,
დღეს წმინდა ეკლესია საზეიმოდ აღნიშნავს წმინდა ნიკოლოზის, ღირსი შიო მღვიმელის და წმინდა წინასწარმეტყველ ისაიას ხსენებას - შეგვეწიოს ეს დიდი წმინდანები, რომელთა მთელი ცხოვრება იყო სწრაფვა ღვთისა და სულიერი სრულყოფისკენ, - ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი)ნიკოლოზობის დღესასწაულზე ქადაგებისას განაცხადა.
მიტროპოლიტმა მორწმუნეებს დღევანდელი დღე მიულოცა.
„დღეს წმინდა ეკლესია საზეიმოდ აღნიშნავს წმინდა ნიკოლოზის ხსენებას, ასევე - ღირსი შიო მღვიმელის და წმინდა წინასწარმეტყველ ისაიას ხსენებას.
გილოცავთ ამ დღეს, შეგვეწიოს ეს დიდი წმინდანები, რომელთა მთელი ცხოვრება იყო სწრაფვა ღვთისა და სულიერი სრულყოფისკენ. ამ გზაზე მათ მიაღწიეს ღვაწლის სრულყოფილებას და აღემატნენ ადამიანურ საზომს. ამისთვის ეკლესია მათ განსაკუთრებით ადიდებს და უგალობს.
წმინდა ეკლესია წმინდა ნიკოლოზ მღვდელმთავარზე ამბობს, რომ იგი იყო „სარწმუნოების კანონი“, როგორც მის ტროპარშია ნათქვამი: „კანონად სარწმუნოებისა, ხატად სიმშვიდისა და მოძღვრად მარხვისა“. ეს ნიშნავს, რომ იგი იყო უფლის მცნებების დაცვის მაგალითი, მაგრამ ამ მცნებებს შორის იგი განსაკუთრებული გულმხურვალებითა და რწმენის ძალით ასრულებდა მცნებას სიყვარულის შესახებ, ღმერთისა და ადამიანის სიყვარულის შესახებ. ამით იგი სამაგალითოა ყოველი ჩვენგანისთვის.
ვისაც არ უნდა შეხვედროდა თავის ცხოვრებაში წმინდა ნიკოლოზი, ყველა ადამიანში ხედავდა სიკეთეს, ყველა ადამიანს ეხმარებოდა, რომ საკუთარ თავში ეს სიკეთე გაეხსნა და ქმედითი გაეხადა.
მას სწამდა, იცოდა და ჩვენც გვასწავლის, ძვირფასო ძმებო და დებო, რომ ღვთის ხატება უბრალოდ მოცემული კი არ არის ადამიანისთვის, არამედ ეს არის ადამიანის ბუნების საფუძველი, რომელსაც ვერანაირი ცოდვა ვერ წაშლის და ადამიანის ბუნება - ეს არ არის რაღაც სიცარიელე ან არარაობა, არამედ საკუთარ თავში მოიცავს ღმერთის შვილობას, როგორც საფუძველს.
წმინდა ნიკოლოზის მიერ აღსრულებული ყველა სიკეთე, რითაც მან ასეთი საუკუნო დიდება მოიპოვა, მიზნად ისახავდა, ადამიანებში ჩაენერგა ეს რწმენა სიკეთისა, ზუსტად იმ სიკეთისა, რომელზეც მოგახსენეთ და რაც არის ჩვენი ბუნების საფუძველი. სწორედ ამიტომ არის იგი ყოველი ჩვენგანისთვის ასე ახლოს. ამ სიკეთით, ამ რწმენით ღვთისა და ადამიანისადმი იყო გაბრწყინებული, მთელი მისი ცხოვრება. ამ რწმენით მან მიაღწია სულიერ სრულყოფილებას და, შეიძლება ითქვას, მიაღწია ზეციური საკურთხევლის სიმაღლეს.
დღეს წმინდა ისაია წინასწარმეტყველის ხსენებაა და მსგავსად იმ სერაფიმისა, რომელიც წმინდა ისაიას ხილვაში ზეციური საკურთხევლიდან მარწუხით იღებს ანთებულ ნაკვერჩხალს, წმინდა ნიკოლოზიც იღებს ზეციური საკურთხევლიდან ამ ანთებულ ნაკვერჩხალს იმისთვის, რომ შეახოს ადამიანთა გულებს ეს ზეციური ცეცხლი და დაანთოს ადამიანთა გულებში რწმენა და სიყვარული ღვთისა, სიყვარული ადამიანისა და რწმენა ადამიანის იმ სიკეთისა, რომელიც, ვიმეორებ, ჩვენს ბუნებაში ჩადებული და ღვთისგან ბოძებულია.
ღმერთმა დაგლოცოთ, გაგახაროთ, გაგაძლიეროთ, კიდევ ერთხელ გილოცავთ დღევანდელ დღესასწაულს.
წმინდა ნიკოლოზის ხსენებას როცა აღვნიშნავთ, ყოველთვის განსაკუთრებული სიხარული გვეუფლება. დღესაც ეს გრძნობა გვაქვს. ჩემთვის განსაკუთრებით სასიხარულოა თქვენთან ერთად მსახურება სენაკში, დღეს ჩხოროწყუელებიც მრავლად არიან აქ და მინდა, მადლობა გითხრათ იმ სითბოსა და სიყვარულისთვის, თქვენი ლოცვებისთვის, რასაც ყოველთვის ვგრძნობ.
წმინდა ნიკოლოზს ვევედროთ დღეს, ამ სიხარულით, ამ მოწიწებით, ამ მოკრძალებით შევთხოვოთ მას ლოცვები და ვუთხრათ: „წმინდაო, დიდო მღვდელმთავარო ნიკოლოზ, ევედრე ღმერთსა ჩვენთვის“.
მისი ლოცვით, ღმერთმა მოგვცეს მშვიდობა ჩვენს ქვეყანას, მშვიდობა ჩვენს ეპარქიას და ყოველ თქვენგანს.
ღმერთმა დაგლოცოთ, გაგახაროთ”, - აღნიშნა მეუფე შიომ.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
