2023 წლის 1 აპრილის შეჯამება უკრაინაში:
- მოსკოვის საპატრიარქოს მიერ უკრაინაში დანიშნული მიტროპოლიტი პაველ ლებედი, რომელიც უკრაინის ავტოკეფალიის მტერი იყო, კიევში დაკავებულ იქნა. ლებედს ჯაშუშური საქმიანობა, შიდა დაპირისპირების გაღვივება და ეკლესიაში პრორუსული პოლიტიკის გატარება ბრალდება. იგი პეჩორის ლავრას განაგებდა კიევში. მისი ზედმეტსახელი "ფაშა მერსედესია". იგი გამორჩეულად მდიდრული ცხოვრებით ცხოვრობს და უკანასკნელი მოდის ტანისამოსს, საათს, ავტომობილებს, კაშნესა და სხვა ატრიბუტებს ატარებს. მაგრამ მთავარი პრობლემა სწორედ მისი საქმიანობაა, რომელიც ღიად რუსული იყო და რუსული აგრესიის გამართლებას ემსახურებოდა და ეკლესიის შიგნით მრევლს მეხუთე კოლონად ქცევისათვის ამზადებდა. მას სასამართლოს საბოლოო განჩინებამდე ფეხზე GPS სამაჯური დაუმაგრდა. ამ ფონზე პეჩორის ლავრა უკრაინის ეროვნულ ავტოკეფალიურ ეკლესიას დაუბრუნდება.
- უკრაინულმა არტილერიამ ქალაქი ზაპორიჟიას დაბომბვის საპასუხოდ რუსულ პოზიციებზე მიიტანა ინტენსიური იერიში. განსაკუთრებით აქტიურად დაიბომბა პოლოჰის მიმართულება ზაპორიჟიას ოლქში. სხვა დეტალები არ არის ცნობილი.
- საბრძოლო მოქმედებები დონეცკის ოლქში ავდიივკასა და ბახმუტის მიმართულებით უცვლელად გრძელდება. ბახმუტში ქუჩის ბრძოლები მიმდინარეობს და სიტუაცია ბოლო 24 საათში არ შეცვლილა, მაგრამ ავდიივკას მიმართულებით რუსები არამხოლოდ ქალაქის ფლანგებიდან ალყაში მოქცევას ცდილობენ, არამედ დასავლეთის მიმართულებით ცდილობენ სარკინიგზო ხაზს გაჰყვნენ და მომარაგების ერთ-ერთ ცენტრამდე, ოჩერეტინემდე მივიდნენ. უკრაინელებმა მათი შეტევის ჩაშლა შეძლეს.
- ზოგიერთი ადამიანი ტელეგრამსა და ტვიტერზე წერს, რომ რუსული საზღვაო ხომალდი ჩაძირეს შავ ზღვაშიო, მაგრამ ჯერჯერობით არანაირი დამადასტურებელი ფაქტი არ არსებობს ამის (და ნაკლებად სავარაუდოა რამე მომხდარიყო). თუმცა რუსული ხომალდები სევასტოპოლის პორტშიც კი ვეღარ დაცურავენ თავისუფლად. საზღვაო დრონების აქტივობამ რუსული ფლოტი პორტებს მიაჯაჭვა.
