,
ვინც არ უნდა დამალოს და შეფუთოს, წინასაარჩევნო შემოთავაზებაა, ორი აზრი არ არის, რა თქმა უნდა, - ამის შესახებ ახალქალაქის, კუმურდოსა და კარის მიტროპოლიტმა, მეუფე ნიკოლოზმა განაცხადა, რითაც უპასუხა კითხვას, შესაძლოა „ქართული ოცნების“ მიერ მართლმადიდებლობის სახელმწიფო რელიგიად გამოცხადების საპატრიარქოსთვის შეთავაზება ნიშნავდეს წინასაარჩევნოდ ამომრჩევლის გულის მოგებას.
როგორც მეუფე ნიკოლოზმა ჟურნალისტებს განუცხადა, ეს შეთავაზება მოსყიდვის არა, "ცოტა კეთილად რომ ვილაპარაკოთ, არის მათი წინასაარჩევნო პროგრამა".
„ორი აზრი არ არის ... ვინც არ უნდა დამალოს და შეფუთოს, წინასაარჩევნო შემოთავაზებაა. მოსყიდვის არა, ცოტა კეთილად რომ ვილაპარაკოთ, ეს არის მათი წინასაარჩევნო პროგრამა. ეს არის შემოთავაზება და პირობა, რომლის შესრულების არავითარი გარანტიები არ არსებობს. აქ არის საუბარი იმაზე თუ როგორი ურთიერთობა აქვს სახელმწიფოს და მართლმადიდებელ ეკლესიას.
ეს შემოთავაზება გულისხმობს იმას, რომ ეს არის მართლმადიდებლური ეკლესიისა და მრევლისაკენ გადმოდგმული ნაბიჯი. თავიდან ეს ნაბიჯი არ იყო კარგად მოფიქრებული. ახლა ცოტა გამოსწორდა. ეს შემოთავაზება ადამიანების გულს მოიგებს.
სინოდის წევრებს განვუცხადე, რომ ეს არ ზღუდავს სხვა პარტიებს, რომ მათაც გადადგან რაღაც ნაბიჯები. ეცადონ ადამიანების გულის მოგებას, პირიქით ნუ მოიქცევიან“,- განაცხადა მეუფე ნიკოლოზმა და დაამატა, რომ „ჩვენ [საპატრიარქო] „ქართულ ოცნებას“ შევთავაზეთ, რომ მათთვის უფრო მომგებიანია, ეს არჩევნებს არ დაუკავშიროს“. „ბევრად უფრო მისაღები იქნება და ადამიანების გულსაც უფრო მოიგებს“,- აღნიშნა მეუფემ.
მან უპასუხა შეკითხვას, ხელისუფლების მხრიდან პერსონალურად ვინ შესთავაზა საპატრიარქოს, რომ მართლმადიდებლობა სახელმწიფო რელიგიად გამოცხადდეს.
„ეს შემოთავაზება, ვისაც არ უნდა გაეკეთებინა ჩვენ ჩავთვალეთ, რომ ეს არის სახელმწიფოს შემოთავაზება. ყველაზე მაღალი პირები, რომლებიც პასუხს აგებენ სახელმწიფოს ნაცვლად.
რამდენიმე ადამიანთან გვქონდა კომუნიკაცია. რა საჭიროა მათ შორის ვინ იყო.
უწმინდესთან კომუნიკაცია ასე ადვილი არ არის, ტელეფონით შეუძლებელია. ამიტომ, მეუფე შიოში არავის ეპარება ეჭვი, რომ ზუსტად გადასცემს ამბავს და ჩვენ ზუსტად გადმოგვცეს პატრიარქის პასუხს. მეუფე შიოს პატრიარქთან უშუალო კომუნიკაცია აქვს და ჩვენ ყველას გვჯერა, რომ არ ამახინჯებს გადაცემულ და გადმოცემულ ამბავს“, - განაცხადა მეუფე ნიკოლოზმა.
მისი თქმით, საკითხზე იმსჯელეს და კონსულტაციები გაიარეს იურისტებთან, თუ რას უნდა ნიშნავდეს ეს. როგორც მეუფე ნიკოლოზმა აღნიშნა, არც სახელმწიფო აპირებს ეკლესია დაჩაგროს და არც ეკლესია აპირებს სახელმწიფოს საქმეებში ჩაერიოს.
„რამდენიმე დღეა საუბარი იმაზე, რომ ხელისუფლების მხრიდან არის შემოთავაზება თუ როგორ შეიძლება განვითარდეს ეკლესიასა და სახელმწიფოს შორის ურთიერთობა. შესაბამისად, პირველი შემოთავაზება იყო ცნობილი დებულება, რომ ჩვენ ხომ არ გვინდა, მართლმადიდებლობა სახელმწიფო რელიგიად გამოცხადდეს. ჩვენ ამაზე ვიმსჯელეთ და კონსულტაციები გავიარეთ იურისტებთან, თუ რას უნდა ნიშნავდეს ეს. ეს აზრი არ იყო მისაღები, არც ჩვენთვის და როდესაც სახელმწიფოს გავუზიარეთ ჩვენი პოზიცია, ხელისუფლება დაგვეთანხმა. ეს არის სასიკეთო ურთიერთობა, რომელსაც ერთმანეთის მიმართ ანტაგონიზმი არ გააჩნია. არც სახელმწიფო აპირებს ეკლესია დაჩაგროს, არც ეკლესია აპირებს სახელმწიფოს საქმეებში ჩაერიოს. დღეს მართლმადიდებელ ეკლესიას ძალიან კარგი პოზიცია აქვს, რომელიც განისაზღვრება საკონსტიტუციო შეთანხმებით, რომელიც 2002 წელს მივიღეთ. ახლა ამას თუ გავაუმჯობესებთ, თორემ სხვა რამეზე არ იყო მსჯელობა“,- განაცხადა მეუფე ნიკოლოზმა.
მისივე თქმით, სანამ საკონსტიტუციო ცვლილების საკითხი იურიდიულად არ დადგება, ზუსტ ფორმულირებაზე საუბარი არ არის.
„იდეა არის იმაში, თუ რა შეიძლება შეიცვალოს არსებულ საკონსტიტუციო შეთანხმებაში. ერთი შემოთავაზება არის ის, რომ საქართველოს მართლმადიდებელ ეკლესიას აქვს ისტორიული როლი საქართველოს ცხოვრებაში. აქ ერთი სიტყვა შეიძლება დაემატოს, რომ დღესაც მართლმადიდებელ ეკლესიას მნიშვნელოვანი როლი აქვს. ოღონდ ეს რას მოიტანს, ახლა ამის თქმა შეუძლებელია“,- განაცხადა მეუფემ.
კითხვაზე, შესაძლებელია თუ არა, რომ განხილვა არჩევნების შემდეგ გაგრძელდება, მეუფეს თქმით, სახელმწიფო ეკლესიას სთავაზობს, რომ პარლამენტში საკონსტიტუციო უმრავლესობა სჭირდება იმისათვის, რომ გარკვეული ცვლილებები შეიტანოს, რადგან თუ საკონსტიტუციო უმრავლესობა არ ექნებათ ვერ შეიტანენ ამ ცვლილებას.
„შეიძლება ჩვენ ამ თემაზე გავაგრძელოთ საუბარი. მზადდება წერილი, რომელსაც ჩვენ „ქართულ ოცნებას“ გავუგზავნით. საუბარია იმაზე, რომ სახელმწიფო მართლმადიდებელ ეკლესიას სთავაზობს, რომ პარლამენტში საკონსტიტუციო უმრავლესობა სჭირდება იმისათვის, რომ გარკვეული ცვლილებები შეიტანოს, მათ შორის ესეც [მართლმადიდებლობის სახელმწიფო რელიგიად გამოცხადება]. საკონსტიტუციო უმრავლესობა თუ არ ექნებათ ვერ შეიტანენ ამ ცვლილებას, ამაზეა საუბარი“,- განაცხადა მეუფე ნიკოლოზმა.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
