,
ციფრული ფინანსების სფეროში ბიტკოინი არც თუ ისე ახალი, მაგრამ კვლავ განხილვადი და აქტუალური საკითხია. ამ ციფრულმა ვალუტამ არა მხოლოდ ტექნოლოგიების მოყვარულებში გააჩინა ინტერესი, არამედ მნიშვნელოვნად შეცვალა მანამდე არსებული ტრადიციული ფინანსური სისტემები.
შეიძლება ითქვას, რომ ბიტკოინი მსოფლიოში პირველი წარმატებული დეცენტრალიზებული კრიპტოვალუტა და გადახდის სისტემაა. მისი ისტორია კი 2008 წლის მსოფლიო ეკონომიკური კრიზისის ფონზე იწყება, რადგან სწორედ ამ წლის ოქტომბერში გამოქვეყნდა მისი მუშაობის პრინციპები. დღემდე უცნობია თუ ვინ იდგა ამ რევოლუციური ამბის უკან, იყო ერთი ინდივიდი თუ ადამიანთა ჯგუფი, თუმცა იდეის ავტორი სატოში ნაკამოტოს ფსევდონიმითაა ცნობილი.
ბიტკოინი აღიქმება, როგორც დეცენტრალიზებული ციფრული ვალუტა, რაც იმგვარ ფართოდ გავრცელებულ სისტემას გულისხმობს, რომელსაც ერთიანი, ცენტრალიზებული მდებარეობა ან უფლებამოსილი მაკონტროლებელი სტრუქტურა არ გააჩნია. მართლაც, ბიტკოინის მთავარი ხიბლი იმაში მდგომარეობს, რომ - მსგავსად სხვა მრავალი კრიპტოვალუტისა - მხოლოდ ტექნიკურ უზრუნველყოფას საჭიროებს, რაც დამოკიდებული არ არის ისეთ სუბიექტებზე, როგორებიცაა ბანკები ან მთავრობები.
რა არის ბლოკჩეინი?
2008 წელს გამოქვეყნებული ბიტკოინის პროტოკოლი ციფრული ვალუტის ჩარჩოს ასახავდა, რომელიც ბლოკჩეინს ეყრდნობოდა. ბლოკჩეინი დამოუკიდებელი და გადანაწილებული მონაცემთა ბაზაა, რომელიც კომპიუტერულ ქსელში ყველა ტრანზაქციას აღრიცხავს. ამ სისტემას ხშირად შემდეგნაირად აღწერენ: მონაცემთა ჯაჭვის თითოეული ბლოკი შეიცავს ტრანზაქციების ჩამონათვალსა და მათ შესახებ ინფორმაციას. განახლებადი მონაცემთა ბაზა ჯაჭვის სტრუქტურის მუდმივ ზრდას განაპირობებს და ყოველი ახალი ნაწილი წინას უკავშირდება.
როგორც აღინიშნა ბლოკჩეინი მცირე ზომის ბლოკებისაგან შედგება, რომლებიც თითოეული ტრანზაქციის შესახებ ისეთ დეტალებს შეიცავს, როგორებიცაა: თარიღი და დრო, მთლიანი ღირებულება, მყიდველი და გამყიდველი, უნიკალური საიდენტიფიკაციო კოდი. ჩანაწერები ქრონოლოგიური თანმიმდევრობითაა დალაგებული, რაც ციფრულ ჯაჭვს ქმნის.
სისტემაში არსებული მონაცემები მაქსიმალურად გამჭვირვალეა, რაც ნიშნავს იმას, რომ ყოველი ახალი ინფორმაცია ყველა მომხმარებლისათვის ხელმისაწვდომი ხდება. შეიძლება ითქვას, რომ ძალიან წააგავს Google Doc-ის მუშაობის პრინციპს - არსებობს თეთრი ქაღალდი, რომელზე მუშაობა და წვლილის შეტანა ნებისმიერს შეუძლია, იგულისხმება ის წევრები, რომელთაც ფაილზე წვდომა აქვთ.
შესაძლოა, იდეა, რომ ბლოკჩეინის რედაქტირება ყველა წევრს შეუძლია სარისკოდ ჟღერდეს, მაგრამ სწორედ ეს ფაქტორი ხდის მას მეტად სანდოსა და უსაფრთხოს. იმისათვის, რომ ბიტკოინის ბლოკჩეინს ახალი ტრანზაქციის ბლოკი დაემატოს, ის უნდა დადასტურდეს ყველა მფლობელის მიერ. დამოწმების პროცესი უნიკალური კოდების საფუძველზე ხდება, რომლებიც გრძელი და შემთხვევითი რიცხვებისაგან შედგება, რაც თაღლითურ ქმედებას კიდევ უფრო ართულებს. ამასთანავე, მნიშვნელოვანია ისიც, რომ ბლოკჩეინი კიბერშეტევებისაგან მაქსიმალურად დაცულია.
ბიტკოინის სანდოობის შესახებ ინფორმაციის გავრცელებასთან ერთად, მისი, როგორც ტრადიციული ვალუტის ალტერნატიული და თანამედროვე ფორმის მიმზიდველობა კიდევ უფრო გაიზარდა. შედეგად დროთა განმავლობაში ამ კრიპტოვალუტამ მიიპყრო, როგორც ინდივიდუალური მომხმარებლების, ისე ინვესტორების ყურადღება.
მიუხედავად იმისა, რომ ბიტკოინი 15 წლის წინ შეიქმნა, მის შესახებ დღემდე ბევრი კითხვა არსებობს, რომელთა შესახებაც ინფორმაციას ჩვენ მოგაწვდით.
თუკი კრიპტოვალუტის სამყაროში ჯერ დამწყები ხართ და გაინტერესებთ როგორ შეიძინოთ ბიტკოინი, გახსოვდეთ, რომ თავდაპირველად აუცილებელია სრულად გესმოდეთ რა არის ბიტკოინი და როგორ მუშაობს ის. ამის შემდეგ, პირველი ნაბიჯი ციფრული საფულის შექმნაა. საფულე უსაფრთხო სივრცეა, რომელიც საშუალებას გაძლევთ შეინახოთ, გაგზავნოთ და მიიღოთ ბიტკოინები.
ბიტკოინის შესაძენად უნდა გამოიყენოთ კრიპტოვალუტის ბირჟა, რომლის შერჩევის დროსაც სხვადასხვა მახასიათებლებია მნიშვნელოვანი, მაგალითად, საფასური, უსაფრთხოება, ხელმისაწვდომი ფუნქციები და ა.შ.
მისი შეძენა შესაძლებელია კრიპტოვალუტის მრავალ ბირჟაზე, მაგალითად, Coinbase, Binance და Kraken. ამასთანავე, კრიპტოვალუტა ხელმისაწვდომია ბიტკოინის ბანკომატების მეშვეობითაც. პირადი ინფორმაციის გაცვლის შემდეგ, ტრადიციული ვალუტით, იგულისხმება აშშ დოლარი, ევრო ან სხვა, ბიტკოინის შესაძენად შეკვეთის გაკეთებაა შესაძლებელი.
იმაზე პასუხის გაცემა თუ რა ღირს ერთი ბიტკოინი ძალიან რთულია, რადგან კრიპტოვალუტები ცვალებადი კურსით ხასიათდება. შესაბამისად, ღირებულებამ შესაძლოა მნიშვნელოვანი რყევები განიცადოს მოკლე პერიოდში და ფასი ყოველდღიურად შეიცვალოს.
გარდა ვალუტით ყიდვისა, ბიტკოინის დაგროვების რამდენიმე გზა არსებობს. ყველაზე ძველი მეთოდი მაინინგია, რაც რთული მათემატიკური ამოცანების ამოხსნას გულისხმობს. იგულისხმება, რომ მაინინგის ქსელში ჩართული კომპიუტერები ამოცანების გადაჭრისათვის კრიპტოვალუტით ჯილდოვდებიან.
ბოლო დროს მეტად პოპულარულია ისეთი ვებსაიტები და აპლიკაციები, რომლებიც მარტივი ამოცანების შესრულების ხარჯზე ბიტკოინების დაგროვების შესაძლებლობას იძლევა. იგულისხმება რეკლამის ან ვიდეოს ნახვა. მიუხედავად იმისა, რომ რაოდენობა მინიმალურია, მაინც კარგი შესაძლებლობაა ამ სამყაროში შესაბიჯებლად. ამასთანავე, ბევრი პლატფორმა ანაზღაურების ბიტკოინში აღების შესაძლებლობას იძლევა, მაგალითად, ასეთი ვებსაიტებია Upwork და Freelancer.
ბიტკოინების შეგროვება შეგიძლიათ ისეთი დავალების შესრულებითაც, როგორიცაა ფასიან გამოკითხვებში მონაწილეობის მიღება. ზოგიერთი პლატფორმა მომხმარებელს სთავაზობს ბაზრის კვლევაში ჩართვას სწორედ ბიტკოინის სანაცვლოდ.
კრიპტოვალუტის განაღდება აქტივების ტრადიციულ ვალუტაში გადაცვლას გულისხმობს. ამისათვის კი რამდენიმე გზა არსებობს, მაგალითად, განაღდების ერთ-ერთი ყველაზე მარტივი მეთოდი კრიპტო ბირჟების გამოყენებაა. აქ შესაძლებლობა გაქვს იყიდოთ, გაყიდოთ, გაცვალოთ და ციფრული აქტივები თქვენთვის სასურველ საბანკო ბარათზე გადაიტანოთ.
P2P პლატფორმები კი ბიტკოინის პირდაპირი ყიდვა გაყიდვისათვის გამოიყენება. გამყიდველსა და მყიდველს აქვთ შესაძლებლობა პირდაპირ პლატფორმაზე დაუკავშირდნენ ერთმანეთს, მოილაპარაკონ პირობებზე და მივიდნენ შეთანხმებამდე, რაც მესამე მხარის ე.წ შუამავლის არსებობას გამორიცხავს. ამგვარი პრინციპი კი მხარეებს საკუთარი თანხისა და პერსონალური მონაცემების დაცვის შესაძლებობას აძლევს. P2P პლატფორმები გადახდის სხვადასხვა მეთოდს აერთიანებს, მათ შორის საბანკო გადარიცხვებს, ნაღდ ანგარიშსწორებას, ონლაინ გადახდის სისტემებსა და სხვა.
გასანაღდებლად ბიტკოინის ბანკომატების გამოყენებაც შეგიძლიათ. ამ ფიზიკური მოწყობილობის დახმარებით კრიპტოვალუტის სახელმწიფო ვალუტაში გადაკონვერტირება შეგიძლიათ, მაგალითად, თუ ბიტკოინი საქართველოში უნდა გაანაღდოთ, მას ლარში გადაცვლით. ბანკომატის დახმარებით მომხმარებელს შეუძლია აქტივების განაღდება ან ანგარიშზე გადატანა.
ტრადიციული საფინანსო სისტემა მეტად მერყევი და არასტაბილურია. ამის ფონზე კი ბიტკოინების მზარდ და განვითარებად ქსელს სულ უფრო და უფრო მეტი ინდივიდი თუ ინვესტორთა ჯგუფი უერთდება.
ინვესტირებამდე მნიშვნელოვანია შეარჩიოთ მაღალი რეპუტაციის მქონე და უსაფრთხო კრიპტოვალუტის ბირჟები. ამასთანავე, იყავით ინფორმირებული ქვეყანაში არსებული მარეგულირებელი ნორმების შესახებ და განსაზღვრეთ თქვენი მიზნები - ეძებთ გრძელვადიან ინვესტიციას, რაც ბიტკოინის შენარჩუნებას რამდენიმე წლის განმავლობაში გულისხმობს, თუ დაინტერესებული ხართ მოკლევადიანი სავაჭრო შესაძლებლობებით.
მომდევნო ათწლეულმა შესაძლოა მნიშვნელოვანი წვლილი შეიტანოს ბიტკოინისა და ფინანსური სისტემების ევოლუციაში. ყოველდღიური ტრანზაქციებისათვის ბიტკოინის ფართო გამოყენება შესაძლოა რეალობად იქცეს. რაც უფრო მეტი ინფორმაცია ვრცელდება ამ კრიპტოვალუტის შესახებ და რაც უფრო მეტი ადამიანია ტექნოლოგიებთან დაახლოებული, მით უფრო შესაძლებელი ხდება ბიტკოინის ინტეგრირება ყოველდღიური ცხოვრების ფინანსურ ასპექტებში.
როგორც აღინიშნა, ბიტკოინს შეუძლია გადამწყვეტი როლი ითამაშოს ტრადიციული ფინანსური ლანდშაფტის შეცვლაში. იმ შემთხვევაში, თუ კრიპტოვალუტები ფართოდ გავრცელდება, მაშინ
ჩვეულებრივი საბანკო სისტემები დიდი გამოწვევის წინაშე დადგება. ეს იმიტომ, რომ ბიტკოინი დეცენტრალიზებულ, მეტად ინკლუზიურ და ხელმისაწვდომ ფინანსურ სერვისებს გთავაზობთ.
წყარო:https://bm.ge/
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
