სახელმწიფო ცერემონიების სასახლეში საქართველოს მთავრობისა და სპორტის სამინისტროს მხარდაჭერითა და საქართველოს ეროვნული ოლიმპიური კომიტეტის ორგანიზებით პარიზის ზაფხულის ოლიმპიური თამაშების მონაწილე ქართველი სპორტსმენების ფიცის დადებისა და გაცილების ცერემონია გაიმართა.
სპორტსმენთა სახელით ოლიმპიური ფიცი ოლიმპიურმა ჩემპიონმა, ევროპული თამაშების საუკეთესო სპორტსმენად აღიარებულმა ლაშა ბექაურმა დადო. პარიზის ოლიმპიურ თამაშებზე საქართველოს ოლიმპიური დელეგაციის მედროშეები იქნებიან ლეგენდარული სპორტსმენები - სამივე სინჯის ოლიმპიური მედლის მფლობელი, მსოფლიოში პირველი ქალი სპორტსმენი, რომელიც ოლიმპიადაზე მეათედ იასპარეზებს, ნინო სალუქვაძე და ორგზის ოლიმპიური და შვიდგზის მსოფლიოსა და ევროპის ჩემპიონი ლაშა ტალახაძე.
ღონისძიებას საქართველოს პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი, თბილისის მერი კახი კალაძე, საფრანგეთის ელჩი საქართველოში შერაზ გასრი, კულტურისა და სპორტის მინისტრის პირველი მოადგილე იოსებ ბაღათურია, საქართველოს ეროვნული ოლიმპიური კომიტეტის პრეზიდენტი ლერი ხაბელოვი და ვეტერანი სპორტსმენები ესწრებოდნენ.
პრემიერ-მინისტრმა ირაკლი კობახიძემ ქართველი ოლიმპიელების გაცილების ცერემონიაზე სიტყვით გამოსვლისას განაცხადა, რომ საქართველოს მთავრობა თითოეულ ოლიმპიურ ჩემპიონს - 1 000 000 ლარს, ვერცხლისმედალოსანს - 500 000 ლარს, ხოლო ბრინჯაოს პრიზიორს - 250 000 ლარს გადასცემს.
2024 წლის ზაფხულის ოლიმპიადაზე საქართველოს წარმომადგენლები ათ სპორტის სახეობაში ეყოლება. ეს სახეობებია: ბატუტზე ხტომა, ბერძნულ-რომაული სტილით ჭიდაობა, თავისუფალი სტილით ჭიდაობა, კრივი, მძლეოსნობა, ტყვიის სროლა, ფარიკაობა, ცურვა, ძალოსნობა და ძიუდო. პარიზში საქართველოს ღირსებას დაიცავს 28 სპორტსმენი: ლუბა გოლოვინა (ბატუტზე ხტომა), ლაშა გობაძე ( ბერძნულ-რომაული ჭიდაობა), რამაზ ზოიძე (ბერძნულ-რომაული ჭიდაობა), რობერტ კობლიაშვილი (ბერძნულ-რომაული ჭიდაობა), ვლადიმერ გამყრელიძე (თავისუფალი ჭიდაობა), გივი მაჭარაშვილი (თავისუფალი ჭიდაობა), გენო პეტრიაშვილი (თავისუფალი ჭიდაობა), გოდერძი ძებისაშვილი (თავისუფალი ჭიდაობა), ლაშა გურული (კრივი), გიორგი ყუშიტაშვილი (კრივი), ლიკა ხარჩილავა (მძლეოსნობა), ნინო სალუქვაძე (ტყვიის სროლა), სანდრო ბაზაძე (ფარიკაობა), ანა ნიჟარაძე (ცურვა), ნოე ფანცხავა (ცურვა), შოთა მიშველიძე (ძალოსნობა), ლაშა ტალახაძე (ძალოსნობა), ირაკლი ჩხეიძე (ძალოსნობა), ეთერ ასკილაშვილი (ძიუდო) , ლაშა ბექაური (ძიუდო), ტატო გრიგალაშვილი (ძიუდო), გურამ თუშიშვილი (ძიუდო), ეთერ ლიპარტელიანი (ძიუდო), ვაჟა მარგველაშვილი (ძიუდო), ილია სულამანიძე (ძიუდო), გიორგი სარდალაშვილი (ძიუდო), სოფიო სომხიშვილი (ძიუდო), ლაშა შავდათუაშვილი (ძიუდო).
აღსანიშნავია, რომ პირველად საქართველოს ისტორიაში ოლიმპიადაზე შერეულ გუნდურ ასპარეზობაში მედლისთვის იბრძოლებს ძიუდოისტ ქალ-ვაჟთა შერეული ნაკრები.
საქართველოს ოლიმპიურ დელეგაციას პარიზის ოლიმპიურ თამაშებზე უხელმძღვანელებს სეოკ-ის პრეზიდენტი ლერი ხაბელოვი, ოლიმპიური მისიის ხელმძღვანელი კი იქნება სეოკ-ის პირველი ვიცე-პრეზიდენტი ელგუჯა ბერიშვილი. ოლიმპიური დელეგაციის წევრები პარიზის ოლიმპიურ თამაშებზე ეტაპობრივად გაემგზავრებიან.
პარიზი ზაფხულის XXXIII ოლიმპიურ თამაშებს 26 ივლისიდან 11 აგვისტოს ჩათვლით უმასპინძლებს.
