. ამ ყველაფრის ფონზე კი რუსები იძულებულნი არიან შეტევის მთელს პერიმეტრზე მაქსიმალურად დიდ ცოცხალ ძალასა და ტექნიკას მოუყარონ თავი. ეს კი ორ რეალობას ქმნის: 1. დიდი რაოდენობით ცოცხალი ძალა პატარა მონაკვეთზე დიდი რაოდენობით შედარებით მარტივი სამიზნის არსებობას ქმნის; 2. უკრაინელებს საშუალებას აძლევს ამ სექტორის მიღმაც გააქტიურდნენ - რუსებმა სხვა ადგილებიდანაც კი გადმოისროლეს პროფესიონალი სამხედროები ამ სექტორის დასაცავად. მიუხედავად დიდი რაოდენობით რუსული სამხედრო ნაწილების თავყრილობისა უკრაინელები ახერხებენ წინსვლას.

- ბოლო 48 საათია ყირიმი ინტენსიური სარაკეტო და დრონებით შეტევის ქვეშაა მოქცეული. გუშინ დაიბომბა რუსული საზღვაო ძალების სამეთაურო შტაბი სევასტოპოლის სიახლოვეს. პუნქტი სრულად განადგურდა. მას რამდენიმე Storm Shadow ესროლეს. დღეს მეორედ დაიბომბა სევასტოპოლი. ამჯერად სამიზნე უცნობია, მაგრამ დაბომბვას დიდი აფეთქება მოჰყვა.

წუხანდელი იერიშებიდან კი საკის სიახლოვეს ასაფრენი ბილიკი დაიბომბა. რუსული ჰაერსაწინააღმდეგო სისტემები ცენტრალურ ყირიმშიც აქტიურად მუშაობდა. შესაბამისად, უკრაინული იერიშების დაფარვა მთელი ნახევარკუნძულის მიმართულებით განხორციელდა. 

- რუსების მხრიდან აქტიური საარტილერიო დაბომბვა მიმდინარეობს უკრაინული პოზიციების წინააღმდეგ მდინარე დნეპრის აღმოსავლეთ სანაპიროზე, ხერსონის ოლქში. როგორც ჩანს რუსები უკრაინელთა მასირებულ შეტევას ვარაუდობენ ივნისში ანტონოვის ხიდის სიახლოვეს შექმნილი უკრაინული სამხედრო პლაცდარმიდან და ამის პრევენცია უნდათ.

- სოჭის ნავთობტერმინალის ნაწილი აფეთქდა და დაიწვა. ოფიციალური მიზეზი არ არის ცნობილი, მაგრამ ერთ-ერთი ვერსიით მას უკრაინული დრონი დაეცა. ამ ფონზე ისედაც გართულებული საწვავის მიწოდების მდგომარეობა რუსეთის შიგნით კიდევ უფრო დამძიმდება. სწორედ ამიტომ, დღეს რუსეთის ხელისუფლების განკარგულებით ბენზინისა და დიზელის ექსპორტი უცხოეთში აიკრძალა. ამით კრემლი ბენზინსა და სხვა საყოფაცხოვრებო პროდუქტებზე ფასების ავარდნასა და ამით გამოწვეულ შოკზე და შიდა ბაზრის თუ სამხედრო მოთხოვნების დაკმაყოფილებაზე აკეთებს გათვლას. ვნახოთ რა გამოუვა.

- პოლონეთსა და უკრაინას შორის ხორბლის გატანის საკითხზე ურთიერთობები გარკვეულწილად დაიძაბა. როგორც ადრეც ვისაუბრეთ, პოლონეთს არ სურს უკრაინული ხორბლის მიღება, რადგან ეს ადგილობრივი ხორბლის ფასს გააუფასურებს, ხოლო ფერმერები მთავრობის წინააღმდეგ გამოვლენ. იმ ფონზე, რომ პოლონეთის ხელისუფლება ფერმერებზე დგას და არჩევნები რამდენიმე კვირაში ტარდება ეს უმნიშვნელო საკითხი არაა. ამ ფონზე რუსულმა პროპაგანდამ ისე წარმოადგინა თითქოს პოლონეთის პრემიერმა განაცხადა, რომ უკრაინას იარაღს აღარ გადავცემო. არადა პრემიერმა მორავიეცკიმ აღნიშნა, რომ უკრაინისათვის რისი გადაცემაც შეეძლო პოლონეთს უკვე გადასცაო და ახლა ამ ძველი იარაღის ჩანაცვლება და პოლონეთის გადაიარაღება უმთავრესი პრიორიტეტი იქნებაო.

მიყევით ბმულს - გიორგი კობერიძე