,
ჩვენ გვჭირდება უმაღლესი განათლების ხარისხის გაუმჯობესება,-ამის შესახებ პრემიერ-მინისტრმა ირაკლი კობახიძემ ბაზრის კვლევის პრეზენტაციისას განაცხადა, რომელსაც მათ შორის, უნივერსიტეტების ლექტორებიც ესწრებიან.
მისი თქმით, მთავრობის მიერ ჩატარებული შრომის ბაზრის ანალიზის შედეგით გამოვლინდა, რომ მაგალითად, მოთხოვნა არის 678 იურისტზე ყოველწლიურად მაშინ, როდესაც 3600 აბარებს იურიდიულ ფაკულტეტზე.
ირაკლი კობახიძის განმარტებით, ეს ნიშნავს იმას, რომ ჩარიცხული სტუდენტების ნაწილი განწირული არის იმისთვის, რომ იურისტის დიპლომს ვერასდროს გამოიყენებს საკუთარ პროფესიულ საქმიანობაში.
„არის სპეციალობები, სადაც გამოვლინდა დეფიციტი. მაგალითად, რომ ავიღოთ სამართლის მიმართულება, აქ ჩარიცხვების საშუალო წლიური რაოდენობა გასული 5 წლის განმავლობაში იყო 3598, თითქმის 3600 საშუალოდ, წლიურად ირიცხებოდა სამართლის ფაკულტეტზე. კურსდამთავრებულთა რაოდენობა შეადგენდა 2047-ს. ესეც შემაშფოთებელი მაჩვენებელია, რაც მიუთითებს იმაზე, რომ ჩვენ გვჭირდება უმაღლესი განათლების ხარისხის გაუმჯობესება. როდესაც კურსდამთავრებულთა მაჩვენებელი, ჩარიცხვასთან შედარებით არის დაახლოებით 40%, ეს თავისთავად იმაზე მეტყველებს, რომ ძალიან სერიოზული გამოწვევები გვაქვს უმაღლესი განათლების სფეროში. ამ კუთხით გამონაკლისი არ არის არც სამართლის მიმართულება. 3600 ჩარიცხული სტუდენტიდან სწავლას ამთავრებს მხოლოდ 2047.
რაც შეეხება მოთხოვნას, ჩვენმა სიღრმისეულმა კვლევამ გამოავლინა, რომ წელიწადში საშუალოდ გვჭირდება 678 იურისტის შესვლა შრომის ბაზარზე. მოთხოვნა არის 678 იურისტზე ყოველწლიურად მაშინ, როდესაც 3600 აბარებს იურიდიულზე და ამთავრებს დაახლოებით 2,047. ეს მაჩვენებლები უკვე მეტყველებს იმაზე, თუ რამდენად აუცილებელი და გადაუდებელი იყო შრომის ბაზრის ანალიზის ჩატარება. ჩვენ პრაქტიკულად, ვწირავდით სტუდენტებს იმისთვის, რომ ისინი გაივლიდნენ კონკრეტულ კურსს, მიიღებდნენ უმაღლესი განათლების დიპლომს და ვერასდროს შეძლებდნენ საკუთარი დიპლომის შესაბამისად დასაქმებას. ბუნებრივია, ამის თავიდან არიდება სახელმწიფოს პასუხისმგებლობა არის. სწორედ ამ მიზანს ემსახურებოდა შრომის ბაზრის ანალიზი, რომელიც ჩვენ ჩავატარეთ. ვხედავთ, რომ იურისტების შემთხვევაში დისბალანსი ჩარიცხულ სტუდენტებსა და შრომის ბაზრის მოთხოვნას შორის არის 2920. ანუ, 2920 ჩარიცხული სტუდენტი განწირული არის იმისთვის, რომ იურისტის დიპლომს ვერასდროს გამოიყენებს საკუთარ პროფესიულ საქმიანობაში. ჩვენი მიზანია ამის თავიდან არიდება და სწორედ ამიტომ ჩატარდა შრომის ბაზრის ანალიზი“,- განაცხადა კობახიძემ.
