,
საპარლამენტო უმრავლესობის მიერ შემოთავაზებულ კანონპროექტი [„ლგბტ პროპაგანდის წინააღმდეგ“] და მცდელობა, რომ ჩვენი ბავშვები დავიცვათ მძიმე ცოდვის პროპაგანდისგან, ევროპარლამენტარების მიერ შეფასდა, როგორც შეტევა თავისუფალ საზოგადოებაზე. არ უნდა დავუშვათ ჩვენს ქვეყანაში ასეთი გაუკუღმართებული აზროვნების დამკვიდრება, აუცილებლად უნდა მივიღოთ აღნიშნული კანონი, - ასე მიმართა მეუფე შიომ სამების საკათედრო ტაძართან შეკრებილ ადამიანებს.
მეუფე შიოს თქმით, დღევანდელ მსოფლიოში ახალი სოციალური ტექნოლოგიების და გენდერული იდეოლოგიების გავლენით ოჯახი განიცდის დიდ ზეწოლას და ვხედავთ ამ ტენდენციების საქართველოში გადმოტანის მაგალითებს და სურვილს.
„საოცრად ამაღლებული განწყობაა დღეს ჩვენს შორის. დიდი იმედი გვაქვს, რომ სიყვარული და ერთგულება ოჯახისადმი, რაც არის ღვთისგან მომდინარე სიწმინდე, გახდება საწინდარი ჩვენი ერის გამთლიანების, უთანხმოებათა დაძლევის. თქვენ მოგახსენეთ უკვე, რომ ოჯახს სიწმინდეს იმიტომ ვუწოდებთ, რომ რომ ეს არის ღვთის მიერ დადგენილი ფორმა ყოფიერების და ცხოვრების. როდესაც ჩვენ ვამბობთ, რომ ვიცავთ ტრადიციულ ღირებულებებს, ოჯახურ ღირებულებებს აქ იგულისხმება არა ის, რომ ჩვენ წინაპრებისგან გადმოგვეცა მხოლოდ ეს ღირებულება, არამედ რომ სათავე ამ ტრადიციისა არის თავად ღმერთი. აი ამიტომ ვიცავთ ჩვენ და ვუფრთხილდებით ოჯახურ ღირებულებებს. ვხედავთ დღევანდელ მსოფლიოში ახალი სოციალური ტექნოლოგიების და გენდერული იდეოლოგიების გავლენით ოჯახი განიცდის დიდ ზეწოლას მსოფლიოს ქვეყნებში, რომლებიც მოწინავედ იწოდებიან. პოლიტიკოსები იღებენ ისეთ კანონებს, რომლებიც აშკარად ეწინააღმდეგება მარადიულ ღმერთისგან დადგენილ ზნეობრივ ნორმებს, საზოგადოების ცხოვრების ტრადიციულ წესს და ყაიდას. მძიმე ცოდვა ცხადდება სიკეთედ და უფრო მეტიც, ღირსეულ ქმედებად, ღირსებად და ადამიანის ქცევის ერთ-ერთ ნორმალურ გამოვლინებად. ეს შედეგად იწვევს ერების დემოგრაფიულ კლებას და ოჯახის განადგურებას. ვხედავთ ამ ტენდენციების საქართველოში გადმოტანის მაგალითებს და სურვილს. ამის ნათელი დასტურია ის დიდი წინააღმდეგობა, რომელიც შეხვდა ჩვენი საპარლამენტო უმრავლესობის მიერ შემოთავაზებულ კანონპროექტს ოჯახური ღირებულებების დაცვის შესახებ, რომელიც გულისხმობს სოდომური ცოდვის პროპაგანდის აკრძალვას მოზარდებში და ბავშვებში. თქვენ წარმოიდგინეთ, ჩვენი მცდელობა, რომ ჩვენი ბავშვები დავიცვათ ამ მძიმე ცოდვის პროპაგანდისგან, ევროპარლამენტარების მიერ შეფასდა, როგორც შეტევა თავისუფალ საზოგადოებაზე.
იმისთვის, რომ ჩვენ ჩვენს ქვეყანაში არ დავუშვათ ასეთი გაუკუღმართებული აზროვნების დამკვიდრება, აუცილებლად უნდა მივიღოთ აღნიშნული კანონი. მეტიც, არ გადავაჭარბებ თუ ვიტყვი, რომ ოჯახური ღირებულებების დაცვა, მათზე ზრუნვა და აღორძინება უნდა გახდეს ჩვენი სახელმწიფოს ერთ-ერთი უმთავრესი საზრუნავი და მიმართულება. წინააღმდეგ შემთხვევაში, ძვირფასო დებო და ძმებო, ჩვენ თუ დავეთანხმებით იმას, რომ ღმერთი მცნებების დარღვევა და ცოდვები ეს არ არის საღმრთო კანონის დარღვევა, არამედ არის ადამიანის ქცევის ერთ-ერთი ნორმალური გამოვლინება, მაშინ ჩვენ არათუ არ გავხდებით ჩვენი ქვეყნის გამთლიანების ღირსი, არამედ ჩვენივე ხელით მოვაწერთ ხელს ჩვენი ქვეყნის გადაშენებას და დაღუპვას.
ამიტომ, ყველაფერი ის, რაც უკავშირდება ბიბლიაში დაგმობილი ცოდვების გამართლებას, ძვირფასო დებო და ძმებო, ეს არის დიდი გამოცდა ჩვენი სარწმუნოების, ჩვენი უფლისადმი ერთგულების. თუ რამდენად გვაქვს შესაძლებლობა დღეს ჩვენ დავამოწმოთ ჩვენი სარწმუნოება და ჩვენი ერთგულება ღვთის წინაშე, მთელი მსოფლიოს წინაშე. ამიტომ, ამაზეა დამოკიდებული ჩვენი ქვეყნის გადარჩენა. თუ ჩვენ გვსურს ჩვენი ერის გადარჩენა და გამთლიანება, უნდა ვუერთგულოთ ღვთის სიტყვას, უფლის მცნებებს და არასდროს არ შევეგუოთ იმ ადამიანებს, ვინც ეცდება ჩვენში ცოდვის და სიწმინდის ზღვრის მოშლას და განსხვავების წაშლას. ვინც ეცდება ჩვენში ცოდვის პროპაგანდას და ცოდვის წარმოჩენას, როგორც სიკეთის, როგორც ღირსების და ვიმეორებ, როგორც ადამიანის ქცევის ერთ-ერთ ნორმალური გამოვლინების. კიდევ ერთხელ გილოცავთ ოჯახის სიწმინდის დღეს. ღმერთმა დაგლოცოთ, გაგახაროთ და გაგაძლიეროთ“, - განაცხადა მეუფე შიომ.
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
