საქართველოს კულტურისა და სპორტის სამინისტროს მხარდაჭერით კულტურის სამინისტროს განახლებულ სააქტო დარბაზში ქართული ეთნოგრაფიის სკოლის ფუძემდებლის, გამოჩენილი მეცნიერისა და საზოგადო მოღვაწის, აკადემიკოს გიორგი ჩიტაიას, „შრომების“ (ხუთტომეული) პრეზენტაცია გაიმართა.
ხუთტომეული გამომცემლობა „მერიდიანში“ დაიბეჭდა.
ღონისძიებას საქართველოს კულტურისა და სპორტის მინისტრი თეა წულუკიანი, მინისტრის მოადგილე ნიკოლოზ აზნაურაშვილი, საქართველოს მეცნიერებათა ეროვნული აკადემიის პრეზიდენტი, აკადემიკოსი როინ მეტრეველი, საქართველოს ეროვნული მუზეუმის გენერალური დირექტორის პირველი მოადგილე, ნიკა ახალბედაშვილი, გიორგი ჩიტაიას სახელობის ეთნოგრაფიული მუზეუმის დირექტორი ნინო ჭიპაშვილი, საქართველოს ხელოვნების სასახლე-კულტურის ისტორიის მუზეუმის დირექტორი გიორგი კალანდია, მწერალთა სახლის დირექტორი ქეთევან დუმბაძე, ასევე, აკადემიკოსები, კულტურის, სამეცნიერო და აკადემიური სფეროს მოღვაწეები და სხვა მიწვეული სტუმრები ესწრებოდნენ.
თეა წულუკიანმა დამსწრე საზოგადოებასთან ხუთტომეულის შესახებ საუბრისას ეთნოგრაფიული მუზეუმის სამწლიანი საქმიანობაც შეაჯამა.
გიორგი ჩიტაიას „შრომების“ ხუთტომეულის გამოცემა კულტურის სამინისტრომ დააფინანსა. გამოცემის მთავარი რედაქტორია საქართველოს მეცნიერებათა ეროვნული აკადემიის პრეზიდენტი, აკადემიკოსი როინ მეტრეველი, გამოცემის შემდგენელ-რედაქტორი - ისტორიის მეცნიერებათა დოქტორი, პროფესორი, გიორგი ჩიტაიას სახელობის ქართული ხუროთმოძღვრებისა და ყოფის სახელმწიფო მუზეუმის მთავარი კურატორი და გიორგი ჩიტაიას მოსწავლე თამილა ცაგარეიშვილი.
აკადემიკოს გიორგი ჩიტაიას „შრომების“ ხუთტომეული მისი სამეცნიერო მემკვიდრეობის სრული გამოცემაა (გარდაცვალების შემდეგ) და წარმოაჩენს ქართული ეთნოსის ეროვნულ სიმდიდრეს, მიღწევებსა და ადგილს მსოფლიოს ხალხთა კულტურის საგანძურში. ხუთტომეულის მიზანია, საზოგადოებას გააცნოს გ. ჩიტაიას ეროვნული მემკვიდრეობა. ამავე დროს, ის არის მდიდარი და სანდო წყარო ეთნოლოგიური, ისტორიული და ენათმეცნიერული კვლევებისთვის. გამოცემა ხელს შეუწყობს აკადემიური, საველე, სამუზეუმო საქმიანობის განვითარებას.
ხუთტომეულში თავმოყრილი და განზოგადებულია საქართველოში ეთნოგრაფიული აზრის განვითარება უძველესი დროიდან თანამედროვეობამდე, გამოკვლეულია ქართველი ხალხის წარმომავლობა და მისი მრავალსაუკუნოვანი ისტორია, საქართველოს ცალკეული კუთხეების ეთნოგრაფიული თავისებურება, კულტურულ-ისტორიული ღირებულება, მიღწევები და როლი ერთიანი ქართული კულტურის ჩამოყალიბებაში.
მკვლევარმა არა მარტო წარმოაჩინა ქართველი ხალხის ემპირიული მონაპოვარი, არამედ დაადგინა მისი კავშირი უძველეს ცივილიზაციებთან და საპატიო ადგილი მიუჩინა მსოფლიოს ხალხთა კულტურის ისტორიაში.
ინფორმაციისთვის: I ტომი - ქართველი ხალხის სამეურნეო ყოფა და მატერიალური კულტურა - გ. ჩიტაიას კვლევამ დაადასტურა ის უდიდესი წვლილი, რომელიც ქართველმა ხალხმა შეიტანა სამიწათმოქმედო კულტურის განვითარებაში მარცვლეულის ადგილობრივი ჯიშების გამოყვანითა და სახვნელი იარაღის სრულყოფით; II ტომი - კულტურულ-ისტორიული პრობლემები და ქართველი ხალხის ეთნოგენეზი - წარმოდგენილი ნაშრომები მთლიანად ემსახურება ქართველი ხალხის კულტურულ მემკვიდრეობაში ეთნიკური თავისებურებების აღმოჩენას, რომლებიც მჟღავნდება შრომის ჩვევებსა და საწარმოო გამოცდილებაში; III ტომი - ქართული ეთნოგრაფია, საველე-ეთნოგრაფიული ძიებანი, მეთოდოლოგია - ეძღვნება ქართული ეთნოგრაფიის ჩამოყალიბება-განვითარებისა და ეთნოგრაფიული სამეცნიერო სკოლის შექმნის ისტორიას (1924-1980), საორგანიზაციო და საველე მუშაობის მეთოდიკას, სამუზეუმო საქმიანობის განვითარებას, ეთნოგრაფიული მუზეუმის თბილისში, ღია ცის ქვეშ, დაფუძნებას; IV ტომი მოიცავს საუნივერსიტეტო ლექციების კურსს ეთნოგრაფიაში - „სვეტებს“. გ. ჩიტაიას ლეგენდად ქცეულ „სვეტებზე“ ისტორიკოსთა თაობები გაიზარდა. ეს არის პირველი სალექციო კურსები ზოგად და ქართულ ეთნოგრაფიაში. V ტომი - ისტორიულ-ეთნოგრაფიული ნარკვევები, წერილები, რეცენზიები - თემატურად მრავალფეროვანია.
მასში ასახულია ქართული სამეცნიერო აზრის განვითარების ისტორია, დახასიათებულია მე-20 საუკუნის ქართველ მეცნიერთა შემოქმედებითი გზა, კრიტიკულად არის შეფასებული ქართველი ხალხის წარმოშობის ევროპული თეორიები, როგორიც არის საქართველოსა და კავკასიის გამოცხადება მხოლოდ შარაგზად და მრავალრიცხოვან ტომთა თავშესაფრად (რიტერი).
