USD 3.3252
EUR 3.9976
RUB 4.4557
თბილისი
მიხეილ სააკაშვილი - ივანიშვილის სპეცრაზმი მივა ყველა ლიდერთან
თარიღი : 02.23.2021 13:35  48

ივანიშვილის სპეცრაზმი მივა ყველგან და ყველა ლიდერთან, რომელიც იბრძვის იმისთვის, რომ საქართველო გადაარჩინოს სასოწარკვეთის, უბედურების, სიღატაკის ამ მძიმე ხვედრს, - ასე გამოეხმაურა სოციალურ ქსელში საქართველოს მესამე პრეზიდენტი მიხეილ სააკაშვილი „ნაციონალური მოძრაობის“ თავმჯდომარის ნიკა მელიას დაკავებას.

მისივე თქმით, ამ სიტუაციიდან გამოსავალი გამარჯვებამდე ბრძოლაა.

„საქართველოს ისტორიაში, ბოლო ათწლეულების განმავლობაში არასდროს მომხდარა ის, რომ ასეთი სახით, ბრუტალურად, სრულიად მოგონილი მიზეზით მთავარი ოპოზიციური პარტიის თავმჯდომარე და ლიდერი დაეპატიმრებინათ. მინდა გვესმოდეს თუ რატომ არის ივანიშვილი ასე მომართული „ნაციონალურ მოძრაობაზე“, ყველაზე მეტად „ნაციონალურ მოძრაობას“ რატომ ებრძვის, რატომ იყენებს ყველაფერს, რათა ეს პარტია გაანადგუროს და მისი ლიდერები დააპატიმროს. აქ საუბარი იმაზე კი არ არის, რომ ვიღაცას მოსწონს არ მოსწონს, აქვს სიმპატია ან არ აქვს, ნიკა მელიას, სააკაშვილის ან თუნდაც, ნიკა გვარამიას მიმართ. აქ საუბარი სხვა რამეზეა. ეს არის მთავარი ძალა, რომლის მთავარი ამოცანა არის საქართველოსა და ქართველი ერის დახსნა სიღარიბისა და მონობის უღელისგან, რომელშიც ის ივანიშვილმა შეიყვანა. ეს არის ის ძალა, რომელმაც შეძლო საქართველოსთვის წარმატებული გამოცდილების შექმნა და ამას აღიარებს მთელი მსოფლიო. ეს არის ძალა, რომელმაც შეძლო ბრძოლის გაგრძელება მიუხედავად ამდენი წლის რეპრესიებისა. ივანიშვილის სპეცრაზმი მივა ყველგან და ყველა ლიდერთან, რომელიც იბრძვის იმისთვის, რომ საქართველო გადაარჩინოს სასოწარკვეთის, უბედურების, სიღატაკის ამ მძიმე ხვედრს. ისინი ამას გააგრძელებენ, იმიტომ, რომ მათ სხვა გამოსავალი არ აქვთ. ჩვენც სხვა გამოსავალი არ გვაქვს, გავაგრძელოთ ბრძოლა გამარჯვებამდე“, - განაცხადა სააკაშვილმა.

მისივე თქმით, მალე საქართველოსგან თითქმის აღარაფერი დარჩება.

„ახლა რაც ხდება და ის, რომ გერმანიას სურს კომბოსტოს ამკრეფავებად წაიყვანოს 100 ათასამდე ქართველი და სამუდამოდ დაიტოვოს იქ პრაქტიკულად, მეორეხარისხოვან მოქალაქეებად, იგივე მოწვევა შესაძლოა, სხვა ქვეყნებმაც გააკეთონ, ივანიშვილი სიამოვნებით უყიდის მათ უფასო ბილეთებს ერთი მიმართულებით.

მისი მმართველობის წლებში საქართველო დატოვა 900 ათასზე მეტმა ადამიანმა. ივანიშვილის კონტროლირებადი აეროპორტებიდან ბევრად უფრო სწრაფად ხდება ყველაფერი იგივე. მალე საქართველოსგან თითქმის აღარაფერი დარჩება. ეს არის მათი გეგმა. ხელი არავინ რომ არ შეუშალოს მათ სასახლეების მშენებლობაში და მათით ტკბობაში. ქვეყანა დაიშალოს და ბოლომდე განადგურდეს. ეს არის ქართველი ხალხის გენოციდი და ის, რაც ჩვენს მტერს ყველაზე მეტად სურს. ჩვენ უნდა ვიცოდეთ ბრძოლის ყველანაირი მეთოდის გამოყენება. საკუთარი თავის დაცვა. უნდა ვისწავლოთ და ვიცოდეთ, რომ საქმე გვაქვს სრულიად ხელაღებულ ბოროტ ძალას და მასთან კომპრომისი შეუძლებელია. ჩვენ აუცილებლად უნდა მივიყვანოთ ბრძოლა გამარჯვებამდე და ასეც იქნება, ამაში დარწმუნებული ვარ. მაგრამ ეს იქნება მძიმე ბრძოლა. ეს მოითხოვს თითოეული ქართველის მიერ იმის გაცნობიერებას თუ რა საფრთხის წინაშე ვართ თითოეული ჩვენგანი“,- განაცხადა სააკაშვილმა.

ცნობისთვის, სამართლდამცავებმა „ნაციონალური მოძრაობის“ თავმჯდომარე ნიკა მელია დააკავეს. შინაგან საქმეთა სამინისტრომ მელიას აყვანის სპეცოპერაცია პარტიის ცენტრალურ ოფისში გამთენიისას დაიწყო. ოპერაციის ფარგლებში შსს-მ სპეციალური ტექნიკა და სპეცდანიშნულების რაზმი გამოიყენა. გაუშვა ე.წ. წიწაკის სპრეი, რითაც პარტიის ოფისში მყოფი პირები დაშალა.

უცნობი ნაცნობი
გივი მარგველაშვილი - ქართველი გერმანულენოვანი მწერალი და ფილოსოფოსი

ქართველი გერმანულენოვანი მწერალი და ფილოსოფოსი გივი მარგველაშვილი ბერლინში დაიბადა. მისი ოჯახი საქართველოს გასაბჭოების შემდეგ გერმანიაში გადასახლდა.

გივი მარგველაშვილი 1946 წელს მამასთან ერთად მოტყუებით გადაიყვანეს ბერლინის საბჭოთა საოკუპაციო ზონაში, სადაც ისინი დააპატიმრეს და „გასაბჭოებულ“ საკონცენტრაციო ბანაკში მოათავსეს. მამა დახვრიტეს, ხოლო გივის საქართველოში ჩასვლის ნება დართეს. 40-ზე მეტი წლის შემდეგ მას მისცეს უფლება, კვლავ ჩასულიყო გერმანიის ფედერაციულ რესპუბლიკაში.

1991-1994 წლებში მწერალმა გერმანულ ენაზე გამოაქვეყნა ექვსი წიგნი: მრავალტომიანი რომანის, „კაპიტანი ვაკუშის“ 2 ტომი, „მუცალი“, „დიდი კორექტურა“; პროზაული კრებულები „გადაუგდებელი ხელთათმანი“ და „სიცოცხლე ონტოტექსტში“.გივი მარგველაშვილი გერმანიაში თანამედროვეობის ერთ-ერთ გამორჩეულ შემოქმედად აღიარეს. 1994 წელს მწერალს გერმანიის პრეზიდენტმა საპატიო მოქალაქეობა და სტიპენდია მიანიჭა. 2005 წელს გადაეცა გერმანიის უმაღლესი სახელმწიფო ჯილდო - ჯვრის ორდენი, ხოლო 2006 წელს მიენიჭა გერმანიის გოეთეს მედალი. იგი გერსვაილერის „ქალაქის მწერლად“ მიიწვიეს. ცნობილი ფილოსოფოსი ლექციებს კითხულობდა გერმანიისა და აშშ-ის უნივერსიტეტებში. მასზე გადაღებულია დოკუმენტური ფილმი გერმანიის საზოგადოებრივი მაუწყებელის მიერ.

გივი მარგველაშვილი ცნობილია, როგორც გერმანული ეგზისტენციალიზმის აღიარებული სპეციალისტი. აღსანიშნავია მისი წვლილი ქართული ფილოსოფიური აზროვნების განვითარებაში.

მწერალმა სიცოცხლის ბოლო წლები საქართველოში გაატარა. ბერლინიდან თბილისში 2011 წელს დაბრუნდა და 92 წლის ასაკში, 2020 წლის 13 მარტს გარდაიცვალა.

სრულად
გამოკითხვა
თქვენი აზრით, რამდენად ეფექტურია ხელისუფლება კორონავირუსის გამო შექმნილი ეპიდსიტუაციის მართვაში?
ხმის მიცემა
სხვათა შორის

ილია ჭავჭავაძე: "როცა პრუსიამ წაართვა საფრანგეთს ელზასი და ლოტარინგია და პარლამენტში ჩამოვარდა საუბარი მასზედ, თუ რაგვარი მმართველობა მივცეთო ამ ახლად დაჭერილს ქვეყნებს, ბისმარკმა აი, რა სთქვა: ,,ჩვენი საქმე ელზასსა და ლოტარინგიაში თვითმმართველობის განძლიერება უნდა იყოსო. ადგილობრივნი საზოგადოების კრებანი უნდა დავაწყოთო ადგილობრივის მმართველობისთვისაო. ამ კრებათაგან უფრო უკეთ გვეცოდინება იმ ქვეყნების საჭიროება, ვიდრე პრუსიის მოხელეთაგანა. ადგილობრივთა მცხოვრებთაგან ამორჩეულნი და დაყენებულნი მოხელენი ჩვენთვის არავითარს შიშს არ მოასწავებენ. ჩვენგან დანიშნული მოხელე კი მათთვის უცხო კაცი იქნება და ერთი ურიგო რამ ქცევა უცხო კაცისა უკმაყოფილებას ჩამოაგდებს და ეგ მთავრობის განზრახვასა და სურვილს არ ეთანხმება. მე უფრო ისა მგონია, რომ მათგან ამორჩეულნი მოხელენი უფრო ცოტას გვავნებენ, ვიდრე ჩვენივე პრუსიის მოხელენი”. თუ იმისთანა კაცი, როგორც ბისმარკი, რომელიც თავისუფლების დიდი მომხრე მაინდამაინც არ არის, ისე იღვწოდა თვითმმართველობისათვის, მერე იმ ქვეყნების შესახებ, რომელთაც გერმანიის მორჩილება არამც თუ უნდოდათ, არამედ ეთაკილებოდათ, თუ ამისთანა რკინის გულისა და მარჯვენის კაცი, როგორც ბისმარკი, სხვა გზით ვერ ახერხებდა ურჩის ხალხის გულის მოგებას, თუ არ თვითმმართველობის მინიჭებითა, სხვას რაღა ეთქმის."

დედამიწაზე არსებული ცოცხალი არსებებიდან მხოლოდ ადამიანს და კოალას აქვთ თითის ანაბეჭდი

ინდოელი დიასახლისები მსოფლიო ოქროს მარაგის 11% ფლობენ. ეს უფრო მეტია, ვიდრე აშშ-ს, სავალუტო ფონდის, შვეიცარიის და გერმანიის მფლობელობაში არსებული ოქრო, ერთად აღებული.

დადგენილია, რომ სასოფლო-სამეურნეო კულტურათა მოსავლიანობის განმსაზღვრელ კომპლექსურ პირობათა შორის, ერთ-ერთი თესლის ხარისხია. მაღალხარისხოვანი ჯიშიანი თესლი ერთ-ერთი მნიშვნელოვანი ფაქტორია მოსავლიანობის გასადიდებლად, რაც აგრეთვე დასაბუთებულია ხალხური სიბრძნით "რასაც დასთეს, იმას მოიმკი". - ქართული გენეტიკისა და სელექცია–მეთესლეობის სკოლის ერთ-ერთი ფუძემდებელი, მეცნიერებათა დოქტორი, აკადემიკოსი პეტრე ნასყიდაშვილი

ებოლა, SARS-ი, ცოფი, MERS-ი, დიდი ალბათობით ახალი კორონავირუსი COVID-19-იც, ყველა ამ ვირუსული დაავადების გავრცელება ღამურას უკავშირდება.

ყველაზე დიდი ეპიდემია კაცობრიობის ისტორიაში იყო ე.წ. "ესპანკა" (H1N1), რომელსაც 1918-1919 წლებში მიახლოებით 100 მილიონი ადამიანის სიცოცხლე შეეწირა, ანუ დედამიწის მოსახლეობის 5,3 %.

იცით თუ არა, რომ მონაკოს ნაციონალური ორკესტრი უფრო დიდია, ვიდრე ქვეყნის არმია.